Apökälîbïchi 5 - Mbëtï Ndjapä: TÄFO MADƗ̈

Ngbavö Ɛ̈bro-ngbaga kʉ̂sə̂ kə̂ vro tchêla mbëtï

¹ Më wûn ngâ mbëtï ndə̂ âwâ tchânə̂ tchanə̈ ndə̂ tche sə̂ lə̂ ngendë-gbïɛ̈ nə̈ də ndôkö. A mbö mbëtï dələ̂nə̈ ndjë dəpânə̈, kə̈ pî rə̂ la mênde mïndûu manə̈ bïchuû.

² Më wûn ngâ ânje ndə̂ tche wâ la gbôgbô, ânyë kə̈ sə̂ lakə̂ mu pö ngbôô päkëdə̂: «Tchabâ kä ndə̂ âkʉ̂sə̂ kə̂ on mênde nə̈, ânyë kə̂ vro tchêla mbëtï nə̈?»

³ Praâbalë ngâ akrə balë ndə̂ tche sə̂ bhâ lafô, âdəndjë pâ cho, âdəndjë dələ̂ dju cho, ndə̂ tche wâ la gbôgbô ndə̂kə̂ vro tchêla mbëtï nə̈ âdəndjë ndə̂kə̂ wun tchə̂lə̂ nə̈ sə̂âbo-a.

⁴ Më kɨ̂ tə̂ gbölösə̂nə̈, bëte a gbôâbo ngâ akrə balë ndə̂ tche kʉ̂sə̂ kə̂ vro tchêla mbëtï nə̈, âdəndjë ndə̂kə̂ wun tchə̂lə̂ nə̈-a.

⁵ Praâbalë ngânə̈ balë lə̂ gûtə̂ akpôkpô azü nə̈ tô rə̂ sə̈ mê päkëdə̂: «Amö kɨabô kɨ̂-î! Wunsaâ: Bämalä ndə̂ azü pâ mawo ndə̂ Judäa, akrə pâ mawo ndə̂ Davîdi, tche rô la gbôgbô lə̂ arə nə̂ gbɛ̂. Tchê on-adje mênde mïndûu manə̈ bïchuû lâme, kə̂ vroadje tchêla mbëtï nə̈.»

⁶ Käko më wûn ngâ Ngbavö Ɛ̈bro-ngbaga ndə̂ tche krʉ̂ lafô lə̂ gûgû ngendë-gbïɛ̈ nə̈, ânyë arə voanə̈ ndə̂ âwâ la tʉ̈rʉ̂ la lâme, la akpôkpô azü tâkpa ndə̂ yê. Lakə̂ wun tchë, âwûntî pä a wâ gɨ̈ yê nə̂. Tche wä la dudu mïndûu manə̈ bïchuû ndjë la ndjîla mïndûu manə̈ bïchuû, ndə̂ âwâtə̂ ayingö ndə̂ Ndjapä mïndûu manə̈ bïchuû ndə̂ a wân andjê pâ cho gbɛ̂.

⁷ Ngbavö Ɛ̈bro-ngbaga nə̈ ê, kə̈ zâ mbëtï nə̈ ndə̂ âwâ tchânə̂ tchanə̈ ndə̂ tche sə̂ lə̂ ngendë-gbïɛ̈ nə̈ də ndôkö.

⁸ Ndə̂ tche âsə̈ gbo mbëtï nə̈, arə voanə̈ ndə̂ âwâ la tʉ̈rʉ̂ la lâme la akpôkpô azü tə̂ akrə gbɛ̂ tchêpâ nə̈ voanə̈ lâme gʉ̂te tchâtchâ Ngbavö Ɛ̈bro-ngbaga nə̈. Akrə balë balë kä la kundi tchânə̂ yê la akangûchi ndə̂ a mbô rə̂ la lôlo ndə̂ kâdâ-yömbö sɨ̂sɨ̈ lə̂nə̈. Kâdâ-yömbö nə̈ də̈ kə̂ to pö sə̈ Ndjapä ndə̂ azü ndə̂ andjë wâ ngbî bëte Ndjapä.

⁹ Andjë sə̈ lakə̂ pa ngâ täfo düwü päkëdə̂: «Mo kʉ̈sə̂ kə̂ za mbëtï nə̈ kə̂ on mênde nə̈ bëte a wôn mö alême nə̂. Mo yösə̂ azü sə̈ Ndjapä lə̂ köbosə̂ jï zə̈, azü nə̈ ndə̂ mo yôsə̂ andjê lâme də̈ azü pâ amawo gbɛ̂, ama gö gbɛ̂, azü gö gbɛ̂ la azü ndə̂ agö ngbî.

¹⁰ Mo mbö rə̂ ânyë andjë wâtə̂ a-earə̂ kə̂ wa ngela sə̈ Ndjapä ndə̂ gbölö gö-gbïɛ̈ ndə̂ Ndjapä ndə̂ azə̂. Andjê mboadje kümändëmä pâ cho.»

¹¹ Käko më kä wûn tchô kə̈ djê tchə̂lə̂ gɨ̈ angbängbä aânje, la arə ndə̂ âwâ la tʉ̈rʉ̂ la, la akpôkpô azü ndrotə̂ ngendë-gbïɛ̈ nə̈. Kə̂ ngba ndə̂ andjê wä sâke sâke.

¹² Andjë sə̂ lakə̂ pa düwü ngbôô päkëdə̂: «Ngbavö Ɛ̈bro-ngbaga ndə̂ a wôn tchë, tche kʉ̈sə̂ nə̈ pä azü voga tchë, kə̂ lusə̂ yê lə̂ golowäre ndə̂ yê, la kümändëmä ndə̂ yê la gbôgbô ndə̂ yê, bëte arə ndə̂ tche wâ la rə̂, la küma yê ndə̂ âwâ lanə̈!»

¹³ Më djê tchə̂lə̂ gɨ̈ arə gbɛ̂ ndə̂ Ndjapä mbô rə̂, ndə̂ âwâ bhâ lafô, la anə̈ ndə̂ âwâ pâ cho, la anə̈ ndə̂ âwâ lə̂ dju cho, la anə̈ ndə̂ âwâ lə̂ gbölö ngû ngbro, arə gbɛ̂ ndə̂ âwâ la tʉ̈rʉ̂ la. Arə lâme gbɛ̂ sə̂ lakə̂ pa düwü päkëdə̂: «Tchanə̈ ndə̂ tche sə̂ lə̂ ngendë-gbïɛ̈, tchetchë la Ngbavö Ɛ̈bro-ngbaga; äwäpä azü voga tchë, kə̂ lusə̂ yê, kə̂ za golowäre sə̈ tchë lə̂ gbôgbô ndə̂ yê, tə̂ logbɛ̂ logbɛ̂!»

¹⁴ Arə voanə̈ ndə̂ âwâ la tʉ̈rʉ̂ la lâme tô rə̂ päkëdə̂: «Amin!» Ânyë akpôkpô azü nə̈ gʉ̂te kə̈ sə̂ lakə̂ voga tchë.