Bïchuû Körɛ̂nte 12 - Mbëtï Ndjapä: TÄFO MADƗ̈

Gbölö Gbïɛ̈ nyïsə̂ arə sə̈ Pôlo lə̂ lü

¹ Äwäpä më bhi gogo mê? Ngâ tchôtchô rə balë wâbo lə̂nə̈-a. Praâbalë më wä ndə̂kə̂ to pö ndə̂ arə ndə̂ Gbölö Gbïɛ̈ nyîsə̂ nə̈ sə̈ mê lə̂ ngâ rə batə̂ lü, ânyë kə̈ mbô rə̂ pä më wunsə̂ nə̈.

² Më wünsə̂ ngâ akrə ndə̂ Krîsiti, âmbô rə̂ nə̂ ngû lə̂ könô gbɛ̂ tchêpâ nə̈ voanə̈ ndə̂ Ndjapä zâ tchë, kə̈ kênga la tchë bhâlə̂ vötaâ tchêlafô, tche rö la tchë la ndundu tə̂ yê? Më wûn-âbo sə̂nə̈-a, âdəndjë rə̂ tche wütu lə̂nə̈ ânyë Ndjapä rô la tchë? Më wûn-âbo sə̂nə̈-a, Ndjapä balë kä ndə̂ âwûnsə̂ nə̈.

³ Më wünsə̂ nə̈ pä Ndjapä zä köchë lâme kə̈ rô la tchë. Tche zä tchë la ndundu tə̂ yê? Më wûn-âbo sə̂nə̈-a, âdəndjë rə̂ ndə̂ tche wütu lə̂nə̈ ânyë Ndjapä rô la tchë? Më wûn-âbo sə̂nə̈-a, Ndjapä balë kä ndə̂ âwûnsə̂ nə̈.

⁴ Ndjapä zä tchë kə̈ kênga la tchë atə̂ paradï. Bhâye, tche djê angâ apö. Apö nə̈ lâme, kə̂ to rə̂ kâkä tə̂ akrə, ânyë a zâbo köbo sə̈ akrə ndə̂kə̂ kä to tchêndə̂ nə̈-a.

⁵ Mê bhiadje gogo mê tə̂ pö ndə̂ akrə lâme, praâbalë âdə andə̂ me nə̈, mê bhiadje gogo mê tə̂ pö ndə̂nə̈ ndə̂ më wâbô wâ la gbôgbô-ê.

⁶ Âdə mê ânyində̂ kə̂ bhi gogo mê, mê wabô tee batə̂ earə̂ nyî-a, mê âto kütû lëge pö. Praâbalë më nyîâbo ndə̂kə̂ bhi gogo mê-a, ânyë azü wun-abô mê wûn gbölö âropâ rə ndə̂ mê mbo rə̂-a, âdəndjë rə ndə̂ andjë dje rə̂ lə̂ ma mê-a.

⁷ Rə ndə̂ Ndjapä nyîsə̂ nə̈ sə̈ mê wätə̂ rə ndə̂ ârôpâ küma azü. Ndə̂kə̂ pa më bhiabô gogo mê bhî tâ-ê, Ndjapä zä ngâ rə batə̂ chi lə̂ tə̂ mê, chi nə̈ wä batə̂ ngâ akrə ndə̂ Satäa wân tchë ndə̂kə̂ bhi mê, ânyë kə̈ kîtə̂ köbo tə̂ mê ndə̂kə̂ bhiabô gogo mê bhî-î.

⁸ Sûsunə̈ vötaâ më dɨ̂ tchə̂lə̂ ma mê sə̈ Gbölö Gbïɛ̈ ndə̂kə̂ pa tche ji rə̂ tə̂ mê.

⁹ Praâbalë tche tô rə̂ sə̈ mê päkëdə̂: «Tchôtchô su ndə̂ mê bëte mö lâme wä käko. Sə̂nə̈ ndə̂ akrə wâbô wâ la gbôgbô-ê, gbôgbô ndə̂ mê wä ndə̂kə̂ mbo rə gbɛ̂.» Käko mê âbhi gogo mê tə̂ pö ndə̂nə̈ ndə̂ më wâbô wâ la gbôgbô. Käko ânyë gbôgbô ndə̂ Krîsiti wa lə̂ mê.

¹⁰ Bëte rə̂ kä ndə̂ më wâ la mômô sə̂nə̈ ndə̂ më wâbô wâ la gbôgbô, ndjë, sə̂nə̈ ndə̂ azü drô mê, âdəndjë lə̂ agbôgbô arə ndə̂ âpu mê katchôgbɛ̂, âdəndjë rə̂ ndə̂ azü mbo gbôgbô tə̂ mê bëte Krîsiti, ndjë la arə nyonyo. Bëte sə̂nə̈ ndə̂ më wâbô wâ la gbôgbô, dëkë sə̂nə̈ lâme kä ndə̂ më wâ la gbôgbô.

Pôlo dɨ̈ su yê tə̂ azü ndə̂ Körɛ̂nte

¹¹ Më wä batə̂ earə̂ nyî! Nyënyê kä ndə̂ âmbô rə̂ pä më wa käko. Nyënyê âme kä ndə̂ âwâ ndə̂kə̂ to tchôtchô pö pâ mê. Âdə më âwabô wâtə̂ ngâ rə-ê, agbögbölö abadjângele ndə̂ nyê lâme rôâbo mê la ngâ rə balë-a.

¹² Akua ndə̂ ânyîsə̂ nə̈ pä më wätə̂ badjângele mbô lə̂ gbâtə̂ nyê nə̂. Më rʉ̈ätə̂ su mê lə̂ arə gbɛ̂, ânyë lə̂ köbosə̂ kua nə̈, nyë wûn akpɨ̈ngbɨ̈ rə ngbî ngbî, la arə ndə̂ ârôpâ küma azü.

¹³ Giamâ kä ndə̂ angâ a-Egilîze gbô rə̂ ânyë nyë gbôâbô rə̂ gbô-ê? Kütû rə ndə̂ më mbôâbô rə̂ mbô tə̂ nyê də̈ rə̂ ndə̂ më wâbo tə̂ kʉ̂ngbô pâ nyê-a. Âdə nyë âwun rə̂ pä mbə̈lï kä ndə̂ më mbô rə̂ lâme, më zâ da nyê nə̂!

¹⁴ Më nyîkrə tə̂ mê nə̂ ndə̂kə̂ e atə̂ndə̂ nyê tə̂ vötaâ nə̈, më nyîâbo ndə̂kə̂ watə̂ kʉ̂ngbô pâ nyê-a, bëte më pûâbo atchôtchô arə ndə̂ nyê-a, praâbalë nyënyê kä ndə̂ mê pu nyê. Kua ndə̂ abechë də̂âbo rə̂ ndə̂kə̂ pu rə bëte bha la anyï andjê-a, praâbalë bha la anyï andjê kä ndə̂ âpu rə bëte abechë ndə̂ andjê.

¹⁵ Âdə andə̂ me nə̈, më ândɨndɨ arə ndə̂ mê gbɛ̂, kə̂ za ndjë tchîsûwu ndə̂ mê gbɛ̂ bëte nyê. Âdə më ânyində̂ nyê tə̂ gbölösə̂nə̈, käko nyë ânyində̂ mê kpîɛ̂kpîɛ̂ rə̂?

¹⁶ Tə̂ lëge nə̈, më wâbo tə̂ kʉ̂ngbô pâ nyê-a, praâbalë a tö rə̂ pä më də̈ akrə ndə̂ mê bolo azü, bëte rə̂ kä ndə̂ më gbô nyê lə̂ köbosə̂ apö känyï.

¹⁷ Lə̂ gbâtə̂ azü ndə̂ më wân andjê sə̈ nyê bhâye, më mbö rə̂ pä ngânə̈ balë gbo ngâ rə tchânə̂ nyê?

¹⁸ Më tö apö tə̂ gbölösə̂nə̈ sə̈ Tîte ânyë kə̈ wân tchë pu nyê. Tchetchë la ngâ earə̂ azə̂ ndə̂ më tô pö ndə̂ yê sə̈ nyê lâme. Ndə̂ Tîte ê lâme, tche mbö nyê ndə̂kə̂ gbo ngâ rə tchânə̂ nyê? Ârâ la tchë gbɛ̂ su ârâ wâbo balë? Ânyë kə̂ mbo rə ndə̂ ârâ la tchë wâbo nyɛ̂ɛ̂ balë?

¹⁹ Ndə̂nə̈ gû nə̂ ndə̂ nyë wûn rə̂ pä ârâ sə̈ lakə̂ pu köbo ndə̂kə̂ wa djîrə̂ lə̂ la nyê? Ɛ̂n-ɛ̈n! Âdə̂âbo käko-a. Bëte rə̂ ndə̂ ârâ wâ balë la Krîsiti, ârâ tö pö lâme lə̂ la Ndjapä. Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, rə gbɛ̂ ndə̂ më mbô rə̂ lâme, më mbö rə̂ ndə̂kə̂ pa Egilîze ndə̂ nyê kpokpo tə̂ yê.

²⁰ Wawa mbö mê ndə̂kə̂ pa âdə mê âsə̈ wutu bhândə̂ nyê, kə̂ wun kə̂ sə ndə̂ nyê âwa ngbî tə̂ anə̈ ndə̂ su mê nyîndə̂ nə̈, ânyë nyënyê ndjë gbɛ̂, nyê wun kə̂ sə ndə̂ mê âwa ngbî tə̂ anə̈ ndə̂ su nyê nyîndə̂ nə̈. Wawa mbö mê ndə̂kə̂ pa angbongbo arə kâkë wabô wâ lə̂ gbâtə̂ nyê: Kə̂ gama, gbölö su, mêrâ, kə̂ pu köbo ndə̂kə̂ wa batə̂ ngâ yê, kə̂ dro akrə la angbongbo apö, kə̂ to alû, kə̂ bhi gogo, kə̂ mbo angbongbo rə katchôgbɛ̂.

²¹ Wawa mbö ndjë mê ndə̂kə̂ pa âdə mê âkä wutu bhândə̂ nyê, Ndjapä mbo ganô tə̂ mê lə̂ la nyê, ânyë mê sə lakə̂ kɨ tə̂ angbängbä azü lə̂ gbâtə̂ nyê, ndə̂ gbô andjê sə̂ lakə̂ mbo ngbongbo rə batə̂ anə̈ dokʉ̈tchê, ndə̂ andjë gbôâbô gbôtə̂ arə batə̂: Kə̂ wa la kâkpö, kə̂ pu aɛ̈chë âdəndjë aköchë katchôgbɛ̂, la angâ arə ganô.