Bïchuû Körɛ̂nte 1 - Mbëtï Ndjapä: TÄFO MADƗ̈

Kə̂ pö ndə̂ azü

¹ Mëmê Pôlo, më wätə̂ badjângele ndə̂ Jezü Krîsiti lə̂ köbosə̂ nə̈ ndə̂ su Ndjapä nyîndə̂ nə̈. Mëmê la ngâ azə̂ Timotë kä ndə̂ âwân mbëtï âtə. Ârâ wän mbëtï âtə sə̈ Egilîze ndə̂ Ndjapä ndə̂ âwâ lə̂ gö ndə̂ Körɛ̂nte ndjë la azü ndə̂ Ndjapä gbɛ̂ ndə̂ andjë wâ lə̂ agö ndə̂ Akayï gbɛ̂.

² Äfü pä Ndjapä Bha azə̂ la Gbölö Gbïɛ̈ Jezü Krîsiti mbo tchôtchô su tə̂ nyê, kə̂ za zɨtɨ su sə̈ nyê.

Pôlo zä ayîabâ sə̈ Ndjapä

³ Azə̈ vöga Ndjapä ndə̂ tche wâtə̂ Bha Gbölö Gbïɛ̈ ndə̂ azə̂ Jezü Krîsiti, Bha ndə̂ tche wun nyonyo azü, ânyë kə̂ za gbôgbô tə̂ su akrə lə̂ arə gbɛ̂.

⁴ Tche zä gbôgbô tə̂ su azə̂ lə̂ arə yûkü gbɛ̂ ndə̂ âgbô azə̂, käko ânyë lə̂ köbosə̂ gbôgbô ndə̂ tche zâ rə̂ tə̂ su azə̂, azə̈ gbo ndjë köbo ndə̂kə̂ za gbôgbô tə̂ su azü ndə̂ andjë wâ lə̂ arə yûkü balë balë gbɛ̂. Azə̂ âza gbôgbô tə̂ su andjê.

⁵ Batə̂ rə̂ ndə̂ azə̈ wûn yûkü ârô masə̂nə̈ la Krîsiti, Krîsiti zadje ndjë gbôgbô tə̂ su azə̂ âro masə̂nə̈.

⁶ Âdə ârâ âsə̈ wun yûkü, ämbö rə̂ pä nyë gbo gbôgbô tə̂ su nyê, ânyë kə̂ tcha lə̂ kuzü. Âdə ârâ âgbo gbôgbô tə̂ su ârâ, âmboadje rə̂ pä nyë gbo gbôgbô tə̂ su nyê, ânyë nyê rʉatə̂ su nyê lə̂ arə yûkü ndə̂ ârâ wun ndjë rə̂ âtə.

⁷ Ârâ zä su ârâ gbɛ̂ pâ nyê, bëte ârâ wünsə̂ nə̈ pä yûkü ndə̂ ârâ wun rə̂ âtə, nyënyê ndjë gbɛ̂ nyë wün rə̂, ârə̂ kä ndə̂ nyê gboadje gbôgbô tə̂ su nyê batə̂ rə̂ ndə̂ ârâ gbô ndjë gbôgbô tə̂ su ârâ.

⁸ Bëte ârâ nyïndə̂ nə̈ pä nyë wunsə̂ pö pâ yûkü ndə̂ ârâ wun rə̂ lə̂ agö ndə̂ Azï: Arə̂mä, ârâ wün yûkü alême tə̂ gbölösə̂nə̈, yûkü rôpâ gbôgbô ndə̂ ârâ; bhâtə̂ su ârâ, ârâ tö rə̂ pä andə̂ ârâ kâ nə̂.

⁹ Ârâ wün rə̂ pä a wâ ngbanga kuzü lə̂ küma ârâ nə̂. Käko ârâ zâbo su ârâ pâ gbôgbô ndə̂ ârâ la tə̂ ârâ-a, praâbalë ârâ zä su ârâ pâ Ndjapä ndə̂ tche jo azü lə̂ kuzü.

¹⁰ Tchetchë kä ndə̂ âjî ârâ lə̂ kuzü, tchê kä jiadje ârâ. Bëte rə̂ ndə̂ ârâ zâ su arâ pâ yê, tchê kä jiadje ârâ.

¹¹ Nyënyê ndjë gbɛ̂ nyë zä könô sə̈ ârâ lə̂ köbosə̂ kə̂ to pö ndə̂ nyê sə̈ Ndjapä. Käko Ndjapä dje pö ndə̂ angbängbä azü to rə̂ sə̈ tchë bëte ârâ, kə̂ mbo tchôtchô su tə̂ ârâ, ânyë angbängbä azü zadje ayîabâ sə̈ tchë bëte azə̂.

Pôlo kösə̂ kə̂ e atə̂ Körɛ̂nte

¹² Bëte rə ndə̂ tə̂ ârâ krâ lə̂ köbosə̂ nə̈ wä kâkë: Kə̂ rɨ tchə̂lə̂ su ârâ nyïsə̂ nə̈ sə̈ ârâ pä ârâ sə̈ pâ cho âtə la grôgrô su. Ârâ sə̈ ndjë käko lakə̂ mbotə̂ ârâ kpîɛ̂kpîɛ̂ rə̂ lə̂ la nyê, ndjë lə̂ köbosə̂ lëge pö. Âdə̂âbo lə̂ köbosə̂ küma akrə ndə̂ âwâ lanə̈-a, praâbalë lə̂ köbosə̂ tchôtchô su ndə̂ Ndjapä.

¹³ Bëte lə̂ ambëtï gbɛ̂ ndə̂ ârâ wân rə̂ sə̈ nyê, ârâ tôâbo ngâ pö ngbî tə̂ anə̈ ndə̂ nyë dɨ̂ rə̂ ânyë kə̈ djê tchə̂lə̂ nə̈ lâme-a, më wünsə̂ nə̈ pä nyê djeadje tchə̂lə̂ nə̈ djîrə̂.

¹⁴ Batə̂ rə̂ ndə̂ nyë djê tchə̂lə̂ angâ atchâkalâ pö nə̈, tə̂ ârâ kradje lə̂ köbosə̂ nyê, ânyë nyënyê ndjë gbɛ̂, tə̂ nyê kradje lə̂ köbosə̂ ârâ, lö nə̈ ndə̂ Gbölö Gbïɛ̈ ndə̂ azə̂ Jezü kangbâ yê.

¹⁵ Më wûnsə̂ nə̈ tə̂ lëge nə̈ nə̂ pä rə nə̈ âwa käko ânyë më nyîndə̂ kə̂ e dokʉ̈tchê bhândə̂ nyê ndə̂kə̂ pa nyë gbo tchôtchô su ndə̂ Ndjapä sûsunə̈ bïchuû.

¹⁶ Pânə̈ mê to bhândə̂ nyê kə̂ e atə̂ Mäsëdöâne, ânyë la tchêngbâ nə̈ mê to bhâ Mäsëdöâne kə̂ ka pu nyê ndə̂kə̂ pa nyë kʉ rə sə̈ mê bëte wrʉ̂ ndə̂ mê atə̂ Judë.

¹⁷ Ndə̂ më nyîkrə rə̂ käko, më tö rə̂ la pö mô? Âdəndjë rə̂ kə̂ nyikrə rə ndə̂ mê wä batə̂ kə̂ nyikrə rə ndə̂ gʉ su mê, ndə̂kə̂ pa mëmê balë mê to rə̂ pä: «Ɛn-ɛn» la «ɛ̂n-ɛ̈n»?

¹⁸ Lə̂ la Ndjapä, pö ndə̂ ârâ tô rə̂ sə̈ nyê wâbo tə̂ «ɛn-ɛn» la «ɛ̂n-ɛ̈n-a.»

¹⁹ Bëte Jezü Krîsiti Modô ndə̂ Ndjapä ndə̂ ârâ mû pö ndə̂ yê bhândə̂ nyê, mëmê la Silvɛ̈n la Timotë lâme, tche tôâbo rə̂ pä: «Ɛn-ɛn» la «ɛ̂n-ɛ̈n-a», praâbalë, pö ndə̂ yê də̈ kütû «ɛn-ɛn».

²⁰ Bëte lə̂ köbosə̂ yê kä ndə̂ arə gbɛ̂ ndə̂ Ndjapä zâ bâlâ tə̂ pö ndə̂nə̈ watə̂ «ɛn-ɛn». Käko lə̂ köbosə̂ Jezü Krîsiti kä ndə̂ azə̈ to rə̂ pä: «Amin» sə̈ Ndjapä bëte kə̂ lusə̂tə̂ ndə̂ yê.

²¹ Ndjapä kä ndə̂ âmbô rə̂ pä mëmê la nyê gbɛ̂, azə̈ kpokpo tə̂ azə̂ lə̂kə̂ wa balë la Krîsiti, ânyë kə̈ kʉ̂ azə̂ ngbî bëte tchë.

²² Ndjapä mbö ngâ sɨ̂nyî tə̂ azə̂, kə̈ zâ Yingö ndə̂ yê bhâlə̂ su azə̂ ndə̂kə̂ nyisə̂ nə̈ pä atchôtchô arə ndə̂ tche bâta rə̂ pra azə̂, tchê kʉadje rə̂ sə̈ azə̂.

²³ Lə̂ la Ndjapä më tö lëge pö sə̈ nyê, äwäpä më tchu ärö ndə̂kə̂ pa më mo yepa! Më kösə̂ kə̂ e atə̂ Körɛ̂nte bëte më nyîâbo ndə̂kə̂ gi nyonyo sə̈ nyê-a.

²⁴ Ârâ wâbo ndə̂kə̂ za nyê la gbôgbô pâ su nyê ndə̂ nyë zâ rə̂ sə̈ Ndjapä lâme-a, bëte nyë kpôkpo tə̂ nyê lə̂kə̂ za su nyê sə̈ Ndjapä nə̂, praâbalë ârâ nyïndə̂ kə̂ mbo kua balë la nyê ndə̂kə̂ pa nyë wa la mômô.