Bïchuû Pîêre 2 - Mbëtï Ndjapä: TÄFO MADƗ̈

A-earə̂ kə̂ nyisə̂ rə ndə̂ yepa

¹ Dokʉ̈tchê alême a-earə̂ ndə̂ma Ndjapä ndə̂ yepa sə̈ lə̂ gbâtə̂ azü gö ndə̂ Isarayële; ârə̂ âwa ndjë me käko, angâ a-earə̂ kə̂ nyisə̂ rə ndə̂ yepa liadje lə̂ küwû nə̈ lə̂ gbâtə̂ nyê, kə̂ nyiadje sə̂ rə ndə̂ âwâ ngbî tə̂ pö Ndjapä, âmbo andjê ndə̂kə̂ e la andjê pu kuzü. Andjë âzro azü nə̈ zoo andjë kosə̂ Earə̂ kə̂ nyisə̂ rə ndə̂ tche tchâ andjê. Âchiabô tee ndə̂kə̂ pa Ndjapä won andjê-a.

² Angbängbä azü âzadje tchêngbâ a-earə̂ kə̂ nyisə̂ rə ndə̂ yepa lâme la ngbongbo kə̂ mbotə̂ andjê, tə̂ pö ndə̂ azü käko kä ndə̂ azü âdroadje köbo lëge pö.

³ Tə̂ pö ndə̂ kə̂ gbo arə tə̂ gbölösə̂nə̈, a-earə̂ kə̂ nyisə̂ rə ndə̂ yepa lâme boloadje nyê lə̂ köbosə̂ apö yepa ndə̂kə̂ gbo arə tchânə̂ nyê. Praâbalë gasa alême, ngbanga ndə̂ a wâ rə̂ pâ andjê ndô tə̂kə̂ wutu nə̂, ngbongbo rə ndə̂ âwâ ndə̂kə̂ ndɨ andjê wâbo ngrɨ̈-a!

⁴ Bëte Ndjapä gbôâbo tə̂ aânje ndə̂ andjë mbô ngbongbo rə alême ämbämbänə̈-a, praâbalë tche ï andjê la djingîli kə̂ yî andjê bhâlə̂ gbölö wo lə̂ bübü tchô ndə̂ âbû biî ndə̂kə̂ krʉ bëte lö kə̂ wa ngbanga.

⁵ Ndjapä gbôâbo ndjë tə̂ dokʉ̈ tchêbêche alême ämbämbänə̈-a, praâbalë tche mbö rə̂ pä gbölö nyïvrö nyi, kə̈ vô pâ cho nə̈ ndə̂ angbongbo azü nə̈ sə̂ pânə̈, tche tchâ kütû Nowë ndə̂ tche mû pö ndə̂ djîrə̂ rə, tchetchë la azü mïndûu manə̈ bïchuû.

⁶ Ndjapä wä ngbanga pâ azü gö ndə̂ Sodômo la Gomôro ânyë kə̈ wôn andjê la wo. Tche mbö tâ käko ndə̂kə̂ nyisə̂ rə ndə̂ âgboadje azü gbɛ̂ ndə̂ andjë mbo ngbongbo rə.

⁷ Praâbalë Ndjapä jï Lôto ndə̂ tche də̂ djîrə̂ akrə, bëte su Lôto nə̈ kʉ̈ tchë tə̂ ngbongbo kə̂ mbotə̂ a-earə̂ kə̂ won azü lâme.

⁸ Bëte djîrə̂ akrə lâme lö lə̂ gûtə̂ andjê, tche wün andjê, kə̂ dje pö ndə̂ arə gbɛ̂ ndə̂ andjë sə lakə̂ mbo rə̂ lə̂ alö balë balë, ânyë tchə̂lə̂ küma yê sə̂ lakə̂ djingɨli lə̂ köbosə̂ angbongbo kə̂ mbotə̂ andjê nə̈ lâme.

⁹ Käko Gbölö Gbïɛ̈ wä ndə̂kə̂ ji adjîrə̂ azü ndə̂ andjë zâtə̂ andjê gbɛ̂ sə̈ tchë ânyë kə̂ wun yûkü. Tche wä ndjë ndə̂kə̂ nyikrə sə̂ angbongbo azü ndə̂kə̂ pa tche mbo andjê la yûkü tə̂ lo kə̂ wa ngbanga.

¹⁰ Azü ndə̂ andjë wâ la gʉ ndə̂kə̂ za tchêngbâ angbongbo gʉ su andjê la tə̂ andjê, ânyë kə̈ wûn gbôgbô ndə̂ Ndjapä batə̂ ngâ mbämbä rə lâme, tchê mboadje andjê la yûkü. A-earə̂ kə̂ nyisə̂ rə ndə̂ yepa lâme wüntə̂ andjê pä anyë âwâ tâ, kə̈ wûn tə̂ andjê gbölö, andjë wâbo la wawa ndə̂kə̂ dro ayingö ndə̂ tchêlafô ndə̂ sə̂ andjê lû lâme-a.

¹¹ Käko ndjë, aânje ndə̂ andjë wâ la gbôgbô la kümändëmä gbɛ̂ tôâbo pö ndə̂kə̂ dro atchozö ndə̂ tchêlafô lâme tchâtchu Gbölö Gbïɛ̈-a.

¹² Praâbalë andjë mbö rə batə̂ andə̂ agia ndə̂ andjë wûn-âbo sə̂ rə wûn-î, ânyë a dɨ̂ tchîsûwu ndə̂ andjê dokʉ̈tchê nə̂ ndə̂kə̂ pa a kʉ andjê kə̂ won andjê. Andjë drö rə ndə̂ andjë wûn-âbô sə̂nə̈ wûn-î, andjê foadje batə̂ aföfö agia.

¹³ A âmboadje andjê ngbo ngbâ ngbongbo rə ndə̂ andjë mbô rə̂. Andjë mbö arə ndə̂ ngbongbo gʉ su andjê la ngbɛ̂ngbɛ̂ lo, kə̂ wa la mômô lə̂ köbosə̂ nə̈. Kə̂ sə ndə̂ andjê lə̂ gbâtə̂ nyê wätə̂ rə ganô la rə ndə̂ âmbo rə̂ pä nyë te. Ndə̂ nyë âsə̈ zɨ kɨ̈zɨ̂ kpülü la andjê, andjë kä la mômô lə̂ köbosə̂ kə̂ bolo tchô ndə̂ andjê.

¹⁴ Tchə̂lə̂ la andjê sɨ̂sɨ̈ la gʉ ndə̂kə̂ pu aɛ̈chë âdəndjë aköchë ndə̂ azü, gʉ kə̂ mbo ngbongbo rə kâbo lə̂ andjê lö balë-a. Andjë bölo azü ndə̂ andjë kpôkpoabô tə̂ andjê kpôkpo-ê. Su andjê wä la gʉ ndə̂kə̂ gbo arə tə̂ gbölösə̂nə̈. Ngbongbo pö ndə̂ Ndjapä kä pâ andjê.

¹⁵ Ndə̂ andjë gbôtə̂ djîrə̂ köbo, köbo yû tə̂ andjê ânyë andjë zâ köbo ngbâ Bälâme modô ndə̂ Bözôre ndə̂ tche nyîndə̂ kə̂ gbo makətche ndə̂ a kʉ̂ rə̂ sə̈ tchë ndə̂kə̂ pa tche mbo ngbongbo rə.

¹⁶ Praâbalë a hrô la tchë la gbôgbô bëte ngbongbo rə ndə̂ yê lâme. Käko ngâ yûyû kûndiɛ ndə̂ tche pôâbô pô-ê zâ tchə̂lə̂ gɨ̈ akrə ndə̂kə̂ po la rə̂, ndə̂kə̂ kitə̂ köbo tə̂kə̂ mbo ngbɨ̈lə̈ ndə̂ earə̂ ndə̂ma Ndjapä lâme.

¹⁷ Azü lâme wä batə̂ tchə̂lə̂ küma ngû ndə̂ âhrô, kə̈ wâ ndjë batə̂ nyïvrö ndə̂ âbu ânyë gbölö yi rô la rə̂. Ndjapä nyîkrə ngâ tchô ndə̂ âbû biî bëte andjê nə̂.

¹⁸ Apö ndə̂ andjë sə lakə̂ bhi gogo andjê lakə̂ to rə̂ wä kütû tə̂ avôvôo apö. Lə̂ köbosə̂ angbongbo gʉ su andjê la arə ganô ndə̂ andjê, andjë mbö rə̂ pä azü ndə̂ andjë wûtu anganga lə̂ gbâtə̂ a-earə̂ ngbongbo rə, te lə̂ gbânda ndə̂ andjê.

¹⁹ Andjë zä bâlâ ndə̂kə̂ ji andjê lə̂ ngbâa, dëkë andjë la tə̂ andjê, andjë wätə̂ ngbâa ndə̂ rə ndə̂ âe la andjê ndə̂kə̂ ndɨ andjê, bëte akrə balë balë wätə̂ ngbâa ndə̂ rə ndə̂ ârôpâ yê.

²⁰ Bëte âdə azü ndə̂ andjë wûtu lə̂ angbongbo rə ndə̂ tchêbêche lə̂ köbosə̂ nə̈ ndə̂ andjë wûnsə̂ Jezü Krîsiti Gbölö Gbïɛ̈ la Earə̂ kə̂ tcha azə̂, ânyë andjë kä kâ atə̂lə̂ angbongbo arə nə̈ lâme ânyë ârôpâ andjê, kə̂ sə ndə̂ andjê la tchêngbâ nə̈ âka wa ngbo kə̂ ro anə̈ dokʉ̈tchê.

²¹ Bëte äwä âme ndə̂kə̂ pa azü käko wun-abô sə̂ köbo djîrə̂ rə̂ wûn-î. Ngbongbo rə nə̈ də̈ rə̂ ndə̂ andjë wûnsə̂ köbo djîrə̂ rə nə̂, ânyë la tchêngbâ nə̈ andjë kä gbôtə̂ köbo ndïɛ̈ ndə̂ Ndjapä ndə̂ âdâka gbɛ̂, ndə̂ a nyîsə̂ nə̈ dokʉ̈tchê sə̈ andjê.

²² Rə ndə̂ âgbô andjê wä gundə̂sə̂ ndoka ndə̂ âtô lëge pö päkëdə̂: «Ɛ̈vrô dötə̂ yê ndə̂ kɨ̈zɨ̂ ndə̂ tche ndjâ rə̂» âdəndjë: «Koso ndə̂ a djûtu tchë anganga-ë, tche kä rôtə̂ yê lə̂ kpata.»