Bïchuû Körɛ̂nte 10 - Mbëtï Ndjapä: TÄFO MADƗ̈

Pôlo tö pö sə̈ azü ndə̂ andjë jende kua ndə̂ yê

¹ Mëmê Pôlo, më yükû ngâ rə tchânə̂ nyê la rə̈ Krîsiti, tchetchë ndə̂ tche mbo rə nyima lakə̂ mbo dâkâ. A tö rə̂ pä âdə më âsə lə̂ gûtə̂ nyê kə̂ watə̂ zɨtɨ akrə, praâbalë âdə mê âsə tə̂ nyê ngrɨ̈, kə̂ mbo rə vrâdjâ vrâdjâ.

² Më yükû nə̈ sə̈ nyê: Nyë mböämbô rə̂ mbô ndə̂kə̂ pa âdə më âwutu bhândə̂ nyê, kə̂ hro la nyê-ê. Bëte më nyïkrə rə̂ tə̂ su mê ndə̂kə̂ hro la azü ndə̂ andjë wûn andə̂ andjë nə̈ pä kə̂ mbo rə ndə̂ ârâ wä batə̂ andə̂ azü ndə̂ tchêbêche âtə.

³ Tə̂ lëge nə̈, ârâ də̈ azü tchêbêche, praâbalë ârâ mbôâbo kʉ̈ʉ̈ batə̂ andə̂ azü tchêbêche-a.

⁴ Arə kʉ̈ʉ̈ ndə̂ ârâ tôâbo tchânə̂ azü tchêbêche âtə-a, praâbalë gbôgbô ndə̂ arə kʉ̈ʉ̈ ndə̂ ârâ tö bhândə̂ Ndjapä, ânyë kə̂ ndrɨndrɨ tchə̂lə̂ agbôgbô gbadja ndə̂ kʉ̈ʉ̈. Ârâ ndɨ̈ tchə̂lə̂ kə̂ za küma ndə̂ azü ndə̂ âwâbô wâ la köbo nə̈-ê.

⁵ Ârâ ndɨ̈ ndjë tchə̂lə̂ küma azü ndə̂ andjë mbotə̂ andjê gbölö lakə̂ kitə̂ köbo tə̂ angâ andjê ndə̂kə̂ wunsə̂ Ndjapä. Ârâ mbö rə̂ pä kə̂ rɨ tchə̂lə̂ andjê watə̂ ngbâa, ânyë andjë mbo rə gundə̂sə̂ ma Krîsiti.

⁶ Âdə nyë âmbo rə gundə̂sə̂ pö ma Krîsiti djîrə̂ nə̂, ârâ âsə tchêtchêtchê ndə̂kə̂ wa ngbanga lə̂ küma azü ndə̂ andjë kôsə̂ pö.

⁷ Nyë sə̈ lakə̂ wun arə batə̂ rə̂ ndə̂ azü wun rə. Âdə ngâ akrə âwunsə̂ nə̈ pä ânyë də̈ akrə ndə̂ Krîsiti, äwäpä tche wunsə̂ nə̈ angêta tratralë pä ârâ ndjë gbɛ̂ ârâ wä ndjë tə̂ azü ndə̂ Krîsiti.

⁸ Ndə̂ më sə̂ lakə̂ bhi gogo mê bëte gbôgbô ndə̂ Gbölö Gbïɛ̈ zâ rə̂ sə̈ ârâ, ganô mbôâbo mê-a. Gbôgbô nə̈ wä ndə̂kə̂ mbo rə̂ pä Egilîze ndə̂ nyê kpokpo tə̂ yê, praâbalë âwâbo ndə̂kə̂ ndɨ rə̂ ndɨ̈-a.

⁹ Më nyîâbo ndə̂nə̈ pä nyë wun mê batə̂ akrə ndə̂ tchê hrali nyê lə̂ köbosə̂ ambëtï ndə̂ mê-a.

¹⁰ Bëte angâ azü tö rə̂ päkëdə̂: «Apö lə̂ ambëtï ndə̂ Pôlo lü, kə̈ kpô tə̂ gbölösə̂nə̈; praâbalë âdə tche âsə lə̂ gûtə̂ azə̂, tche wâbo la gbôgbô-a, ânyë pö lə̂ ma yê wâbo tə̂ ngâ rə balë-a.»

¹¹ Akrə ndə̂ tche tô pö lâme, äwäpä tche wunsə̂ nə̈ pä sə̂nə̈ ndə̂ ârâ sə̂ ngrɨ̈ tə̂ nyê ânyë kə̈ wân mbëtï lâme sə̈ nyê, apö tchə̂lə̂ nə̈ kʉ̈ tchô. Kə̂ mbo rə ndə̂ ârâ wadje ndjë käko sə̂nə̈ ndə̂ ârâ wutuadje lə̂ gûtə̂ nyê bhâye.

¹² Tə̂ lëge nə̈, angâ azü wüntə̂ andjê batə̂ agbölö azü, praâbalë ârâ kʉ̂âbo sə̂kə̂ wa batə̂ andjê-a, âdəndjë ndə̂kə̂ wuntə̂ ârâ batə̂ andjê-a. Lə̂ la andjê, andjë wüntə̂ andjê la tə̂ andjê batə̂ azü ndə̂ sə̂ andjê lû kə̈ rô adɨ̂ azü gbɛ̂, andjë wün kə̂ sə ndə̂ andjê kə̈ tâkpa rə̂ la andə̂ azü gbɛ̂, dëkë küma andjê wâbo lanə̈-a.

¹³ Âdə andə̂ ârâ, ârâ bhîâbo gogo ârâ ârô pânə̈-a, ârâ bhï gogo ârâ nə̈ ëtə̂ masə̂nə̈ ndə̂ Ndjapä nyîsə̂ nə̈ ndə̂kə̂ pä ârâ mbo kua ndə̂ yê tâ ndjoa kə̂ wutu la rə̂ bhândə̂ nyê.

¹⁴ Ârâ mbôâbo kua nə̈ ndə̂kə̂ ro kʉ̂bâ nə̈-a. Âdə ârâ wutuabô wûtu bhândə̂ nyê-ê, dëkë ârâ âmbo rə̂ âro anə̈ ndə̂ ârâ wâ ndə̂kə̂ mbo rə̂. Bëte ârâ də̈ azü ndə̂ ârâ wûtu la Tchôtchô Pö ndə̂ Krîsiti sə̈ nyê dokʉ̈tchê.

¹⁵ Ârâ bhîâbo gogo ârâ ârôpâ nə̈ tə̂ pö ndə̂ kua ndə̂ angâ azü mbô rə̂-a. Praâbalë rə ndə̂ ârâ rɨ̂ su ârâ tâ wä pä âdə kə̂ za su nyê sə̈ Ndjapä âge, ârâ âmbo agbölö kua lə̂ gûtə̂ nyê kütû ëtə̂ manə̈ ndə̂ Ndjapä nyîsə̂ nə̈ sə̈ ârâ.

¹⁶ Pânə̈ ârâ eadje la Tchôtchô Pö lə̂ agö ndə̂ âwâ dəkêlê andə̂ nye nə̈. Ârâ nyîâbo ndə̂kə̂ mbo kua lə̂ tchô ndə̂ angâ azü mbô kua tâ dokʉ̈tchê-a, kə̈ nyîâbo ndjë ndə̂kə̂ bhi gogo ârâ tə̂ pö ndə̂nə̈-a.

¹⁷ Mbëtï Ndjapä tö rə̂ päkëdə̂: «Akrə ndə̂ tche nyîndə̂ kə̂ bhi gogo yê, äwäpä tche bhi gogo yê tə̂ pö ndə̂ rə ndə̂ Gbölö Gbïɛ̈ mbô rə̂.»

¹⁸ Bëte lëge earə̂ kua də̂âbo akrə ndə̂ tche to tchôtchô pö pâ yê la tə̂ yê-a, praâbalë akrə lâme Gbölö Gbïɛ̈ kä ndə̂ âto tchôtchô pö ndə̂ yê.