Bïchuû Körɛ̂nte 5 - Mbëtï Ndjapä: TÄFO MADƗ̈

¹ Ârâ wünsə̂ nə̈ tə̂ lëge nə̈ pä pâ cho âtə, tə̂ azə̂ ndə̂ akrə kʉ̂tə̂ yê la ndokʉ̈ ndə̂ âwâ ndə̂kə̂ ndɨ̂ndɨ̈. Azə̈ kä la ngâ nda bhâ lafô ndə̂ Ndjapä mbô rə̂ ndə̂ âwâ logbɛ̂ ndə̂ âdə̂âbo könô azü kä ndə̂ âmbô rə̂-a.

² Azə̈ sə̈ lakə̂ kɨ kɨ̈ kuzü lə̂ ndokʉ̈ lâme angêta, bëte azə̈ nyïndə̂ nə̈ tə̂ gbölösə̂nə̈ ndə̂kə̂ li lə̂ ndokʉ̈ ndə̂ azə̂ ndə̂ âwâ bhâ lafô.

³ Bëte gbölö rə nə̈ wä ndə̂kə̂ pa azə̈ li tchâtchâ ndokʉ̈ nə̈ ânyë kə̂ səabô sə̂ ndjîngä ësûwu-ê.

⁴ Bëte azəzə̂ ndə̂ azə̈ ndə̂po tchâtchâ ndokʉ̈ lâme, azə̈ sə̈ lakə̂ kɨ kɨ̈ kuzü tchâtchâ kʉ̂ngbô ndə̂ âlû. Azə̈ nyîâbo ndə̂kə̂ gbotə̂ tə̂ azə̂ ndə̂ akrə lâme-a, praâbalë azə̈ nyïndə̂ kə̂ li tchâtchâ ndokʉ̈ ndə̂ âwâ bhâ lafô, ânyë tchîsûwu ndə̂ azə̂ mera rə ndə̂ âwâ ndə̂kə̂ tchu lâme.

⁵ Ndjapä kä ndə̂ âmbô azə̂ bëte tchîsûwu nə̈ lâme, tche zä ndjë Yingö ndə̂ yê sə̈ azə̂ ndə̂kə̂ nyisə̂ nə̈ pä atchôtchô arə ndə̂ tche bâta rə̂ pra azə̂, azə̂ gboadje rə̂.

⁶ Käko su azə̂ wä la gbôgbô logbɛ̂, bëte azə̈ wünsə̂ nə̈ pä, ndə̂ gbô azə̂ ndə̂po lə̂ tə̂ azə̂ ndə̂ akrə âtə, azə̈ sə̈ ngrɨ̈ tə̂ Gbölö Gbïɛ̈.

⁷ Azə̈ sə̈ lakə̂ nə lə̂ tchîsûwu âtə lə̂ köbosə̂ kə̂ za su azə̂ sə̈ Ndjapä, âdə̂âbo bëte rə ndə̂ azə̈ wun rə̂-a.

⁸ Azə̈ wä la gbôgbô tə̂ gbölösə̂nə̈ tə̂ su azə̂ bëte azə̈ nyïndə̂ kə̂ gbo lə̂ tə̂ azə̂ âtə kə̂ e ndə̂kə̂ sə bhâ ndrotə̂ Gbölö Gbïɛ̈.

⁹ Rə ndə̂ azə̈ nyîndə̂ nə̈ wä ndə̂kə̂ pa kə̂ sə ndə̂ azə̂ daka tchâtchu yê, ndə̂ gbô azə̂ ndə̂po lə̂ tə̂ azə̂ lâme âdəndjë rə̂ ndə̂ azə̈ wûtu lə̂nə̈.

¹⁰ Bëte azə̂ gbɛ̂ wutuadje tchâtchu ngbanga ndə̂ Krîsiti ndə̂kə̂ pa akrə balë balë gbo rə ngbâ rə ndə̂ tche mbô rə̂ sə̂nə̈ ndə̂ tche sə̂ la tʉ̈rʉ̂ la yê pâ cho âtə, atchôtchô nə̈ âdəndjë angbongbo nə̈.

Krîsiti nyïkrə tchôtchô kə̂ sə lə̂ gbâtə̂ azə̂ la Ndjapä

¹¹ Ndə̂ azə̈ wûnsə̂ köbo ndə̂kə̂ kpe wa Gbölö Gbïɛ̈ lâme, bëte rə̂ kä ndə̂ azə̈ sə̂ lakə̂ pu köbo ndə̂kə̂ mbo rə̂ gbɛ̂ pä azü gamba pö ndə̂ yê. Ndjapä wünsə̂ azə̂ djîrə̂, më wün ndjë sə̂nə̈ pä bhâlə̂ kə̂ rɨ tchə̂lə̂ su nyê, nyë wün ndjë sə̂ mê djîrə̂ nə̂.

¹² Ârâ kä nyîâbo ndə̂kə̂ to pö pâ ârâ la tə̂ ârâ sə̈ nyê-a, praâbalë ârâ nyïndə̂ kə̂ za köbo sə̈ nyê ndə̂kə̂ pa tə̂ nyê kra tə̂ pö ndə̂ ârâ. Käko nyê gboadje pö ndə̂kə̂ to rə̂ sə̈ azü ndə̂ tə̂ andjê kra bëte rə ndə̂ la akrə wun rə̂, âdə̂âbo rə ndə̂ âwâ bhâlə̂ su akrə-a.

¹³ Âdə ârâ âwun-abô sə̂ rə wûn-î, ârâ wä käko bëte Ndjapä. Âdə ârâ âwunsə̂ rə, ârâ wünsə̂ nə̈ bëte nyê.

¹⁴ Krîsiti nyïndə̂ azə̈ ârô masə̂nə̈, azəzə̂ ndə̂ azə̈ wûnsə̂ nə̈ pä akrə balë kä ndə̂ âtchû bëte azü gbɛ̂, käko azü gbɛ̂ âtchu ndjë balë la tchë.

¹⁵ Tche tchü bëte azü gbɛ̂ ndə̂kə̂ pa azü ndə̂ andjë wâ la tʉ̂rʉ la andjê wa bata wâ la tʉ̈rʉ̂ la andjê bëte andjê la tə̂ andjê, praâbalë andjë wä la tʉ̈rʉ̂ la andjê bëte tchanə̈ ndə̂ tche tchû ânyë kə̈ jô lə̂ kuzü bëte andjê.

¹⁶ Bëte rə̂ kä angaâtə, ârâ kä wâbo ndə̂kə̂ ka wun ngâ akrə lə̂ la ârâ batə̂ kə̂ wun tchô ndə̂ akrə-a. Âdə rə̂ ndə̂ ârâ wûn Krîsiti alêe batə̂ kə̂ wun tchô ndə̂ akrə, angaâtə ârâ kä wun bata tchë käko tee-a.

¹⁷ Âdə ngâ akrə âwa balë la Krîsiti, tche wâ nə̂ tə̂ täfo akrə. Abəndɨ rə rô nə̂, täfo rə kä âkə̈ wâ tâ.

¹⁸ Arə lâme gbɛ̂ tö bhândə̂ Ndjapä ndə̂ tche mbô rə̂ pä tchôtchô kə̂ sə wa lə̂ gbâtə̂ azə̂ la Krîsiti. Tche zä kua nə̈ lâme sə̈ azə̂ ndə̂kə̂ mbo rə̂ pä tchôtchô kə̂ sə wa lə̂ gbâtə̂ azü.

¹⁹ Bëte lə̂ köbosə̂ Krîsiti kä ndə̂ Ndjapä mbô rə̂ pä tchôtchô kə̂ sə wa lə̂ gbâtə̂ azü la Krîsiti. Tche gbäsə̂ ngbongbo rə ndə̂ azü, ânyë kə̈ zä pö ndə̂ tchôtchô kə̂ sə lə̂ gbâtə̂ azü la tchë ëlə̂ ma ârâ ndə̂kə̂ mu rə̂.

²⁰ Ârâ tö pö pâ cho âtə la rə̈ Krîsiti. Ndjapä la tə̂ yê kä ndə̂ âê nyê lə̂ köbosə̂ ârâ, ârâ yükû nə̈ sə̈ nyê la nyonyo, la rə̈ Krîsiti, nyë gämba rə̂ ndə̂kə̂ pa tchôtchô kə̂ sə ka wâ lə̂ gbâtə̂ nyê la Ndjapä.

²¹ Krîsiti ndə̂ tche wûn-âbô sə̂ ngbongbo rə wûn-î, Ndjapä mbô rə̂ pä ngbongbo rə ndə̂ azə̂ te pâ yê. Käko lə̂ köbosə̂ Krîsiti, azə̈ wätə̂ adjîrə̂ azü lə̂ la Ndjapä.