Apökälîbïchi 4 - Mbëtï Ndjapä: TÄFO MADƗ̈

Kə̂ voga Ndjapä bhâ lafô

¹ La tchêngbâ nə̈ më kâ wûn ngâ rə ngbî: Më wûn ngâ manda ndə̂ âkrô bhâ lafô. Dokʉ̈ tchə̂lə̂ gɨ̈ ndə̂ më djê rə̂ batə̂ tätälîtä lâme, âtô rə̂ sə̈ mê päkëdə̂: «Amö kenga bhâtə, mê nyiadje sə̂ arə ndə̂ âwâ ndə̂kə̂ wutu la tchêngbâ nə̈ sə̈ mö.»

² Kpro kâkë, Kpɨ̂ki Yingö tchû mê kproô. Tchâme më wûn ngâ ngendë-gbïɛ̈ ndə̂ âwâ bhâ lafô, ânyë ngâ akrə sə̂ lə̂nə̈.

³ Akrə ndə̂ tche sə̂ lə̂nə̈ lâme, tə̂ yê sə̂ lakə̂ tchôtchö batə̂ atäme ndə̂ rə̈ nə̈ wû pä jâsepe la särädöâne. Ngâ yîngi djê ndə̂ ngendë-gbïɛ̈ nə̈, kʉ̂tê yîngi nə̈ lâme sə̂ lakə̂ tcho batə̂ ngâ täme ndə̂ rə̈ nə̈ wû pä ëmërôde.

⁴ Ndrotə̂ ngendë-gbïɛ̈ nə̈, angâ angendë-gbïɛ̈ tə̂ akrə gbɛ̂ tchêpâ nə̈ voanə̈ tâkpa ndrotə̂ nə̈, ânyë akpôkpô azü tə̂ akrə gbɛ̂ tchêpâ nə̈ voanə̈ sə̂ ëlə̂nə̈. Andjë yü grôgrô lə̂ba ëtə̂ andjê kə̈ yû kurône ndə̂ a mbô rə̂ la lôlo tə̂ küma andjê.

⁵ Angâ arə batə̂ tchêlafô ndə̂ âɛn nyaon-nyaon, la tchə̂lə̂ gɨ̈ nyïvrö ndə̂ âsoa, sə̂ lakə̂ wutu lə̂ ngendë-gbïɛ̈ nə̈, ânyë lâmba mïndûu manə̈ bïchuû ndə̂ wo wâ lə̂nə̈ sə̂ lakə̂ tcho kpô tchâtchu ngendë-gbïɛ̈ nə̈. Alâmba lâme də̈ ayingö mïndüu manə̈ bïchuû ndə̂ Ndjapä.

⁶ Kpô tchâtchu ngendë-gbïɛ̈ nə̈, më wûn ngâ rə ndə̂ âwâ batə̂ gbölö ngû ngbro, ndə̂ âkʉ̂tə̂ yê la ngâ täme ndə̂ rə̈ nə̈ wû pä Krïstâle. Bhâlə̂ gûgû ngendë-gbïɛ̈ nə̈, angâ arə voanə̈ ndə̂ âwâ la tʉ̈rʉ̂ la andjê kä tâ, ndə̂ andjë tâkpa ndə̂ ngendë-gbïɛ̈ nə̈, ânyë la andjê tâkpa tə̂ kʉ̂tê andjê gbɛ̂, ndə̂ angânə̈ wâ də tchâtchu andjê, ânyë angânə̈ wâ dəngbâ andjê.

⁷ Dokʉ̈ rə ndə̂ âwâ la tʉ̈rʉ̂ la lâme kʉ̈tə̂ yê la bämalä, bïchuû nə̈ kʉ̂tə̂ yê la ngbavö kökö bâgala, vötaâ nə̈ kä la tchâtchu yê tâ ndə̂ âkʉ̂ andə̂ akrə, ânyë voanə̈ nə̈ kʉ̂tə̂ yê la kânda ndə̂ tche sə̂ lakə̂ wrʉ.

⁸ Arə ndə̂ âwâ la tʉ̈rʉ̂ la andjê lâme balë balë gbɛ̂ kä la mbrö andjê tâ mïndûu manə̈ balë. La ndə̂kə̂ wun tchô la rə̂ täkpa ndə̂ mbrö andjê nə̈ gbɛ̂, angânə̈ dəpânə̈, ânyë angânə̈ dələ̂nə̈. Andjë sə̈ lakə̂ pa düwü dalobiî päkëdə̂: «Gbölö Gbïɛ̈ Ndjapä ndə̂ tche wâ la gbôgbô gbɛ̂, tche wä ngbî kə̈ dâka gbɛ̂, tche wä ngbî kə̈ dâka gbɛ̂, tche wä ngbî kə̈ dâka gbɛ̂! Tche wä alême tâ, kə̈ wâ angêta, tchê nəadje.»

⁹ Arə ndə̂ âwâ la tʉ̈rʉ̂ la andjê lâme sə̈ logbɛ̂ lakə̂ pa düwü ndə̂kə̂ voga tchanə̈ ndə̂ tche sə̂ lə̂ ngendë-gbïɛ̈ nə̈, ndə̂ tche wâ la tʉ̈rʉ̂ la yê pïï etə̂. Andjë lusə̂ yê, lakə̂ za ayîabâ sə̈ tchë.

¹⁰ Akpôkpô azü tə̂ akrə gbɛ̂ tchêpâ nə̈ voanə̈ lâme sə̂ lakə̂ gʉte tchâtchâ tchanə̈ ndə̂ tche sə̂ lə̂ ngendë-gbïɛ̈ nə̈, andjë vöga tchanə̈ ndə̂ tche wâ la tʉ̈rʉ̂ la yê pïï etə̂. Andjë yï akurône ndə̂ andjê tchâtchâ ngendë-gbïɛ̈ nə̈ lakə̂ to rə̂ päkëdə̂:

¹¹ «Gbölö gbïɛ̈, Ndjapä ndə̂ ârâ, mo kʉ̈sə̂ nə̈ pä azü voga mö, kə̂ lusə̂ zə̈, tə̂ pö ndə̂ gbôgbô ndə̂ zə̈. Bëte momö kä ndə̂ âmbô arə gbɛ̂. Arə nə̈ lâme wün tchîsûwu, bëte momö kä ndə̂ ânyîndə̂ nə̈.»