Bïchuû Pîêre 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Chemôn-Pîêre, më wätə̂ earə̂ kua la badjângele ndə̂ Jezü Krîsiti. Më mbö mbëtï âtə sə̈ andjanə̈ ndə̂ andjë zâ su andjê sə̈ Ndjapä. Kə̂ za su andjê sə̈ Ndjapä nə̈ lâme, ngîrî nə̈ wä ndjë batə̂ andə̂ azə̈ nə̈, lə̂ köbosə̂ djîrə̂ rə ndə̂ Ndjapä ndə̂ azə̂ la Jezü Krîsiti Earə̂ kə̂ tcha azə̂.

² Äfü pä Ndjapä mbo tchôtchô su tə̂ nyê, kə̂ za zɨtɨ su sə̂ nyê tə̂ gbölösə̂nə̈ lə̂ köbosə̂ nə̈ ndə̂ nyë wûnsə̂ Ndjapä la Jezü Gbölö Gbïɛ̈ ndə̂ azə̂.

Pîêre nyïsə̂ köbo kə̂ mbotə̂ djîrə̂ ndə̂ azü ndə̂ Krîsiti

³ Lə̂ köbosə̂ gbôgbô ndə̂ yê, Gbölö Gbïɛ̈ Jezü kʉ̈ arə gbɛ̂ ndə̂kə̂ pa azə̈ sə la sə̂nə̈ lakə̂ zatə̂ azə̂ gbɛ̂ sə̈ Ndjapä. Käko Gbölö Gbïɛ̈ nə̈ nyïsə̂ Ndjapä ndə̂ tche ê azə̂ lə̂ köbosə̂ kə̂ wa gbölö ndə̂ yê la tə̂ yê la tchôtchô kua ndə̂ tche mbô rə̂.

⁴ Lə̂ köbosə̂ arə nə̈ lâme kä ndə̂ Ndjapä kʉ̂ atchôtchô arə ndə̂ gbölö ngîrî sə̈ azə̂ ndə̂ tche zâ bâlâ tə̂ pö ndə̂nə̈ alême. Käko ndə̂ nyê âsə̈ gbo rə̂, âmbo rə̂ pä nyë kpe tə̂ köbo agʉ arə tchêbêche âtə ndə̂ ândɨ azü. Käko kä ndə̂, kə̂ sə ndə̂ nyê kʉtə̂ yê la andə̂ Ndjapä.

⁵ Bëte rə̂ kä, äwäpä nyë za gbôgbô ndə̂ nyê gbɛ̂ ndə̂kə̂ mbotə̂ nyê djîrə̂ ëpâ kə̂ za su nyê sə̈ Jezü. Nyë zä kə̂ wunsə̂ rə ëpâ kə̂ mbotə̂ nyê djîrə̂;

⁶ nyë zä kə̂ kitə̂ gʉ tə̂ nyê ëpâ kə̂ wunsə̂ rə, nyë zä kə̂ rʉ̈ätə̂ su nyê ëpâ kə̂ kitə̂ gʉ tə̂ nyê, nyë zätə̂ nyê gbɛ̂ sə̈ Ndjapä ëpâ kə̂ rʉatə̂ su nyê.

⁷ Nyë zä kə̂ mbo la sə̂ angâ nyê ëpâ kə̂ zatə̂ nyê gbɛ̂ sə̈ Ndjapä, nyë zä kə̂ nyïndə̂ ngâ ëpâ kə̂ mbo la sə̂ angâ nyê.

⁸ Bëte âdə arə lâme âwa lə̂ nyê âkə̈ gê, ârə̂ âmbo rə̂ pä kua ndə̂ Ndjapä ndə̂ nyê mbo rə̂ âleadje kə̂ zadje köbo sə̈ nyê ndə̂kə̂ ge lə̂kə̂ wunsə̂ Gbölö Gbïɛ̈ ndə̂ azə̂ Jezü Krîsiti.

⁹ Praâbalë akrə ndə̂ tche wâbô wâ la arə lâme, tche wätə̂ earə̂ föla, la yê gʉ̂âtə̂ yê nə̂ ëtâ, angbongbo arə ndə̂ yê ndə̂ a djûtu rə̂ alême, sə̂nə̈ yû tə̂ yê nə̂.

¹⁰ Bëte rə̂ kä, arə̂mä äwäpä nyë ka mbô gbôgbô gbɛ̂ ndə̂kə̂ lusə̂ kə̂ e nyê ndə̂ Ndjapä ê nyê lâme, la rə̂ ndə̂ tche dɨ̂ nyê lâme. Bëte âdə nyê âsə̈ mbo tâ käko, nyê djeabô tchêngbâ nyê tə̂ Ndjapä balë tee-a.

¹¹ Käko a âjiadje köbo sə̈ nyê ngbɨngbɨngbɨ ndə̂kə̂ li bhâlə̂ Gbölö gö-gbïɛ̈ ndə̂ logbɛ̂, ndə̂ Gbölö Gbïɛ̈ ndə̂ azə̂, la Jezü Krîsiti Earə̂ kə̂ tcha azə̂.

¹² Bëte rə̂ kä ndə̂ më nyîndə̂ kə̂ kä to tchêndə̂ pö ndə̂ arə lâme sə̈ nyê. Nyë wûnsə̂ arə lâme nə̂, ânyë kə̈ krʉ̂ la gbôgbô pâ lëge pö ndə̂ nyë gbô rə̂.

¹³ Praâbalë äwä lə̂ la mê djîrə̂ ndə̂kə̂ pa, ndə̂ gbô mê sə̂ la tʉ̈rʉ̂ la mê, më âkä to tchêndə̂ apö lâme sə̈ nyê ndə̂kə̂ pa nyë loabô lô-ê.

¹⁴ Bëte më wûnsə̂ nə̈ nə̂ pä më ndô tə̂kə̂ tchu nə̂, batə̂ rə̂ ndə̂ Gbölö Gbïɛ̈ ndə̂ azə̂ Jezü Krîsiti nyîsə̂ nə̈ sə̂ mê.

¹⁵ Praâbalë mê mboadje rə̂ ndə̂kə̂ pa la tchêngbâ mê, arə ndə̂ më nyîsə̂ nə̂ sə̈ nyê, nyê gbo köbo lə̂ arə gbɛ̂ ndə̂kə̂ pa su nyê te pâ apö ndə̂ më nyîsə̂ nə̈ sə̈ nyê lâme.

Azü ndə̂ andjë wûn golowäre ndə̂ Krîsiti

¹⁶ Tə̂ lëge nə̈, âwâbo lə̂ köbosə̂ ndə̂ma tro, la apö ndə̂kə̂ rɨ̈ tchə̂lə̂ küma azü kä ndə̂ ârâ nyîsə̂ kə̂ ka ndə̂ Gbölö Gbïɛ̈ ndə̂ azə̂ Jezü Krîsiti la gbôgbô-a, praâbalë ârâ wün kə̂ wa gbölö ndə̂ yê la lala ârâ.

¹⁷ Bëte Ndjapä Bha azə̂ zä kə̈ lusə̂tə̂ la golowäre sə̈ tchë, sə̂nə̈ ndə̂ a djê tchə̂lə̂ gɨ̈ Ndjapä ndə̂ golowäre ndə̂ yê rô agolowäre gbɛ̂ lâme päkëdə̂: «Tchanə̈ âtə də̈ Modô ndə̂ mê, ndə̂ më nyîndə̂ yê tə̂ gbölösə̂nə̈, su mê fü la tchë gbɛ̂.»

¹⁸ Ârâ la tə̂ ârâ, ârâ djë tchə̂lə̂ gɨ̈ nə̈ lâme ndə̂ âtô bhâ lafô, sə̂nə̈ ndə̂ ârâ sə̂ la Krîsiti bhâlə̂ küma aga ndə̂ âwâ ngbî ânyë kə̈ dâka gbɛ̂.

¹⁹ Käko gbô azə̂ kä lakə̂ za su azə̂ pâ apö ndə̂ a-earə̂ ndə̂ma Ndjapä tô rə̂ alême, ädäka ndə̂kə̂ pa la nyê gbo pânə̈-ê: Äwä batə̂ lâmba ndə̂ âtcho lə̂ bübü tchô, ndjoa ndə̂kə̂ pa tchô kra tâ, ânyë ndjamunu tcho bhâlə̂ su nyê.

²⁰ Tə̂ dokʉ̈ nə̈, rə ndə̂ nyë wâ ndə̂kə̂ wunsə̂ nə̈ wä kâkë: Ngâ earə̂ ndə̂ma Ndjapä balë ndə̂ tche mbô apö tə̂ su yê la tə̂ yê lə̂ Mbëtï Ndjapä sə̂âbo-a.

²¹ Bëte ngâ akrə âbolafô la su yê ndə̂kə̂ to ndə̂ma Ndjapä-a, praâbalë Kpɨ̂ki Yingö kä âkə̂ za rə̂ lə̂ su azü ndə̂kə̂ to pö la rə̈ Ndjapä.