Bïchuû Jâan 1 - Mbëtï Ndjapä: TÄFO MADƗ̈

Kə̂ po ndə̂ azü

¹ Mëmê Jâan, kpôkpô akrə ndə̂ Egilîze kä ndə̂ âwân mbëtï âtə sə̈ mö ndə̂ Ɛ̈chë la abechë ndə̂ zə̈, ndə̂ Ndjapä dɨ̂ mö, ndə̂ më nyîndə̂ zə̈ tə̂ lëge nə̈ gbɛ̂. Âdə̂âbo mëmê la kütû mê kä ndə̂ ânyîndə̂ nyê-a. Praâbalë azü gbɛ̂ ndə̂ andjë wûnsə̂ lëge pö kä ndə̂ ânyî ndjë ndə̂ nyê.

² Më nyïndə̂ nyê, bëte lëge pö kä lə̂ azə̂, ânyë lëge pö nə̈ wadje lə̂ azə̂ tə̂ logbɛ̂.

³ Äfü pä Ndjapä Bha, la Jezü Krîsiti Modô ndə̂ Bha, mbo tchôtchô su tə̂ azə̂, kə̂ wun nyonyo azə̂, kə̂ za zɨtɨ su sə̂ azə̂, lə̂ köbosə̂ lëge pö lakə̂ nyində̂ ngâ.

Lëge pö lakə̂ nyində̂ ngâ

⁴ Më kä la mômô tə̂ su mê tə̂ gbölösə̂nə̈ ndə̂ më wûn rə̂ pä, angâ abechë ndə̂ zə̈ kä lakə̂ sə lə̂ lëge pö, batə̂ rə̂ ndə̂ Bha azə̂ zâma tə̂ pö ndə̂nə̈ sə̈ azə̂.

⁵ Angaâtə Ɛ̈chë, rə ndə̂ më yükû nə̈ sə̈ mö kä âtə: Azə̈ nyïndə̂ angâ azə̂ lə̂ gbâtə̂ azə̂. Ndïɛ̈ ndə̂ më mbô rə̂ lə̂ mbëtï ânyë kə̈ wân rə̂ sə̈ nyê âtə wâbo tə̂ täfo ndïɛ̈-a, praâbalë ndïɛ̈ nə̈ lâme kä ndə̂ azə̈ djê rə̂ alême lə̂ kêsâ nə̈.

⁶ Kə̂ nyində̂ ngâ wä ndə̂kə̂ pa akrə sə gundə̂sə̂ ndïɛ̈ ndə̂ Ndjapä. Äwätə̂ ngâ ndïɛ̈ ndə̂ nyë djê pö ndə̂nə̈ lə̂ kêsâ nə̈. Äwäpä nyë sə lə̂ köbosə̂ kə̂ nyində̂ ngâ.

⁷ A-earə̂ yepa zâ tchêpâ cho nə̂ gbɛ̂: Andjë kösə̂ nə̈ pä Jezü Krîsiti nə̂âbo atə̂ bêche âtə batə̂ lëge akrə-a. Akrə ndə̂ tche tô pö käko, dëkë tche wätə̂ earə̂ yepa, kə̈ wâ ndjë tə̂ earə̂ kə̂ kosə̂ Krîsiti.

⁸ La nyê gbö tə̂ nyê la tə̂ nyê, ndə̂kə̂ pa kua ndə̂ nyë mbô rə̂, tchêngbâ nə̈ wabô wâ ämbämbänə̈-ê, praâbalë äwäpä nyë gbo rə ngbânə̈ gbɛ̂.

⁹ Akrə balë balë gbɛ̂ ndə̂ tche sə̂âbô sə̂ lə̂kə̂ nyisə̂ rə ndə̂ Krîsiti, ânyë kə̈ wân tâ ngbî, dëkë tche wâbo balë la Ndjapä-a. Akrə ndə̂ tche sə̂ lə̂kə̂ nyisə̂ rə ndə̂ Krîsiti, akrə nə̈ lâme kä balë la Bha azə̂ la Modô ndə̂ yê.

¹⁰ Âdə ngâ akrə ânə bhândə̂ nyê, ânyë kə̈ nyîsə̂ ngâ rə ngbî tə̂ andə̂ Krîsiti, nyë zäbô tchë zâ bhândə̂ nyê, kə̂ poabô ndjë pô ndə̂ yê.

¹¹ Bëte akrə ndə̂ tche pô ndə̂ yê, dëkë andjë ngbô la tchë nə̂ gbɛ̂ lə̂ ngbongbo rə ndə̂ yê.

Adɨ̂ apö

¹² Më kä la pö tə̂ gbölösə̂nə̈ ndə̂kə̂ to rə̂ sə̈ nyê, praâbalë më nyîâbo ndə̂kə̂ mbo rə̂ lə̂ mbëtï-a. Më nyïndə̂ kə̂ e bhândə̂ nyê, kə̂ to pö sə̈ nyê la tə̂ mê, ânyë su azə̂ gbɛ̂ wa la mômô tə̂ gbölösə̂nə̈.

¹³ Abechë ndə̂ nyînə̂ zə̈ ndə̂ Ndjapä dɨ̂ tchë, andjë pô ndə̂ zə̈ nə̂.