Bïchuû Körɛ̂nte 9 - Mbëtï Ndjapä: TÄFO MADƗ̈

Kə̂ mbo tchôtchô rə tə̂ angâ andjê

¹ Âdə pö ndə̂kə̂ kʉ rə sə̈ azü ndə̂ Ndjapä, âdə̂âbo ngâ rə ndə̂kə̂ pa më wan mbëtï sə̈ nyê pânə̈-a.

² Käko më wûnsə̂ nə̈ nə̂ pä nyë kä la tchôtchô su, ânyë kə̈ bhî gogo mê tə̂ pö ndə̂ nyê lə̂ la azü ndə̂ Mäsëdöâne. Më tö rə̂ sə̈ andjê päkëdə̂: «Azü ndə̂ Akayï nyïkrə arə ndə̂ andjê gbɛ̂ lə̂ ngû ndə̂ ârô lâme.» Ârə̂ kä ndə̂ gʉ kə̂ kʉ rə ndə̂ nyë wâ la rə̂ mbô rə̂ pä angâ a-Egilîze wâ ndə̂kə̂ mbo rə̂ tə̂ gbölösə̂nə̈.

³ Më wän arə̂mâ âtə sə̈ nyê ndə̂kə̂ pa nyë nyikrə arə nə̈ gbɛ̂ ndə̂ më tô pö ndə̂nə̈ lâme dokʉ̈tchê. Käko ânyë kə̂ bhi gogo mê ndə̂ më bhî rə̂ tə̂ pö ndə̂ nyê lâme wabô wâ ämbänə̈-ê.

⁴ Më wä la wawa bëte âdə mëmê la azü gö ndə̂ Mäsëdöâne âwutu bhâye ânyë nyë nyîkrəabô rə nə̈ nyîkrə dämba-ê, ârâ âwa la ganô bëte ârâ tö rə̂ sə̈ andjê pä nyë nyîkrə rə nə̂ gbɛ̂.

⁵ Bëte rə̂ kä ndə̂ më rɨ̂ su mê ndə̂kə̂ yukû nə̈ sə̈ arə̂mâ ndə̂kə̂ e dokʉ̈tchê pu nyê ânyë nyê nyikrə arə ndə̂ nyë wâ ndə̂kə̂ kʉ rə̂. Käko âdə mê âsə̈ wutu bhâye, dëkë nyë kʉ̂ rə ndə̂ nyë zâ bâlâ tə̂ pö ndə̂nə̈ lâme nə̂. Ânyiadje sə̂nə̈ pä nyë kʉ̈ rə la tchôtchô su âdə̂âbo la ngbongbo su-a.

⁶ Äwäpä nyë wunsə̂ nə̈ päkëdə̂: Akrə ndə̂ tche lû andjî rəgʉ kpîɛ̂kpîɛ̂ rə̂, tche âsoa ndjë rə̂ kütû kpîɛ̂kpîɛ̂ rə̂. Akrə ndə̂ tche lû andjî rəgʉ tə̂ gbölösə̂nə̈, tche âsoa ndjë rə̂ tə̂ gbölösə̂nə̈!

⁷ Äwäpä akrə balë balë kʉ rə gundə̂sə̂ rə ndə̂ tche nyîkrə rə̂ tə̂ su yê, âdə̂âbo la nyonyo-a, âdəndjë rə̂ pä a za tchë la gbôgbô-a, bëte Ndjapä nyïndə̂ akrə ndə̂ tche kʉ̂ rə la mômô.

⁸ Ndjapä kä la gbôgbô ndə̂kə̂ kʉ atchôtchô arə ngbî ngbî âro masə̂nə̈ sə̈ nyê, käko ânyë nyê wa la rə logbɛ̂ ndə̂kə̂ pa nyë mbo rə̂ la atchôtchô kua.

⁹ Batə̂ rə̂ ndə̂ Mbëtï Ndjapä tô rə̂ päkëdə̂: Tche kʉ̈ rə la tchôtchô su sə̈ a-earə̂ yûkü, kə̂ mbo adjîrə̂ rə ndə̂ yê wä logbɛ̂.

¹⁰ Ndjapä ndə̂ tche kʉ andjî rəgʉ sə̈ earə̂ kə̂ lu rəgʉ, ânyë kə̂ kʉ kɨ̈zɨ̂ sə̈ azü ndə̂kə̂ zɨ rə̂, tchê kʉadje andjî rəgʉ sə̈ nyê, kə̂ mbo rə̂ pä äle ndə̂kə̂ pa azü gbo atchôtchô arə tə̂ gbölösə̂nə̈ lə̂ köbosə̂ nyê.

¹¹ Tchê mboadje rə̂ pä nyë watə̂ a-earə̂ rə tə̂ gbölösə̂nə̈ logbɛ̂, ndə̂kə̂ pa nyë nyisə̂ kə̂ mbo rə ndə̂ nyê la tchôtchô su. Käko angbängbä azü za ayîabâ sə̈ Ndjapä bëte rə ndə̂ nyê kʉadje rə̂, ânyë ârâ kʉadje rə̂ sə̈ azü.

¹² Bëte rə ndə̂ nyê kʉadje rə̂ lâme wabô tee kütû bëte azü ndə̂ Krîsiti ndə̂ andjë wâbô wâ la rə-a, praâbalë ârə̂ âmbo rə̂ pä azü za ayîabâ sə̈ Ndjapä lə̂ köbosə̂ nə̈.

¹³ Andjë âsə̈ wun rə nə̈ lâme käko, kə̂ za ayîabâ sə̈ Ndjapä bëte rə̂ ndə̂ nyë djê Tchôtchô Pö ndə̂ Krîsiti ânyë kə̈ mbô rə gundə̂sə̂ nə̈. Andjê vogadje Ndjapä bëte rə̂ ndə̂ nyë pâla arə ndə̂ nyê la tchôtchô su ndə̂kə̂ kʉ rə̂ sə̈ azü ndə̂ Ndjapä ndə̂ andjë sə̂ bhâ Jerûzalêmo la azü ndə̂ Ndjapä gbɛ̂.

¹⁴ Andjê toadje pö sə̈ Ndjapä bëte nyê, lakə̂ nyisə̂ köbo ndə̂ andjë nyîndə̂ nyê bëte tchôtchô su ndə̂ Ndjapä mbô rə̂ tə̂ gbölösə̂nə̈ tə̂ nyê.

¹⁵ Azə̈ zä ayîabâ sə̈ Ndjapä bëte rə ndə̂ tche zâ rə̂ sə̈ azə̂ ndə̂ ârô adɨ̂ arə gbɛ̂.