Apökälîbïchi 9 - Mbëtï Ndjapä: TÄFO MADƗ̈

¹ Pânə̈, mïndûu ânje nə̈ hrʉ̂ tätälîtä ndə̂ yê. Më wûn ngâ kêkêrə̂ ndə̂ âtô bhâ lafô ânyë kə̈ tê atə̂ bêche. A zâ kûlïɛ̈ manda gbölö kudû ndə̂ tchə̂lə̂ nə̈ bû biî sə̈ kêkêrə̂ nə̈.

² Kêkêrə̂ nə̈ krô manda gbölö kudû ndə̂ tchə̂lə̂ nə̈ bû biî lâme, ngʉ̂wo tô bhâlə̂ nə̈ kə̈ sə̂ lakə̂ wutu; ngʉ̂wo nə̈ kʉ̈tə̂ yê la ngʉ̂wo ndə̂ ngâ gbölö wo, kə̈ mbô rə̂ pä tchêla lo la tchêlafô bû gbɛ̂.

³ Atchükumbâ sə̂ lakə̂ wutu lə̂ ngʉ̂wo nə̈ ânyë kə̈ zâ tchêbêche gbɛ̂. A zä gbôgbô sə̈ atchükumbâ nə̈ batə̂ gbôgbô ndə̂ akpâlâköngö.

⁴ A kösə̂ nə̈ sə̈ andjê ndə̂kə̂ ndɨ abë tchêbêche la akʉ̈kʉ̂ la ayö gbɛ̂, praâbalë andjë wä ndə̂kə̂ mbo ngbongbo rə kütû tə̂ azü ndə̂ a mbôâbô sɨ̂nyî Ndjapä mbô pâ la andjê.

⁵ A zâbo köbo sə̈ atchükumbâ nə̈ ndə̂kə̂ won azü nə̈-a, praâbalë andjë wä ndə̂kə̂ yuku andjê tê gêgêe nə̈ lə̂ nyîpï mïndûu. Andjê âyuku andjê tə̂ gêgêe nə̈ batə̂ rə̂ ndə̂ kpâlâköngö ta akrə ânyë tche wun yûkü.

⁶ Lə̂ anyîpï mïndûu nə̈ lâme, azü âsə me lakə̂ pu köbo kuzü, praâbalë andjê tchuabô tee-a. Azü âyukû nə̈ ndə̂kə̂ tchu, praâbalë kuzü âkpe tə̂ andjê tʉ̂rʉ-ê.

⁷ Atchükumbâ nə̈ kʉ̈tə̂ andjê la ambâlâtâ ndə̂ a nyîkrə andjê tchêtchêtchê bëte kʉ̈ʉ̈. Ngâ rə kä pâ küma andjê ndə̂ âkʉ̂tə̂ yê la kurône ndə̂ a mbô rə̂ la lôlo, ânyë tchâtchu andjê kʉ̂ andə̂ azü.

⁸ Su küma andjê wä batə̂ su küma aɛ̈chë, ânyë jï andjê wâ batə̂ jï abämalä.

⁹ Andjë yü ngâ rə ëtə̂ krʉ andjê ndə̂ âkʉ̂tə̂ yê la lə̂ba ndə̂ wɛ̂n. Sɨ̈kɨ̈ mbrö andjê kɨ̈ batə̂ sɨ̈kɨ̈ pusu-pûsu ndə̂ kʉ̈ʉ̈ ndə̂ angbängbä ambâlâtâ gbɨ rə̂ la rö ndə̂kə̂ e ndə̂ kʉ̈ʉ̈.

¹⁰ Andjë kä la dambâ andjê tâ batə̂ dambâ kpâlâköngö ndə̂ küma nə̈ wâ pêpêtâ-ë. Lə̂ köbosə̂ dambâ andjê lâme kä ndə̂ andjë wâ la gbôgbô ndə̂kə̂ mbo ngbongbo rə tə̂ azü lə̂ nyîpï mïndûu.

¹¹ Gbïɛ̈ ndə̂ atchükumbâ nə̈ də̈ ânje ndə̂ gbölö kudû ndə̂ tchə̂lə̂ nə̈ bû biî lâme. Rə̈ yê la ma heborö wü pä «Abadön», rə̈ yê la ma gerêke wû pä «Apoliön» ndə̂ ânyîndə̂ kə̂ to rə̂ pä «Earə̂ kə̂ ndɨ rə.»

¹² Dokʉ̈ rə nyonyo nə̈ rô nə̂, ânyë angâ arə nyonyo bïchuû âkä nə la tchêngbâ anə̈ lâme.

¹³ Mïndûu manə̈ balë ânje nə̈ hrʉ̂ tätälîtä ndə̂ yê. Më djê tchə̂lə̂ ngâ gɨ̈ ndə̂ âtô dələ̂ angongo tchô voanə̈ ndə̂ gbalâka-ngela ndə̂ a mbô rə̂ la lôlo, ndə̂ âwâ tchâtchu Ndjapä.

¹⁴ Tchə̂lə̂ gɨ̈ nə̈ sə̂ lakə̂ to rə̂ sə̈ mïndûu manə̈ balë ânje ndə̂ tche zâ tätälîtä tchânə̂ yê lâme päkëdə̂: «Amö zu djingîli tə̂ aânje voanə̈ ndə̂ a î andjê ndrotə̂ gbölö ngû ndə̂ Ə̈frâte lâme-ê.»

¹⁵ A zû aânje voanə̈ lâme-ê. Dëkë andjë nyîkrətə̂ andjê nə̂ tchêtchêtchê ndə̂kə̂ krʉ bëte dalo, la tchêdalo, la nyîpï la ngû ndə̂ andjë wâ ndə̂kə̂ won ngâ tchâkalâ azü balë lə̂ gûtə̂ atchâkalâ azü vötaâ.

¹⁶ A nyîsə̂ kə̂ ngba ndə̂ aturûgu ndə̂ andjë kpe la ambâlâtâ sə̈ mê: Andjë wä miliyön ngbangbo bïchuû.

¹⁷ Köbo ndə̂ më wûn ambâlâtâ la azü ndə̂ andjë sə̂ pâ andjê lə̂ lü wä kâkë: Andjë yü lə̂ba ndə̂ wɛ̂n ëtə̂ krʉ andjê ndə̂ âwâ batə̂ wo la ngʉ̂wo ndjë la sûfre. Küma ambâlâtâ nə̈ kʉ̈tə̂ yê la küma bämalä. Wo la sûfre sə̂ lakə̂ wutu lə̂ ma yê.

¹⁸ Ngâ tchâkalâ azü balë lə̂ gûtə̂ atchâkalâ azü vötaâ tchû lə̂ köbosə̂ wo la ngʉ̂wo la sûfre lâme. Arə nə̈ lâme wätə̂ arə nyonyo vötaâ ndə̂ âwutu lə̂ ma ambâlâtâ.

¹⁹ Bëte gbôgbô ndə̂ ambâlâtâ nə̈ wä lə̂ ma andjê ndjë lə̂ dambâ andjê. Dambâ andjê kʉ̈tə̂ yê la ɛ̈krʉ̂. Küma andjê kä tâ, ânyë lə̂ köbosə̂ nə̈ kä ndə̂ andjë won azü.

²⁰ Âdə andə̂ adɨ̂ azü ndə̂ andjë tchûâbô tchû lə̂ köbosə̂ arə nyonyo lâme, andjë gbôâbo tə̂ köbo ndə̂kə̂ voga arə ndə̂ andjë mbô rə̂ la könô andjê-a. Gbô andjê kä lakə̂ voga angbongbo atchozö la angakʉ̈lä ndə̂ a mbô andjê la lôlo la wɛ̂n ndə̂ a mbô rə̂ la makətche la ngbêngbê wɛ̂n la täme ndjë la yö. Angakʉ̈lä lâme wûn-âbo tchô-a, kə̈ djêâbo ndjë pö-a, kə̈ nə̂âbo ndjë-a.

²¹ Azü lâme gbôâbo tə̂kə̂ won azü-a, kə̈ gbôâbo tə̂ köbo yëwä ndə̂ andjê-a, âdəndjë kə̂ pu aɛ̈chë âdəndjë aköchë katchôgbɛ̂ ndə̂ andjê-a, âdəndjë kə̂ zɨ ngbä ndə̂ andjê-a.