Apökälîbïchi 8 - Mbëtï Ndjapä: TÄFO MADƗ̈

Ngbavö Ɛ̈bro-ngbaga ôn mïndûu manə̈ bïchuû mênde nə̈

¹ Ndə̂ Ngbavö Ɛ̈bro-ngbaga ôn mïndûu manə̈ bïchuû mênde nə̈, tchô zɨ̂ tɨɨ bhâ lafô zoo ndola yɛ̈yɛ̈ dalo tə̂ akrə gbɛ̂ la lə̂ könô gbɛ̂.

² Pânə̈ më wûn aânje mïndûu manə̈ bïchuû ndə̂ andjê krʉ̂ tchâtchu Ndjapä, ânyë a kʉ̂ atätälîtä mïndûu manə̈ bïchuû sə̈ andjê.

³ Ngâ ânje ngbî nə̂ kə̈ krʉ̂ ndola gbalâka nə̈, kə̈ zâ ngâ kangûchi ndə̂ a mbô rə̂ la lôlo ëtchânə̂ yê. A kʉ̂ angbängbä ayömbö sə̈ tchë ndə̂kə̂ pa tche ngbo rə̂ la apö ndə̂ azü ndə̂ Ndjapä gbɛ̂ tô rə̂ sə̈ tchë, kə̂ kʉ rə̂ la ngela sə̈ Ndjapä pâ gbalâka-ngela ndə̂ a mbô rə̂ la lôlo, ndə̂ âwâ tchâtchu ngendë-gbïɛ̈.

⁴ Ngʉ̂wo yömbö nə̈, ndjë la apö ndə̂ azü ndə̂ Ndjapä to rə̂ sə̈ tchë lâme ngbôtə̂ yê gbɛ̂ tchânə̂ ânje nə̈ kə̈ kênga atə̂ tchâtchu Ndjapä.

⁵ Ânje nə̈ zâ ɛ̈ lüsû kə̈ tô wo ndə̂ âwâ pâ gbalâka-ngela nə̈ ëlə̂nə̈ âsɨ̂, ânyë kə̈ yî rə̂ atə̂ bêche. Pânə̈ nyïvrö sôâ, a djê tchə̂lə̂ gɨ̈ azü, ngbänga nyïvrö srô, ânyë tchêbêche sə̂ lakə̂ tro.

Aânje hrʉ̈ tätälîtä

⁶ Käko aânje mïndûu manə̈ bïchuû ndə̂ andjë kʉ̂ atätälîtä mïndûu manə̈ bïchuû nyîkrətə̂ andjê ndə̂kə̂ hrʉ rə̂.

⁷ Dokʉ̈ ânje nə̈ hrʉ̂ tätälîtä ndə̂ yê. Votäme la wo ndə̂ ângbôtə̂ yê la jï sə̂ lakə̂ tu atə̂ bêche. Ngâ tchâkalâ cho balë lə̂ gûtə̂ atchâkalâ acho vötaâ jû gbɛ̂, ngâ tchâkalâ ayö balë lə̂ gûtə̂ atchâkalâ ayö vötaâ jû gbɛ̂, ânyë abhiɛbhiɛ bë gbɛ̂ jû-î.

⁸ Bïchuû ânje nə̈ hrʉ̂ tätälîtä ndə̂ yê. Ngâ rə ndə̂ âgê gɛ̂ɛ̂ batə̂ gbölö aga, ndə̂ wo sə̂ lakə̂ ju rə̂, a yî rə̂ atə̂lə̂ gbölö ngû ngbro. Ngâ tchâkalâ gbölö ngû ngbro balë lə̂ gûtə̂ atchâkalâ gbölö ngû ngbro vötaâ dôtə̂ yê tə̂ jï.

⁹ Ngâ tchâkalâ agia balë lə̂ gbölö ngû ngbro lə̂ gûtə̂ atchâkalâ agia vötaâ lə̂ gbölö ngû ngbro tchû gbɛ̂, ânyë ngâ tchâkalâ batöo balë lə̂ gûtə̂ atchâkalâ batöo vötaâ ndɨ̂-î.

¹⁰ Vötaâ ânje nə̈ hrʉ̂ tätälîtä ndə̂ yê. Ngâ gbölö kêkêrə̂ tô bhâ lafô kə̈ tê atə̂ bêche, kə̈ sə̂ lakə̂ ju batə̂ gbölö tïmï wo. Kêkêrə̂ nə̈ të pâ tchâkalâ agbölö ngû balë lə̂ gûtə̂ atchâkalâ gbölö ngû vötaâ, ndjë pâ aküma ngû.

¹¹ (Rə̈ kêkêrə̂ nə̈ wü pä Chüchü rə.) Ngâ tchâkalâ ngû balë lə̂ gûtə̂ atchâkalâ angû vötaâ dôtə̂ yê tə̂ chüchü ngû, ânyë angbängbä azü tchû bëte rə̂ ndə̂ ngû dôtə̂ yê tə̂ chüchü nə̈ lâme.

¹² Voanə̈ ânje nə̈ hrʉ̂ tätälîtä ndə̂ yê. A bhî ngâ tchâkalâ lo balë lə̂ gûtə̂ atchâkalâ lo vötaâ, kə̈ bhî ndjë ngâ tchâkalâ nyîpï balë lə̂ gûtə̂ atchâkalâ nyîpï vötaâ, ânyë kə̈ bhî ngâ tchâkalâ akêkêrə̂ balë lə̂ gûtə̂ atchâkalâ akêkêrə̂ vötaâ. A bhï atchâkalâ nə̈ lâme käko ndə̂kə̂ pa ngâ tchâkalâ nə̈ balë lə̂ gûtə̂ atchâkalâ nə̈ vötaâ dotə̂ yê tə̂ bübü tchô, anyë ngâ tchâkalâ lo balë lə̂ gûtə̂ atchâkalâ lo vötaâ kä ta bata tâ-ê, tchə̂lə̂ bütchî mbô ndjë tâ käko.

¹³ Më kâ wûn tchô, kə̈ djê sɨ̈kɨ̈ ngâ kânda ndə̂ tche sə̂ lakə̂ wrʉ ngrɨ̈ bhâ lafô lakə̂ ta wârə̂ päkëdə̂: «Nyonyo! Nyonyo! Nyonyo kä tə̂ azü ndə̂ tchêbêche, bëte sɨ̈kɨ̈ atätälîtä vötaâ ndə̂ aânje vötaâ kä hrʉadje rə̂ lâme!»