Bïchuû Körɛ̂nte 2 - Mbëtï Ndjapä: TÄFO MADƗ̈

¹ Käko më nyïkrə rə̂ tə̂ su mê ndə̂kə̂ kä doabô tə̂ mê dô pu nyê ânyë kə̂ kä zabô nyonyo zâ tə̂ su nyê tə̂ bïchuû nə̈-ê.

² Âdə mê âkä za nyonyo tə̂ su nyê, tchabâ kä ndə̂ âmbo rə̂ pä më wa la mômô? Dëkë nyënyê kä âkə̈ wâ ndə̂kə̂ za mômô tə̂ su mê.

³ Dju mbëtï ndə̂ më wân rə̂ sə̈ nyê lâme kä. Më nyîâbo ndə̂kə̂ za nyonyo tə̂ su azü ndə̂ andjë wâ ndə̂kə̂ mbo rə̂ pä më wa la mômô-a. Më wünsə̂ nə̈ tə̂ su mê lə̂ köbosə̂ nyê pä, mômô ndə̂ âwâtə̂ su mê lâme wä ndjë tə̂ su nyê gbɛ̂

⁴ Tə̂ lëge nə̈, më wän mbëtï sə̈ nyê la nyonyo tə̂ su mê, la ngûla, âdə̂âbo ndə̂kə̂ za nyonyo tə̂ su nyê-a, praâbalë ndə̂kə̂ pa nyë wunsə̂ nə̈ pä më nyïndə̂ nyê tə̂ gbölösə̂nə̈.

Kə̂ ko pö lə̂ küma earə̂ ngbongbo rə

⁵ Âdə ngâ akrə âza nyonyo tə̂ su ngâ yê, âdə̂âbô mëmê kä ndə̂ tche mbô rə̂ tə̂ mê-a, praâbalë tche mbö rə̂ tə̂ nyê gbɛ̂. Më wâbo la ngbängbä pö ndə̂kə̂ to rə̂ pânə̈-a, tche zä nyonyo lâme tə̂ su nyê gbɛ̂.

⁶ Ngoa köchë käko lâme, ngbanga ndə̂ angbängbä azü wâ rə̂ lə̂ küma yê lâme, äwä käko.

⁷ Bëte rə̂ kä, äwäpä nyë ko pö lə̂ küma yê, kə̂ mbo rə̂ pä tche gbo gbôgbô tə̂ su yê, ânyë nyonyo roabô rôpâ yê.

⁸ Më yü ndjë kû nə̈ sə̈ nyê ndə̂kə̂ pa nyë nyisə̂ nə̈ sə̈ tchë pä nyë nyïndə̂ yê.

⁹ Ndə̂ më wân mbëtï sə̈ nyê, dju nə̈ wä ndjë ndə̂kə̂ pa më wun rə̂ tə̂ lëge nə̈ pä nyë kä lakə̂ mbo rə gundə̂sə̂ apö gbɛ̂ ndə̂ më yûkû nə̈ sə̈ nyê.

¹⁰ Âdə nyê âko pö lə̂ küma ngâ akrə, mëmê ndjë gbɛ̂ më âko pö lə̂ küma yê. Âdə mê âko pö lə̂ küma akrə ndə̂ më gbô köbo ndə̂kə̂ mbo rə̂, më kö pö nə̈ lâme bëte nyê tchâtchu Krîsiti.

¹¹ Më mbö rə̂ käko ndə̂kə̂ pa Satäa boloabô nyê bôlo-ê, bëte azə̈ wûnsə̂ arə ndə̂ tche wâ ndə̂kə̂ mbo rə̂ nə̂.

Su Pôlo wä ngbɨ̂ɨ̂ bhâ Tröwâse

¹² Ndə̂ më âsə̈ wutu bhâ Tröwâse ndə̂kə̂ mu Tchôtchô Pö ndə̂ Krîsiti, më wûnsə̂ nə̈ nə̂ pä Gbölö Gbïɛ̈ jî köbo sə̈ mê nə̂ ndə̂kə̂ mbo kua.

¹³ Gbô su mê kä ngbɨ̂ɨ̂ bëte më gbôâbo ngâ mê Tîte-a. Bëte rə̂ kä ndə̂ më gbôtə̂ azü nə̈, ânyë kə̈ ê atə̂ Mäsëdöâne.

Azə̈ rö la gbôgbô bëte Jezü Krîsiti

¹⁴ Azə̈ zä ayîabâ sə̈ Ndjapä bëte lə̂ köbosə̂ nə̈ ndə̂ azə̈ wâ balë la Krîsiti, tche kʉ̂ azə̂ nə̂ lə̂ mawû azü ndə̂ andjë rô la gbôgbô. Lə̂ köbosə̂ azə̂, tche mbö rə̂ pä azü wunsə̂ Krîsiti katchôgbɛ̂ batə̂ ngâ kâdâ-yömbö ndə̂ tchâfo nə̈ fô katchôgbɛ̂.

¹⁵ Käko azə̈ wä batə̂ ngâ kâdâ-yömbö ndə̂ tchâfo nə̈ fô la köbo nə̈ ânyë Krîsiti wâ rə̂ la ngela sə̈ Ndjapä. Azə̈ wä batə̂ kâdâ-yömbö lâme lə̂ gbâtə̂ azü ndə̂ andjë wâ lə̂ köbo ndə̂kə̂ tcha lə̂ kuzü, ndjë la andjanə̈ ndə̂ köbo yû tə̂ andjê.

¹⁶ Andə̂ andjanə̈ ndə̂ köbo yû tə̂ andjê, tchâfo yömbö nə̈ də̈ tchâfo kuzü ndə̂ âe la andjê pu kuzü. Andə̂ andjanə̈ ndə̂ andjë wâ ndə̂kə̂ gbo tchîsûwu, tchâfo yömbö ndə̂ tchîsûwu kä ndə̂ âe la andjê ndə̂kə̂ gbo tchîsûwu. Praâbalë tchabâ kä ndə̂ âwâ la gbôgbô ndə̂kə̂ mbo rə̂?

¹⁷ Azə̈ wâbo batə̂ angbängbä azü ndə̂ andjë zâ pö Ndjapä batə̂ kə̂ ka rə-a. Azə̈ tö lëge pö ndə̂ âtô bhândə̂ Ndjapä lə̂ la yê, bëte rə̂ ndə̂ azə̈ wâ balë la Krîsiti.