Bïchuû Körɛ̂nte 3 - Mbëtï Ndjapä: TÄFO MADƗ̈

A-earə̂ kua lə̂ täfo madɨ̈

¹ Ârâ kä səadje lakə̂ to pö ndə̂ ârâ la tə̂ ârâ? Âdəndjë rə̂ ârâ kʉ̈ ambëtï ndə̂ âtô atchôtchô pö ndə̂ ârâ lə̂nə̈ sə̈ nyê batə̂ rə̂ ndə̂ angâ azü sə̂ lakə̂ mbo rə̂ lâme? Ârâ kʉ̈ ambëtï nə̈ ndə̂kə̂ e la rə̂ sə̈ nyê, âdəndjë rə̂ ârâ kʉ̈ rə̂ tchânə̂ nyê?

² Nyënyê kä ndə̂ âwâtə̂ mbëtï ndə̂ ârâ, ndə̂ a mbô rə̂ bhâlə̂ su ârâ, ndə̂ azü gbɛ̂ wûnsə̂ nə̈ ânyë kə̂ dɨ rə̂.

³ Tə̂ lëge nə̈, nyë wä batə̂ mbëtï ndə̂ Krîsiti mbô rə̂ ânyë ârâ ê la rə̂ sə̈ azü. A mbôâbo rə̂ la ngû ndə̂ a mbo rə̂ la mbëtï-a, praâbalë a mbö rə̂ lə̂ köbosə̂ Yingö ndə̂ Ndjapä ndə̂ tche wâ la tʉ̈rʉ̂ la yê âdə̂âbo pâ täme-a, praâbalë a mbö rə̂ bhâlə̂ su azü.

⁴ Ârâ tö pö lâme käko, bëte ârâ zä su ârâ gbɛ̂ pâ Ndjapä lə̂ köbosə̂ Krîsiti.

⁵ Ârâ wâbo ndə̂kə̂ wuntə̂ ârâ la tə̂ ârâ pä ârâ wä la gbôgbô ndə̂kə̂ mbo ngâ rə-a, praâbalë ârâ mbö kua la gbôgbô ndə̂ âtô bhândə̂ Ndjapä.

⁶ Tchetchë kä ndə̂ âmbô rə̂ pä ârâ wa la gbôgbô ndə̂kə̂ watə̂ a-earə̂ kua lə̂ täfo madɨ̈ ndə̂ a mbôâbô rə̂ mbô lə̂ mbëtï-ndïɛ̈, praâbalë lə̂ köbosə̂ Yingö. Bëte Mbëtï-ndïɛ̈ wön tchô, ânyë Yingö e la akrə ndə̂kə̂ pa tche gbo tchîsûwu.

⁷ A mbö apö lə̂ Mbëtï-ndïɛ̈ pâ täme sə̈ azü, ânyë golowäre tâ pânə̈ tə̂ lo nə̈ lâme. Kə̂ ta ndə̂ golowäre nə̈ lâme mbö rə̂ ânyë azü ndə̂ Isarayële wâbo ndə̂kə̂ wun tchâtchu Möyîze-a, dëkë golowäre nə̈ wä ndə̂ kpîɛ̂kpîɛ̂ lö tchâtchu yê.

⁸ Kua ndə̂ Yingö mbo rə̂ wadje gbölö tə̂ gbölösə̂nə̈ kə̂ ro andə̂ ndïɛ̈.

⁹ Âdə kua ndə̂ ndïɛ̈ ndə̂ âwa ngbanga lə̂ küma azü âwa gbölö, dëkë kua ndə̂ Yingö mbo rə̂ pä azü watə̂ adjîrə̂ azü lə̂ la Ndjapä, âwa gbölö kə̂ ro masə̂nə̈.

¹⁰ Golowäre ndə̂ âtcho dokʉ̈tchê wätə̂ ngâ mbämbä rə tchâtchu golowäre ndə̂ tchô angêta, bëte ärö anə̈ dokʉ̈tchê tə̂ gbölösə̂nə̈.

¹¹ Bëte âdə rə ndə̂ âwâ ndə̂kə̂ ro âwa gbölö, dëkë rə ndə̂ âwâ logbɛ̂ âwa gbölö kə̂ ro masə̂nə̈.

¹² Batə̂ azə̈ zâ su azə̂ gbɛ̂ ndə̂kə̂ krʉ bëte arə käko, wawa ngâ rə balë mbôâbo azə̂-a.

¹³ Azə̈ mbôâbo rə batə̂ Möyîze ndə̂ tche gʉ̂â tchâtchu yê la kʉ̈kʉ̂-lə̂ba ânyë azü ndə̂ Isarayële wûn-âbô golowäre nə̈ wûn lâme-ê, ndə̂ âwâ kütû ndə̂ kpîɛ̂kpîɛ̂ lö.

¹⁴ Praâbalë kə̂ wunsə̂ rə ndə̂ andjê wâbo tâ-a. Bëte rə̂ kä, ndə̂kə̂ to tə̂ lö nə̈ lâme ndjoa ëtə̂ tchô angêta, âdə andjê âsə dɨ bəndɨ mbëtï madɨ̈ lâme, gbô kʉ̈kʉ̂-lə̂ba nə̈ kä po tə̂ la andjê, andjë jîâbo rə̂ dämba-a, bëte akrə âwa balë la Krîsiti ânyë lə̂ba nə̈ ji tə̂ la yê.

¹⁵ Ndə̂kə̂ to tə̂ lo nə̈ lâme ndjoa ëtə̂ tchô angêta, ndə̂ andjê âsə̈ dɨ Mbëtï-ndïɛ̈ ndə̂ Möyîze, kʉ̈kʉ̂-lə̂ba nə̈ gʉ̈ä su andjê.

¹⁶ Praâbalë âdə akrə âgbotə̂ bəndɨ köbo yê kə̂ ka pu Gbölö Gbïɛ̈, a ji kʉ̈kʉ̂-lə̂ba nə̈-ê.

¹⁷ Bëte Gbölö Gbïɛ̈ də̈ Yingö, ânyë sə̂nə̈ ndə̂ Yingö ndə̂ Gbölö Gbïɛ̈ wâ tâ, akrə sə̂âbo tchâtchâ ngbâa-a.

¹⁸ Azə̂ gbɛ̂ ndə̂ a jî lə̂ba tə̂ la azə̂, azü âwun golowäre ndə̂ Gbölö Gbïɛ̈ pâ la azə̂ batə̂ rə̂ ndə̂ akrə wun tchâtchu yê lə̂ wunla. Azə̈ wâ nə̂ ngbî ndə̂kə̂ pa azə̈ kʉtə̂ azə̂ la Gbölö Gbïɛ̈, ânyë golowäre ndə̂ azə̂ sə lakə̂ gêgë lə̂ köbosə̂ Gbölö Gbïɛ̈ ndə̂ tche də̂ Yingö.