Bïchuû Körɛ̂nte 13 - Mbëtï Ndjapä: TÄFO MADƗ̈

Adɨ̂ wängö lakə̂ po ndə̂ azü

¹ Tə̂ vötaâ nə̈ ndə̂kə̂ pa me e atə̂ndə̂ nyê kä âtə. Batə̂ rə̂ ndə̂ Mbëtï Ndjapä tô rə̂ päkëdə̂: «Lə̂ köbosə̂ pö ma azü bïchuû âdəndjë vötaâ kä ndə̂ a nyikrə apö gbɛ̂ gundə̂sə̂ nə̈.»

² Sə̂nə̈ ndə̂ më ê bhândə̂ nyê tə̂ bïchuû nə̈, më tô pö âtə nə̂. Andə̂ tchô angêta, ndə̂ më sə̂ ngrɨ̈ tə̂ nyê, më âkä to rə̂ sə̈ azü ndə̂ andjë mbô ngbongbo rə dokʉ̈tchê, ndjë la adɨ̂ azü gbɛ̂, âdə mê âkä e atə̂ndə̂ nyê, la mê âdro la nyê.

³ Bëte nyë nyïndə̂ kə̂ wun ngâ rə ndə̂ ânyîsə̂ nə̈ pä Krîsiti kä ndə̂ âto pö lə̂ köbosə̂ mê. Âdə Krîsiti âsə̈ mbo rə tə̂ pö ndə̂ nyê, tche mbôâbo rə̂ la gbôgbô-a, praâbalë tche nyïsə̂ gbôgbô ndə̂ yê lə̂ gbâtə̂ nyê.

⁴ Tə̂ lëge nə̈, a wön tchë pâ yö ndə̂ gba bëte tche wâbo la gbôgbô-a, praâbalë angaâtə tche wä la tchîsûwu lə̂ köbosə̂ gbôgbô ndə̂ Ndjapä. Azə̂ ndjë gbɛ̂, ndə̂ azə̈ wâ la tchë balë, azə̈ wâbo la gbôgbô-a, praâbalë ârâ nyïsə̂ nə̈ sə̈ nyê pä azə̂ wadje la tchîsûwu balë la tchë lə̂ köbosə̂ gbôgbô ndə̂ Ndjapä.

⁵ Nyënyê la tə̂ nyê, nyë wüntə̂ nyê djîrə̂ ânyë, nyë pü köbo ndə̂kə̂ wunsə̂ nə̈ pä gbô nyê kä tə̂ lëge nə̈ lakə̂ za su nyê sə̈ Ndjapä, nyë wûn-âbo sə̂nə̈ pä Jezü Krîsiti kä lə̂ su nyê? Âdə rə nə̈ âwa käko, dëkë änyïsə̂ nə̈ pä kə̂ za su nyê sə̈ Ndjapä wâbo-a.

⁶ Andə̂ ârâ, më wûnsə̂ nə̈ nə̂ pä nyê wun-adje sə̂nə̈ pä ârâ tchâbo köbo-a.

⁷ Ârâ tö pö sə̈ Ndjapä ndə̂kə̂ pa nyë mboabô ngâ ngbongbo rə mbô balë-ê. Ârâ nyîâbo ndə̂kə̂ nyisə̂ nə̈ sə̈ nyê pä ârâ tchâbo köbo nə̂-a, praâbalë ârâ nyïndə̂ kə̂ wun nyê lakə̂ mbo dâkâ, âdəndjë rə̂ ndə̂ azü tô rə̂ pä ârâ tchâ köbo nə̂.

⁸ Bëte ârâ wâbo la gbôgbô ndə̂kə̂ kitə̂ köbo tə̂ lëge pö-a, praâbalë kua ndə̂ ârâ wä ndə̂kə̂ mbo rə̂ pä azü wunsə̂ lëge pö.

⁹ Sə̂nə̈ ndə̂ ârâ wâbô wâ la gbôgbô, ârâ wä la mômô, ânyë nyënyê ndə̂ nye nə̈, nyë wâ la gbôgbô. Rə ndə̂ ârâ to pö sə̈ Ndjapä bëte rə̂ wä ndə̂kə̂ pa nyë mbotə̂ nyê tə̂ azü ndə̂ nyë dâka gbɛ̂.

¹⁰ Bëte rə̂ kä ndə̂ gbô mê sə̂ ngrɨ̈ tə̂ nyê, kə̈ mbô mbëtï âtə ndə̂kə̂ wan rə̂ sə̈ nyê. Käko âdə mê âwutu bhâye, kə̂ hroabô hrô la nyê-ê lə̂ köbosə̂ gbôgbô ndə̂ Gbölö Gbïɛ̈ zâ rə̂ sə̈ mê ndə̂kə̂ mbo rə̂ pä Egilîze ndə̂ nyê kpokpo tə̂ yê, âdə̂âbo ndə̂kə̂ ndɨ rə̂ ndɨ̈-a.

¹¹ Ndə̂kə̂ ka ndə̂ pö nə̈ arə̂mä, nyë wä la mômô! Nyë pu köbo ndə̂kə̂ daka gbɛ̂. Nyë zä wängö lə̂ gbâtə̂ nyê la angâ nyê, nyë djëtə̂ nyê lə̂ gbâtə̂ nyê, kə̂ sə la zɨtɨ su, ânyë Ndjapä ndə̂ tche nyîndə̂ azü, ânyë kə̂ za zɨtɨ su sə̈ andjê, tchê səadje la nyê.

¹² Nyë pö ndə̂ angâ nyê lə̂ gbâtə̂ nyê lakə̂ a ma angâ nyê ndə̂ âdâka gbɛ̂ lə̂ la Ndjapä. Azü ndə̂ Ndjapä gbɛ̂ pô ndə̂ nyê nə̂.

¹³ Äwäpä tchôtchô su ndə̂ Gbölö Gbïɛ̈ Jezü Krîsiti wa pâ nyê! Äwäpä Ndjapä ndə̂ tche nyində̂ azü, mbo rə̂ la nyê! Ânyë Kpɨ̂ki Yingö ndə̂ tche mbô rə̂ pä nyë wa balë, mbo ndjë rə̂ la nyê gbɛ̂.