Apökälîbïchi 6 - Mbëtï Ndjapä: TÄFO MADƗ̈

Ngbavö Ɛ̈bro-ngbaga ön mênde tə̂ mbëtï

¹ Pânə̈ më wûn Ngbavö Ɛ̈bro-ngbaga ndə̂ tche ôn dokʉ̈ mênde lə̂ gbâtə̂ amênde mïndûu manə̈ bïchuû lâme, ânyë më djê tchə̂lə̂ gɨ̈ ngâ rə lə̂ gbâtə̂ arə voanə̈ ndə̂ âwâ la tʉ̈rʉ̂ la lâme, ndə̂ âsə̂ lakə̂ on ngbôô batə̂ tchə̂lə̂ gɨ̈ nyïvrö ndə̂ âsoa lakə̂ to rə̂ päkëdə̂: «Amö nə!»

² Më âsə̈ wun tchô kə̈ wûn ngâ grôgrô mbâlâtâ. Akrə ndə̂ tche sə̂ pâ yê, tche zä wûlî ëtchânə̂ yê. A zâ ngâ kurône sə̈ tchë, ânyë tche rô batə̂ akrə ndə̂ tche rô lə̂ arə gbɛ̂ la gbôgbô. Tche rö lâme ndə̂kə̂ ro lə̂ arə gbɛ̂ la gbôgbô.

³ Ndə̂ tche âsə̈ on bïchuû mênde nə̈, më djê tchə̂lə̂ gɨ̈ bïchuû rə ndə̂ âwâ la tʉ̈rʉ̂ la lâme ndə̂ âtô rə̂ päkëdə̂: «Amö nə!»

⁴ Käko ngâ mbâlâtâ ngbî kâ wûtu, kʉ̂tə̂ yê drôdrö batə̂ wo. Akrə ndə̂ tche sə̂ pâ yê, a zä gbôgbô sə̈ tchë ndə̂kə̂ pa tche ji zɨtɨ su pâ cho gbɛ̂, ânyë azü sə lakə̂ wontə̂ andjê. A zä ndjë ngâ ngrɨ̈ngrɨ̈ besala sə̈ tchë.

⁵ Ndə̂ Ngbavö Ɛ̈bro-ngbaga nə̈ âsə̈ on vötaâ mênde nə̈, më djê tchə̂lə̂ gɨ̈ vötaâ rə ndə̂ âwâ la tʉ̈rʉ̂ la lâme ndə̂ âtô rə̂ päkëdə̂: «Amö nə!» Mê âsə̈ wun tchô kə̈ wûn ngâ bübü mbâlâtâ. Akrə ndə̂ tche sə̂ pâ yê, tche zä ngâ kelö ëtchânə̂ yê.

⁶ Më djê tchə̂lə̂ gɨ̈ ngâ rə lə̂ gbâtə̂ arə voanə̈ ndə̂ âwâ la tʉ̈rʉ̂ la lâme ndə̂ âtô rə̂ päkëdə̂: «Kelö ndə̂ blë balë wä gundə̂sə̂ makətche ndə̂ akrə gbo rə̂ ngbâ kua ndə̂ lö balë, ânyë kelö ndə̂ ôreje vötaâ wä gundə̂sə̂ makətche ndə̂ akrə gbo rə̂ ngbâ kua ndə̂ lö balë. Âdə andə̂ kâdâ la vɛ̂n-ɛn lâme, amö ndɨabô rə̂ ndɨ̂-î.»

⁷ Ndə̂ Ngbavö Ɛ̈bro-ngbaga nə̈ âsə̈ on voanə̈ mênde nə̈, më djê tchə̂lə̂ gɨ̈ voanə̈ rə ndə̂ âwâ la tʉ̈rʉ̂ la lâme ndə̂ âtô rə̂ päkëdə̂: «Amö nə!»

⁸ Mê âsə̈ wun tchô kə̈ wûn ngâ mbâlâtâ ndə̂ kʉ̂tə̂ yê wâ batə̂ ngû kîɛ̈pu. Akrə ndə̂ tche sə̂ pâ yê, a ë rə̂ tə̂ yê pä kuzü, ânyë sə̂ tchô ndə̂ akuzü sə̂ lakə̂ za tchêngbâ yê. A zâ gbôgbô sə̈ andjê pâ ngâ tchâkalâ tchêbêche balë ndə̂ a krʉ̂ tchə̂lə̂ nə̈ voanə̈, ndə̂kə̂ won azü la besala, la gbölö gʉ, la angbongbo atə̂kömbô, ndjë lə̂ köbosə̂ agbôgbô agia güsü.

⁹ Ndə̂ Ngbavö Ɛ̈bro-ngbaga nə̈ âsə̈ on mïndûu mênde nə̈, më wûn avrö azü ndə̂ a wôn andjê bëte pö Ndjapä tchâtchâ gbalâka, ndə̂ andjë wûnsə̂ pö pâ Ndjapä ânyë kə̈ mû rə̂.

¹⁰ Andjë sə̂ lakə̂ on ngbôô päkëdə̂: «Earə̂ kə̂ nyisə̂ rə, ndə̂ mo wâ ngbî ânyë kə̈ dâka gbɛ̂, ndə̂ mo to tchê lëge pö; mo âsə zoo dalatchêbâ ânyë kə̂ wa ngbanga pâ azü tchêbêche, ânyë kə̂ gi ngbongbo rə sə̈ andjê tə̂ pö ndə̂ jï ârâ ndə̂ âtû lâme?»

¹¹ Käko a zâ ngrɨ̈ngrɨ̈ grôgrô lə̂ba sə̈ akrə balë balë, ânyë kə̈ yûkû nə̈ sə̈ andjê ndə̂kə̂ rʉatə̂ su andjê ndə̂ ngâ kpîɛ̂kpîɛ̂ lö zoo a ka wôn angâ azü ëtə̂ kʉ̂tê andjê batə̂ rə̂ ndə̂ a wôn andjê lâme ânyë. Azü nə̈ lâme də̈ angâ andjê a-earə̂ kua ndə̂ Ndjapä, la arə̂mâ ndə̂ andjê.

¹² Ndə̂ Ngbavö Ɛ̈bro-ngbaga nə̈ âsə̈ kä on mïndûu manə̈ balë mênde nə̈, më wûn cho ndə̂ âtrô la gbôgbô, lo bû ndïrʉ̈ batə̂ bübü lə̂ba ndə̂ müä, ânyë nyîpï drô gboo batə̂ jï.

¹³ Akêkêrə̂ tchêlafô sə̂ lakə̂ tu atə̂ bêche batə̂ ngbânyî lêlê fîge ndə̂ âtû atə̂ bêche la tchêngbâ gbölö yi ndə̂ ânyôânyoa da yö nə̈.

¹⁴ Tchêlafô rô batə̂ ngâ mbëtï ndə̂ âsə̂ lakə̂ rotə̂ yê. Aga gbɛ̂, la adälä âlafô lə̂ kpâlâ andjê kə̈ rô etə̂.

¹⁵ Agbïɛ̈ ndə̂ tchêbêche la agbölö azü la amakündji ndə̂ aturûgu la azü ndə̂ rə ndə̂ andjê wâ tâ la a-earə̂ gbôgbô la azü gbɛ̂ ndə̂ andjë wâtə̂ angbâa, la azü ndə̂ andjë wâbô wâtə̂ angbâa, andjë gbɛ̂ sə̂ lakə̂ kpe ndə̂kə̂ zatə̂ andjê wü lə̂ agrʉ̈ lə̂ atäme, ndjë lə̂ gûtə̂ atäme ndə̂ âwâtə̂ aga.

¹⁶ Andjë tö rə̂ sə̈ aga la atäme nə̈ päkëdə̂: «Nyë të pâ ârâ, kə̂ vusə̂ ârâ ânyë tchanə̈ ndə̂ tche sə̂ lə̂ ngendë-gbïɛ̈ nə̈ wun-abô ârâ wûn-î. Käko ânyë ârâ kpe tə̂ mêrâ ndə̂ Ngbavö Ɛ̈bro-ngbaga lâme.

¹⁷ Bëte gbölö lö ndə̂ mêrâ ndə̂ andjê wûtu nə̂, ânyë tchabâ kä ndə̂ âkʉ̂sə̂ kə̂ krʉ tchâtchu nə̈?»