Bïchuû Körɛ̂nte 11 - Mbëtï Ndjapä: TÄFO MADƗ̈

Pôlo la abadjângele ndə̂ yepa

¹ Më nyïndə̂ nə̈ pä nyë rʉatə̂ su nyê la mê batə̂ ngâ akrə ndə̂ nyî mbo tchë! Tə̂ lëge nə̈ nyë rʉ̈ätə̂ su nyê la mê!

² Më mbö kû tə̂ nyê, kû nə̈ lâme tö bhândə̂ Ndjapä. Më zä bâlâ tə̂ nyê ndə̂kə̂ to nyê sə̈ ngâ köchë balë, tche də̈ Krîsiti. Më nyïndə̂ kə̂ ma nyê tə̂ yê batə̂ ngâ bechë-ɛ̈chë ndə̂ tche wûn-âbô sə̂ aköchë wûn-î.

³ Praâbalë batə̂ rə̂ ndə̂ ɛ̈krʉ̂ ndə̂ tche bôlo Ɛ̂ve la känyï ndə̂ yê alême, wawa mbö mê ndə̂kə̂ pa su nyê ndɨabô ndɨ̂-î, ânyë nyê gboabô gbôtə̂ kə̂ za tchêngbâ Krîsiti ndə̂ nyë zâtə̂ nyê gbɛ̂ sə̈ tchë la grôgrô su lâme-ê.

⁴ Bëte nyë rʉ̈ätə̂ su nyê la azü ndə̂ andjë nə̂ ndə̂kə̂ mu pö sə̈ nyê pâ ngâ Jezü ngbî tə̂ Jezü ndə̂ ârâ mû pö ndə̂ yê sə̈ nyê lâme. Nyë kä ndjë tchêtchêtchê ndə̂kə̂ nyində̂ ngâ yingö ngbî tə̂ Yingö ndə̂ nyë gbô tchë dokʉ̈tchê lâme. Nyë kä ndjë tchêtchêtchê ndə̂kə̂ gamba ngâ tchôtchô pö ngbî tə̂ Tchôtchô Pö ndə̂ nyë djê rə̂ dokʉ̈tchê!

⁵ Âdə andə̂ agbölö abadjângele ndə̂ nyê lâme, më wün rə̂ pä andjë rôâbo mê la ngâ rə-a.

⁶ Âdə më âwun-abô wûnsə̂ kə̂ to pö lə̂ köbo nə̈-ê, praâbalë andə̂ kə̂ wunsə̂ rə, më kä lə̂nə̈. Ârâ nyîsə̂ kə̂ wunsə̂ rə lâme nə̂ kraâ sə̈ nyê lə̂ arə gbɛ̂ ndjë lə̂ akänyï gbɛ̂.

⁷ Ndə̂ më mbôtə̂ mê kpîɛ̂kpîɛ̂ rə̂ lakə̂ mu Tchôtchô Pö ndə̂ Ndjapä sə̈ nyê ämbämbänə̈ ndə̂kə̂ pa nyë watə̂ agbölö azü lâme, dëkë ngbongbo rə kä ndə̂ më mbô rə̂?

⁸ Më gbö makətche-kua tchânə̂ angâ a-Egilîze ngbî, ânyë kə̂ gbo köbo ndə̂kə̂ mbo kua lə̂ gûtə̂ nyê azü ndə̂ Körɛ̂nte.

⁹ Ndə̂ më sə̂ alême lə̂ gbâtə̂ nyê bhâye, âdə mê âwa la gʉ ngâ rə, më yûâbo kû nə̈ tchânə̂ ngâ akrə balë-a. Arə̂mâ ndə̂ andjë tô bhâ Mäsëdöâne ânyë kə̈ nə̂, andjë kʉ̈ arə gbɛ̂ ndə̂ su mê nyîndə̂ nə̈ sə̈ mê. Lə̂ arə lâme gbɛ̂, më kpë wa tə̂ mê ndə̂kə̂ pa më wabô wâtə̂ kʉ̂ngbô pâ nyê-ê, käko më âsə me lakə̂ mbo tâ käko logbɛ̂.

¹⁰ Lə̂ köbosə̂ lëge pö ndə̂ Krîsiti ndə̂ âwâ lə̂ ma mê, më tö rə̂ pä ngâ akrə wâbo ndə̂kə̂ kitə̂ köbo tə̂ mê ndə̂kə̂ pa më bhi gogo mê lə̂ agö gbɛ̂ ndə̂ Akayï-a.

¹¹ Më tö pö lâme käko bëte giamâ? Më tö pö lâme bëte më nyîâbo ndə̂ nyê? Ndjapä wûnsə̂ nə̈ nə̂ pä më nyïndə̂ nyê!

¹² Rə ndə̂ mê mbo rə̂ angêta, mê kä mboadje rə̂, käko âdə angâ azü ânyində̂ kə̂ gbo ngâ rə ndə̂kə̂ krʉ pânə̈ ânyë kə̂ bhi gogo andjê batə̂ ârâ, andjê gboabô rə̂ tee-a!

¹³ Azü nə̈ lâme də̈ abadjângele ndə̂ yepa, andjë də̈ a-earə̂ kua ndə̂ andjë bolo azü, ânyë kə̈ mbôtə̂ andjê batə̂ abadjângele ndə̂ Krîsiti.

¹⁴ Âdə̂âbo ngâ täfo rə-a, bëte Satäa la tə̂ yê dötə̂ yê batə̂ ânje ndə̂ ngbänga.

¹⁵ Käko a-earə̂ kua lâme mbötə̂ andjê batə̂ adjîrə̂ a-earə̂ kua, âdə̂âbo ngâ täfo rə-a. Tchîsûwu ndə̂ andjê âkrʉadje batə̂ kə̂ mbo rə ndə̂ andjê.

Arə yûkü ngbî ngbî ndə̂ Pôlo

¹⁶ Më âkä to rə̂ kâkë: Âwâbo pä ngâ akrə wun mê batə̂ earə̂ nyî-a. Âdəndjë rə̂ ndə̂ nyë wûn mê käko, äwäpä nyë nyində̂ nə̈ ânyë mëmê ndjë gbɛ̂ mê bhi gogo mê kpîɛ̂kpîɛ̂ rə̂.

¹⁷ Pö ndə̂ më wâ ndə̂kə̂ to rə̂ lâme, âdə̂âbo tə̂ su Gbölö Gbïɛ̈ kä-a, praâbalë më sə̈ lakə̂ to pö nə̈ batə̂ earə̂ nyî. Më wünsə̂ nə̈ tə̂ lëge nə̈ pä më kä la ngâ rə ndə̂ më wâ ndə̂kə̂ bhi gogo mê tâ.

¹⁸ Ndə̂ angbängbä azü sə̂ lakə̂ bhi gogo andjê bëte rə ndə̂ âwâtə̂ andə̂ akrə, mëmê ndjë gbɛ̂ më nyïndə̂ kə̂ bhi ndjë gogo mê.

¹⁹ Nyënyê ndə̂ nyë wûnsə̂ rə, nyë rʉ̈ätə̂ su nyê ndə̂kə̂ dje a-earə̂ nyî!

²⁰ Azü kä lakə̂ mbo nyê la ngbâa, azü zɨ̈ rə ndə̂ nyê, kə̂ kʉ arə ndə̂ nyê gbɛ̂, kə̂ talusə̂ nyê, kə̂ rʉa ngälâ nyê, praâbalë nyë rʉ̈ätə̂ su nyê la andjê!

²¹ Ganô mbö mê la pö ndə̂ mê to rə̂ âtə, âwûntî pä ârâ də̈ azü ndə̂ andjë wâbô wâ la gbôgbô-ê! Âdə ngâ akrə âwun rə̂ pä anyë wä ndə̂kə̂ bhi gogo anyê tə̂ pö ndə̂ ngâ rə, mëmê ndjë gbɛ̂ më wä ndə̂kə̂ bhi gogo mê. Më tö pö lâme batə̂ earə̂ nyî.

²² Andjë də̈ ajuîfu? Mëmê ndjë gbɛ̂! Azü gö ndə̂ Isarayële? Mëmê ndjë gbɛ̂! Pâ mawo ndə̂ Abrahâmo? Mëmê ndjë gbɛ̂!

²³ Andjë də̈ earə̂ kua ndə̂ Krîsiti? Käko më rö andjê gbɛ̂, më tö pö lâme batə̂ earə̂ nyî. Më mbö kua kə̈ rô andjê gbɛ̂, më mbö kânga kə̈ rô andjê gbɛ̂, a bhï mê la djapra kə̈ rô andjê gbɛ̂, lə̂ agbôgbô rə ësə̂ kuzü, më rö andjê gbɛ̂.

²⁴ Sûsunə̈ mïndûu ajuîfu bhï mê la djapra tə̂ akrə gbɛ̂ la lə̂ könô gbɛ̂ tchêpâ nə̈ mïndûu manə̈ voanə̈ (39).

²⁵ Sûsunə̈ vötaâ azü ndə̂ Rômo bhï mê la föröngbö, sûsunə̈ balë a nyë mê la täme ndə̂kə̂ pa më tchu-î, sûsunə̈ vötaâ batöo mîndi la mê, sûsunə̈ balë lö balë la tchə̂lə̂ bütchî balë më lô lə̂ dju ngû.

²⁶ Lə̂ angbängbä awrʉ̂ ndə̂ mê, më gbö angbongbo arə lə̂ köbosə̂ ngû ndə̂ âsɨ ânyë kə̂ vo katchôgbɛ̂, angbongbo arə lə̂ köbosə̂ angbongbo azü, angbongbo arə lə̂ köbosə̂ angâ mê ajuîfu, angbongbo arə lə̂ köbosə̂ azü ndə̂ andjë wâbô wâtə̂ ajuîfu, angbongbo arə lə̂ agö, angbongbo arə lə̂ kpaɛ̈gâ, angbongbo arə pâ agbölö ngû ngbro, angbongbo arə lə̂ gûtə̂ angbongbo arə̂mâ.

²⁷ Më mbö agbölö kua, kə̈ wâ la kôngö la tchêngbâ nə̈, lö zâbo la mê-a, gʉ kɨ̈zɨ̂ la ngû nyü mê, tə̂ angâ alö më lö la gʉ, zɨ mbo mê, lə̂ba wâbo tə̂ mê-a.

²⁸ Më wâbo ndə̂kə̂ to pö ndə̂ adɨ̂ nə̈-a. Rə ndə̂ mê rɨ su mê pânə̈ dalobiî də̈ pö ndə̂ a-Egilîze gbɛ̂.

²⁹ Âdə ngâ akrə âwabô wâ la gbôgbô, mëmê ndjë gbɛ̂ më wün ndjë tə̂ mê käko. Âdə a âmbo rə̂ pä ngâ akrə te lə̂ ngbongbo rə, âkʉ mê tə̂ gbölösə̂nə̈.

³⁰ Âdə ârə̂ âwa ndə̂kə̂ pa më bhi gogo mê, më âbhi gogo mê tə̂ pö ndə̂nə̈ ndə̂ më wâbô wâ la gbôgbô-ê.

³¹ Ndjapä Bha Gbölö Gbïɛ̈ Jezü ndə̂ tchôtchô pö wâ pâ yê tə̂ logbɛ̂ logbɛ̂, tche wûnsə̂ nə̈ nə̂ pä më môâbo yepa-a.

³² Sə̂nə̈ ndə̂ më sə̂ bhâ Dämâse, goverenëre ndə̂ tche mbo kua lə̂ kpâlâ Ärëtâse kʉ̂ aturûgu pâ amanda gbadja gö nə̈ ndə̂kə̂ za mê.

³³ Praâbalë a yî mê lə̂ kə̂lê kə̂ jrê mê lə̂ grʉ̈ tə̂ kʉ̂tê gbadja nə̈ ëbêche ânyë më rô tə̂ aturûgu nə̈.