Bïchuû Körɛ̂nte 4 - Mbëtï Ndjapä: TÄFO MADƗ̈

Tchôtchô rə ndə̂ Yingö lə̂ alüsû

¹ Ndjapä, lə̂ köbosə̂ kə̂ wun nyonyo ârâ kä ndə̂ tche zâ kua lâme sə̈ ârâ, käko ârâ wâbô ndə̂kə̂ mo-a.

² Ârâ kôsə̂ arə tchâkabû la arə ganô ndə̂ azü mbo rə̂ lə̂ küwû nə̈ nə̂. Ârâ mbôâbo rə ndə̂kə̂ bolo azü-a, kə̈ ndrɨ̂ndrɨabô tchə̂lə̂ pö Ndjapä-a. Praâbalë ârâ mü lëge pö sə̈ azü, käko kä ndə̂, lə̂ la Ndjapä kə̂ rɨ tchə̂lə̂ su azü nə̈ gbɛ̂ wa pâ ârâ.

³ Âdə Tchôtchô Pö ndə̂ ârâ mû rə̂ âwa tchâkabû, äwä tchâkabû bëte azü ndə̂ köbo andjê yû.

⁴ Andə̂ andjanə̈ ndə̂ andjë kôsə̂ kə̂ za su andjê sə̈ Ndjapä, ndjapä ndə̂ tchêbêche gʉ̈ä kə̂ wunsə̂ rə ndə̂ andjê, ndə̂kə̂ pa andjë wun-abô ngbänga Tchôtchô Pö ndə̂ Krîsiti wûn-î, ndə̂ âdə̂ nyîsɨ̂ Ndjapä.

⁵ Bëte pö ndə̂ ârâ mu rə̂, ârâ mûâbo pö pâ ârâ la tə̂ ârâ-a, praâbalë Jezü Krîsiti Gbölö Gbïɛ̈ kä ndə̂ ârâ mu pö ndə̂ yê. Ârâ nyïsə̂ nə̈ sə̈ nyê pä ârâ də̈ a-earə̂ kua ndə̂ nyê bëte Jezü.

⁶ Ndjapä tö rə̂ päkëdə̂: «Äwäpä ngbänga tcho lə̂ bübü tchô.» Tchetchë la tə̂ yê kä âkə̂ tcho bhâlə̂ su azə̂ ndə̂kə̂ pa la azə̂ vro ânyë azə̈ wunsə̂ ngbänga ndə̂ yê ndə̂ âtcho pâ la Krîsiti.

⁷ Praâbalë atchôtchô arə lâme, ârâ kʉ̈ rə̂ lə̂ alüsû ndə̂kə̂ pa azü wunsə̂ nə̈ pä gbölö gbôgbô lâme tö bhândə̂ Ndjapä, âtôâbo bhândə̂ ârâ-a.

⁸ Arə yûkü ndöpro ârâ, praâbalë ânûnuabô ârâ-a. Köbo mïɛ tə̂ ârâ, praâbalë ârâ rô-ê.

⁹ Azü mbö arə gbôgbô tə̂ ârâ, praâbalë Ndjapä gbôâbo tə̂ ârâ-a. Andjë göä ârâ bêche, praâbalë andjë wôn-âbo ârâ-a.

¹⁰ Logbɛ̂ gbô kuzü Jezü kä lə̂ tə̂ ârâ, käko azü wün tchîsûwu ndə̂ yê ndə̂ âmbo arə lə̂ ârâ.

¹¹ Logbɛ̂ azə̈ ndə̂ azə̈ wâ la tchîsûwu, azə̈ wä ndə̂kə̂ tchu bëte Jezü ndə̂kə̂ pä tchîsûwu ndə̂ Jezü mbo ndjë kua lə̂ tə̂ azə̂ ndə̂ akrə ndə̂ âwâ ndə̂kə̂ tchu.

¹² Lə̂ köbosə̂ nə̈ kä ndə̂ kuzü sə̂ lakə̂ mbo kua lə̂ tə̂ ârâ, praâbalë andə̂ nye nə̈, tchîsûwu kä ndə̂ âmbo kua lə̂ nyê.

¹³ Batə̂ rə̂ ndə̂ azə̈ zâ su azə̂ sə̈ Ndjapä gundə̂sə̂ pö lə̂ mbëtï ndə̂ yê päkëdə̂: «Më zâ su mê sə̈ Ndjapä nə̂, bëte rə̂ kä ndə̂ mê to pö.» Azəzə̂ ndjë, azə̈ gämba pö nə̈, bëte rə̂ kä ndə̂ azə̈ to pö.

¹⁴ Tə̂ lëge nə̈, azə̈ wûnsə̂ nə̈ nə̂ pä Ndjapä ndə̂ tche jô Gbölö Gbïɛ̈ Jezü lə̂ kuzü, tchê joadje ndjë azə̂ balë la Jezü, kə̂ mboadje rə̂ pä ârâ la nyê wutu tchâtchu yê.

¹⁵ Bëte arə lâme gbɛ̂ wütu lə̂ köbosə̂ nyê, ndə̂kə̂ pa tchôtchô su ndə̂ Ndjapä za tchô gbɛ̂, ânyë angbängbä azü za ayîabâ sə̈ tchë lakə̂ voga tchë.

Kə̂ sə lakə̂ za su sə̈ Ndjapä

¹⁶ Bëte rə̂ kä ndə̂, âwâbo pä su azə̈ mo-a, âdə tə̂ azə̂ ndə̂ akrə ândɨ, tə̂ akrə dələ̂nə̈ âwa la gbôgbô ndə̂ lö balë balë.

¹⁷ Nyonyo ndə̂ azə̈ wun rə̂ angêta wä ndə̂ angâ alö ndə̂kə̂ pa änyikrə azə̂ bëte golowäre ndə̂ âwâ logbɛ̂ logbɛ̂, ndə̂ ârô masə̂nə̈.

¹⁸ Rə ndə̂ azə̈ krʉ̂ bëte rə̂ də̂âbo rə ndə̂ akrə wun rə̂-a, praâbalë rə ndə̂ akrə wun rə̂ rôrö, ânyë rə ndə̂ akrə wûn-âbô rə̂ wûn äwä ndə̂ logbɛ̂ logbɛ̂.