Bïchuû Körɛ̂nte 7 - Mbëtï Ndjapä: TÄFO MADƗ̈

¹ Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, atchôtchô arə ndə̂ Ndjapä zâ bâlâ nə̈ lâme wä bëte azə̂. Käko, äwäpä azə̈ djutu angbongbo rə gbɛ̂ ndə̂ tə̂ azə̂ la andə̂ vrö azə̂ ndə̂kə̂ pa azə̈ daka gbɛ̂ lə̂ köbosə̂ kə̂ zatə̂ azə̂ gbɛ̂ lakə̂ kpe wa Ndjapä.

Pôlo wä la mômô

² Nyë nyïkrə tchô bhâlə̂ su nyê bëte ârâ. Ârâ mbôâbo ngbongbo rə tə̂ ngâ akrə balë-a, kə̈ ndɨ̂âbo tchə̂lə̂ kə̂ sə ndə̂ ngâ akrə-a, kə̈ kʉ̂âbo rə ndə̂ ngâ akrə la gbôgbô-a.

³ Më tôâbo pö nə̈ lâme ndə̂kə̂ wa ngbanga lə̂ küma nyê-a, bëte më tô rə̂ sə̈ nyê dokʉ̈tchê nə̂ pä, âdə ârâ âtchu âdəndjë rə̂ ndə̂ ârâ sə̂ la tʉ̈rʉ̂ la ârâ, ârâ nyïndə̂ nyê tə̂ gbölösə̂nə̈.

⁴ Më zä su mê gbɛ̂ pâ nyê, më bhï gogo mê pâ nyê, su mê zɨ̈ tə̂ gbölösə̂nə̈. Su mê wä la mômô tə̂ gbölösə̂nə̈ lə̂ köbosə̂ nyê lə̂ arə yûkü gbɛ̂ ndə̂ azə̈ wûn rə̂.

⁵ Tə̂ lëge nə̈, ndə̂ ârâ wûtu bhâ Mäsëdöâne, ârâ gbôâbo köbo ndə̂kə̂ yatə̂ ârâ-a, praâbalë ârâ gbö agbôgbô arə yûkü gbɛ̂. Azü pö la ârâ, su ârâ wâ la wawa.

⁶ Praâbalë Ndjapä ndə̂ tche za gbôgbô tə̂ su azü ndə̂ âmomo gbɛ̂, tche mbö rə̂ pä su ârâ wâ la gbôgbô lə̂ köbosə̂ Tîte ndə̂ tche nə̂.

⁷ Âdə̂âbo kütû bëte kə̂ nə ndə̂ yê-a, praâbalë äwä ndjë bëte rə̂ ndə̂ nyë mbô rə̂ pä tche gbo gbôgbô tə̂ su yê. Tche tö rə̂ sə̈ ârâ pä nyë kä la gʉ tə̂ gbölösə̂nə̈ ndə̂kə̂ wun mê, lakə̂ kɨ tə̂ mê ndjë la gʉ ndə̂kə̂ to pö lə̂ kpâlâ mê. Ndə̂ më âsə̈ dje rə̂, su mê wâ la mômô tə̂ gbölösə̂nə̈.

⁸ Tə̂ lëge nə̈, më zä nyonyo tə̂ su nyê lə̂ köbosə̂ mbëtï ndə̂ më wân rə̂ sə̈ nyê, praâbalë më wûn-âbo rə̂ tə̂ ngbongbo nə̈-a. Më wün rə̂ tə̂ ngbongbo nə̈ alême sə̂nə̈ ndə̂ më wûnsə̂ nə̈ pä äzä nyonyo tə̂ su nyê ndə̂ kpîɛ̂kpîɛ̂ lö.

⁹ Angaâtə su mê zɨ̂ nə̂, âdə̂âbo bëte nyonyo ndə̂ nyê-a, praâbalë bëte nyonyo nə̈ mbö rə̂ pä nyë gbotə̂ bəndɨ kə̂ mbo rə ndə̂ nyê. Ndjapä nyïndə̂ nyonyo ndə̂ nyê nə̈ lâme, bëte ârâ mbôâbo ngbongbo rə balë tə̂ nyê-a.

¹⁰ Nyonyo ndə̂ Ndjapä nyîndə̂ nə̈ mbö rə̂ pä akrə gbotə̂ bəndɨ kə̂ mbo rə ndə̂ yê ânyë kə̂ tcha lə̂ kuzü. Ngoa nyonyo käko wâbo ndə̂kə̂ mbo rə̂ pä su akrə kʉ tchë tâ-a. Praâbalë nyonyo ndə̂ âmbo rə̂ pä akrə gboabô gbôtə̂ bəndɨ köbo kə̂ mbo rə ndə̂ yê-ê, kä ndə̂ tche gbo kuzü ngbânə̈.

¹¹ Nyë wünsa arə nyonyo ndə̂ âgbô nyê ndə̂ Ndjapä nyîndə̂ nə̈ lâme, rə ndə̂ âmbô rə̂ kä âtə: Nyë wä la gʉ ndə̂kə̂ mbo kua wândâ wändä, nyë wünsə̂ kə̂ to pö djîrə̂ pâ apö ndə̂ a yî rə̂ lə̂ küma nyê, âdə azü âmbo ngbongbo rə, tchə̂lə̂ nyê kʉ nyê tâ, nyë kä la wawa lə̂ su nyê, nyë kä la gʉ ndə̂kə̂ kä wun mê, nyë wä la gʉ ndə̂kə̂ mbo adjîrə̂ kua, nyë wä ngbanga lə̂ küma azü ndə̂ andjë mbô ngbongbo rə. Lə̂ arə lâme gbɛ̂, nyë nyïsə̂ nə̈ pä pö wâbo lə̂ küma nyê-a.

¹² Âdə̂âbo tə̂ pö ndə̂ akrə ndə̂ tche mbô ngbongbo rə tə̂ ngâ yê, âdəndjë tchanə̈ ndə̂ ngâ yê mbô ngbongbo rə tə̂ yê, kä ndə̂ më mbô mbëtï âtə sə̈ nyê-a, praâbalë më mbö rə̂ ndə̂kə̂ nyisə̂ nə̈ lə̂ la Ndjapä pä nyë də̈ azü ndə̂ nyê wun köbo ârâ gagasa-ë.

¹³ Rə nə̈ lâme kä ndə̂ âmbô rə̂ ânyë su ârâ zɨ̂. Dəkêlê nə̈, su ârâ wä la mômô tə̂ gbölösə̂nə̈ bëte mômô ndə̂ nyë mbô rə̂ pä Tîte wa la rə̂ ânyë su yê zɨ̂ lâme.

¹⁴ Sə̂nə̈ ndə̂ më bhî gogo mê lə̂ la yê lə̂ köbosə̂ nyê, ganô mbôâbo mê-a. Praâbalë ndə̂ ârâ to tchê lëge pö sə̈ nyê logbɛ̂ lâme, äwä ndjë batə̂ kə̂ bhi gogo ârâ, ndə̂ ârâ bhî rə̂ pâ nyê lə̂ la Tîte lâme, âmbôtə̂ yê nə̂ tə̂ lëge nə̈.

¹⁵ Tche rɨ̈ tchə̂lə̂ yê tə̂ rə ndə̂ nyë djê ma yê, la rə̂ ndə̂ nyë zâ tchë bhândə̂ nyê la mômô lakə̂ kpe wa yê.

¹⁶ Su mê wä la mômô bëte më wä ndə̂kə̂ za su mê pâ nyê lə̂ arə gbɛ̂.