Apökälîbïchi 7 - Mbëtï Ndjapä: TÄFO MADƗ̈Azü 144 000 ndə̂ a mbô sɨ̂nyî pâ la andjê 1 La tchêngbâ nə̈ më wûn aânje voanə̈ ndə̂ andjë krʉ̂ lafô lə̂ angongo tchô voanə̈ ndə̂ tchêbêche gbɛ̂. Andjë kïtə̂ köbo tə̂ ayi voanə̈, ndə̂kə̂ pa ngâ yi balë mboabô mbô pâ cho-ê, âdəndjë la gbölö ngû ngbro, âdəndjë pâ ngâ yö balë-ê. 2 Më wûn ngâ ânje ngbî ndə̂ tche sə̂ lakə̂ kenga atə̂ lafô, tche tö dəsə̂nə̈ ndə̂ lo wutu tâ. Tche zä rə ndə̂ a mbo sɨ̂nyî tə̂ azü la rə̂ ëtchânə̂ yê, rə nə̈ lâme də̈ andə̂ Ndjapä ndə̂ tche wâ la tʉ̈rʉ̂ la yê. Tche ôn ngbôô sə̈ aânje voanə̈ ndə̂ andjë gbô gbôgbô ndə̂kə̂ ndɨ tchêbêche la gbölö ngû ngbro lâme päkëdə̂: 3 «Nyë ndɨ̈äbô tchêbêche ndɨ̂ gasa-ê, âdəndjë gbölö ngû ngbro, âdəndjë ayö-ê, zoo ârâ mbo ngâ sɨ̂nyî pâ la azü kua ndə̂ Ndjapä ndə̂ azə̂ dokʉ̈tchê ânyë.» 4 Më djê rə̂ ndə̂ a nyîsə̂ kə̂ ngba ndə̂ azü ndə̂ a mbô sɨ̂nyî pâ la andjê lâme, andjë gbɛ̂ də̈ azü pâ mawo gbɛ̂ ndə̂ azü gö ndə̂ Isarayële, ndə̂kə̂ ngba ndə̂ andjê gbɛ̂ wâ sâke ngbangbo balë la tə̂ azü bïchuû tchêpâ nə̈ voanə̈ (144 000). 5 Kə̂ ngba ndə̂ azü pâ mawo ndə̂ Judäa wä sâke lə̂ könô gbɛ̂ tchêpâ nə̈ bïchuû ndə̂ a mbô sɨ̂nyî pâ la andjê. Andə̂ azü pâ mawo ndə̂ Rubɛ̈n, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. Andə̂ azü pâ mawo ndə̂ Gâde, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. 6 Andə̂ azü pâ mawo ndə̂ Asëre, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. Andə̂ azü pâ mawo ndə̂ Nefetalï, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. Andə̂ azü pâ mawo ndə̂ Manasë, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. 7 Andə̂ azü pâ mawo ndə̂ Simeyön, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. Andə̂ azü pâ mawo ndə̂ Levï, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. Andə̂ azü pâ mawo ndə̂ Isakäre, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. 8 Andə̂ azü pâ mawo ndə̂ Zabulön, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. Andə̂ azü pâ mawo ndə̂ Jozêfu, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. Andə̂ azü pâ mawo ndə̂ Bejamɛ̈n, kə̂ ngba ndə̂ andjê gbɛ̂ wä sâke lə̂ könô gbɛ̂ tchêpâ nə̈ bïchuû. Angbängbä azü lə̂ agö gbɛ̂ ndə̂ Ndjapä dɨ̂ andjê 9 La tchêngbâ nə̈ lâme, më wûn angbängbä azü; andjë də̈ azü lə̂ agö gbɛ̂, azü pâ amawo gbɛ̂, azü gö gbɛ̂ la azü ndə̂ ama gö balë balë gbɛ̂. Ngâ akrə balë ndə̂ tche kʉ̂sə̂ kə̂ dɨ andjê gbɛ̂ sə̂âbo-a. Andjë gbɛ̂ krʉ̈ lafô tchâtchu ngendë-gbïɛ̈, ndjë tchâtchu Ngbavö Ɛ̈bro-ngbaga. Andjë yü ngrɨ̈ngrɨ̈ grôgrô lə̂ba, ânyë kə̈ kʉ̂ kôlo kâdâ ëtchânə̂ andjê. 10 Andjë sə̂ lakə̂ on ngbôô päkëdə̂: «Ndjapä ndə̂ azə̂, ndə̂ tche sə̂ lə̂ ngendë-gbïɛ̈, tchetchë la Ngbavö Ɛ̈bro-ngbaga kä ndə̂ âtchâ azə̂ lə̂ kuzü.» 11 Aânje gbɛ̂ tâkpa ndə̂ ngendë-gbïɛ̈ nə̈, la akpôkpô azü, la arə voanə̈ ndə̂ âwa la tʉ̈rʉ̂ la lâme, andjë gbɛ̂ tê tchâtchu ngendë-gbïɛ̈ nə̈. Andjë gʉ̂te kə̈ chî küma andjê tə̂ cho kə̈ sə̂ lakə̂ voga Ndjapä. 12 Andjë sə̈ lakə̂ to rə̂ päkëdə̂: «Amin! Voga, golowäre, küma ndə̂ âwâ lanə̈, ayîabâ, kə̂ lusə̂tə̂, kümändëmä la gbôgbô wätə̂ andə̂ Ndjapä ndə̂ azə̂ ndə̂ tche wâ pïï etə̂! Amin.» 13 Ngâ kpôkpô akrə nə̈ balë zâ pö kə̈ tô rə̂ sə̈ mê päkëdə̂: «Azü ndə̂ andjë yû ngrɨ̈ngrɨ̈ grôgrô lə̂ba âtə də̈ andjanə̈bâ? Ânyë andjë tö bhâ tchêbâ?» 14 Më tô rə̂ ndə̂nə̈ sə̈ tchë päkëdə̂: «Gbölö Gbïɛ̈ ndə̂ mê, mo wûnsə̂ nə̈ nə̂ gbɛ̂.» Tche tô rə̂ sə̈ mê päkëdə̂: «Andjë də̈ azü ndə̂ andjê tô lə̂ agbôgbô arə ndə̂ a mbô rə̂ tə̂ andjê. Andjë djûtu ngrɨ̈ngrɨ̈ lə̂ba ndə̂ andjê lə̂ jï Ngbavö Ɛ̈bro-ngbaga nə̂, ânyë lə̂ba nə̈ grô lâme. 15 Bëte rə̂ kä ndə̂ andjë krʉ̂ tchâtchu ngendë-gbïɛ̈ ndə̂ Ndjapä lakə̂ voga tchë dalobiî lə̂ gbölö nda ndə̂ yê. Ânyë tchanə̈ ndə̂ tche sə̂ lə̂ ngendë-gbïɛ̈ nə̈ batadje andjê tchâkrʉzrö yê. 16 Gʉ âkä nyu bata andjê tee-a, tchə̂lə̂ gɨ̈ andjê kä hro bata tee-a, âdəndjë kə̂ ta ndə̂ lo la tchâkʉ̈wô kä cho bata andjê tee-a. 17 Bëte Ngbavö Ɛ̈bro-ngbaga ndə̂ tche sə̂ lə̂ gûtə̂ ngendë-gbïɛ̈ lâme, tchê batadje andjê batə̂ earə̂ kə̂ sə pâ aɛ̈bro-ngbaga bata aɛ̈bro-ngbaga ndə̂ yê. Tchê eadje la andjê pu aküma ngû ndə̂ âza tchîsûwu sə̈ azü. Ânyë Ndjapä âtroadje ngûla gbɛ̂ ndə̂ âwâ lə̂ la andjê.» |
© Wycliffe Bible Translators, Inc.
Wycliffe Bible Translators, Inc.