Apökälîbïchi 3 - Mbëtï Ndjapä: TÄFO MADƗ̈

Mbëtï ndə̂ a wân rə̂ sə̈ Egilîze ndə̂ Sârede

¹ «Amö mbo mbëtï âtə kə̈ wân rə̂ sə̈ ânje ndə̂ Egilîze ndə̂ Sârede kə̂ to rə̂ lə̂nə̈ päkëdə̂: «Tchanə̈ ndə̂ tche wâ la ayingö ndə̂ Ndjapä mïndûu manə̈ bïchuû la akêkêrə̂ mïndûu manə̈ bïchuû tö rə̂ päkëdə̂: Më wûnsə̂ akua ndə̂ mo mbô rə̂ lâme nə̂, azü wüntî pä gbô mö kä la tʉ̈rʉ̂ la zə̈, dëkë mo tchû nə̂

² La zə̈ gbö-ê, rə ndə̂ âwâ ngbânə̈ ndə̂kə̂ pa mo mbo rə̂, ndə̂ ândô tə̂kə̂ tchu lâme, amö nyikrə tchêndə̂ nə̈ âkä daka ëngbânə̈. Bëte më wün rə̂ pä akua ndə̂ zə̈ dâkabô lə̂ la Ndjapä ndə̂ mê-a.

³ Rə ndə̂ a nyîsə̂ nə̈ sə̈ mö la rə ndə̂ mo djê rə̂ alême, äwäpä sə̂nə̈ te lê zə̈, mo bata rə̂, kə̂ gbotə̂ bəndɨ kə̂ mbo rə ndə̂ zə̈-ê. Âdə mo âjoabô jô-ê, mê ânə pu mö batə̂ ngâ earə̂ ngbä, ânyë mô wun-abô sə̂ dalo ndə̂ mê tro mö la rə̂ tee-a.

⁴ Praâbalë angâ azü balë balë kä tâ bhâ Sârede ndə̂ kâkpö wâbô wâ tə̂ lə̂ba ndə̂ andjê-ê. Andjê nəadje balë la mê la grôgrô lə̂ba, bëte andjë kʉ̂sə̂ kə̂ yu rə̂ nə̂.

⁵ «Käko akrə ndə̂ tche rô lə̂ arə gbɛ̂ la gbôgbô, tche yuadje agrôgrô lə̂ba. Ânyë mê jiabô rə̈ yê lə̂ mbëtï ndə̂ tchîsûwu tee-a, ndjë, më âto tchôtchô pö ndə̂ yê kraâ tchâtchu Bha mê la aânje ndə̂ yê.

⁶ «Akrə ndə̂ tche wâ la tü, äwäpä tche dje pö ndə̂ Yingö tô rə̂ sə̈ a-Egilîze!»

Mbëtï ndə̂ a wân rə̂ sə̈ Egilîze ndə̂ Filadelefï

⁷ «Amö mbo mbëtï âtə kə̈ wân rə̂ sə̈ ânje ndə̂ Egilîze ndə̂ Filadelefï kə̂ to rə̂ lə̂nə̈ päkëdə̂: «Tchanə̈ ndə̂ tche wâ ngbî ânyë kə̈ dâka gbɛ̂, ndə̂ tche to kütû lëge pö, tchanə̈ ndə̂ tche wâ la kûlïɛ̈ ndə̂ Davîdi tchânə̂ yê, tchetchë lâme ndə̂ âdə tche âkro manda, ngâ akrə balë ndə̂ tche tchu rə̂ sə̂âbo-a, âdə tche âtchu manda, ngâ akrə balë ndə̂ tche kro rə̂ sə̂âbo-a, tche tö rə̂ kâkë:

⁸ Më wûnsə̂ akua ndə̂ zə̈ nə̂, wunsaâ më krô ngâ manda tchâtchu zə̈ nə̂, ngâ akrə balë ndə̂ tche tchu rə̂ sə̂âbo-a. Gbôgbô ndə̂ zə̈ wä kütû kpîɛ̂kpîɛ̂ rə̂, praâbalë mo bäta pö ndə̂ mê, kə̈ vûâbo sə̂ rə̈ mê-a.

⁹ Wunsaâ, azü ndə̂ andjë sə̂ lə̂ kpûlû ndə̂ azü ndə̂ Satäa, ndə̂ andjë wâtə̂ a-earə̂ yepa, ndə̂ andjë tô rə̂ pä anyë wätə̂ ajuîfu lâme, dëkë andjë wâbo tə̂ ajuîfu-a. Mê mboadje rə̂ pä andjë nə kə̂ gʉte tchâtchâ zə̈, ânyë andjë wun-adje sə̂nə̈ pä më nyîndə̂ zə̈ nə̂.

¹⁰ Batə̂ rə̂ ndə̂ mo bâta pö ndə̂ mê lakə̂ rʉatə̂ su zə̈, mëmê ndjë gbɛ̂ më âbata mö lə̂ alö arə nyonyo ndə̂ ânə pâ cho gbɛ̂ ndə̂kə̂ nyoanyoa azü tchêbêche gbɛ̂.

¹¹ Mê ânə angaâtə. Rə ndə̂ mo wâ la rə̂ lâme, amö za rə̂ kperə̂, ânyë ngâ akrə balë krʉabô kurône ndə̂ zə̈ krʉ̂â-ê.

¹² «Akrə ndə̂ tche rô lə̂ arə gbɛ̂ la gbôgbô, mê mboadje rə̂ pä tche wa batə̂ gbölö täme ndə̂ âtɨngɨ küma gbölö nda Ndjapä ndə̂ Ndjapä ndə̂ mê. Tchê kä wutuabô balë tee-a. Mê mboadje rə̈ Ndjapä ndə̂ mê pâ yê, la rə̈ gö ndə̂ Ndjapä ndə̂ mê. Gö nə̈ lâme də̈ täfo Jerûzalêmo, ndə̂ âtô bhâ lafô, ndrotə̂ Ndjapä ndə̂ mê, ânyë kə̈ jrê atə̂ bêche. Mê mboadje ndjë rə̈ täfo rə̈ mê pâ yê.

¹³ «Akrə ndə̂ tche wâ la tü, äwäpä tche dje pö ndə̂ Yingö tô rə̂ sə̈ a-Egilîze!»

Mbëtï ndə̂ a wân rə̂ sə̈ Egilîze ndə̂ Laodisë

¹⁴ «Amö mbo mbëtï âtə kə̈ wân rə̂ sə̈ ânje ndə̂ Egilîze ndə̂ Laodisë kə̂ to rə̂ lə̂nə̈ päkëdə̂: «Tchanə̈ ndə̂ rə̈ yê wû pä Amin, tchanə̈ ndə̂ tche wûnsə̂ kə̂ to lëge pö ndə̂ rə ndə̂ tche wûn rə̂. Arə gbɛ̂ ndə̂ Ndjapä mbô rə̂ tö tə̂ yê, tche tö rə̂ päkëdə̂:

¹⁵ Më wûnsə̂ akua ndə̂ zə̈ nə̂, më wûnsə̂ nə̈ nə̂ pä mo wâbo tə̂ zɨtɨ nə̈-a, kə̈ wâbo ndjë tə̂ kʉ̈wʉ̂ nə̈-a. Mo âwa âme tə̂ zɨtɨ nə̈ âdəndjë tə̂ kʉ̈wʉ̂ nə̈, âwa la köbo nə̈!

¹⁶ Praâbalë mo wâbo tə̂ kʉ̈wʉ̂ nə̈-a, kə̈ wâbo ndjë tə̂ zɨtɨ nə̈-a, mo wö mboo-ë. Käko mê ndjadje mö lə̂ ma mê fiî!

¹⁷ Bëte mo tö rə̂ päkëdə̂: Rə ndə̂ mê kä tâ, më wä la rə tə̂ gbölösə̂nə̈, pö ndə̂ ngâ rə balë kä kʉ̂âbo mê-a. Tchâme, mo wûn-âbo sə̂nə̈ pä mo də̈ earə̂ yûkü-a, âdəndjë earə̂ nyonyo-a, âdəndjë akrə ndə̂ rə ndə̂ yê wâbô wâ tâ-a, âdəndjë earə̂ föla-a, la akrə ndə̂ tche wâ kpändëwä-a.

¹⁸ Më zä wängö sə̈ mö ndə̂kə̂ pa mo yo lôlo tchânə̂ mê ânyë kə̂ wa la rə, lôlo ndə̂ a za rə̂ lə̂ wo ânyë kâkpö kʉ̂tê nə̈ gbɛ̂ ju, ânyë âgro kpɨ̂ki lâme. Amö yo ndjë agrôgrô lə̂ba tchânə̂ mê, kə̂ yu rə̂ ëtə̂ zə̈ ânyë ganô mboabô mö mbô la tə̂ zə̈ ndə̂ âwâ kpändëwä lâme-ê. Amö yo ndjë yö ndə̂ la tchânə̂ mê, kə̂ mbo rə̂ lə̂ la zə̈ ânyë kə̂ kä wun tchô djîrə̂.

¹⁹ Mëmê, azü gbɛ̂ ndə̂ më nyîndə̂ andjê, më gbɨ̈tɨ tü andjê, kə̂ ka la andjê ëpâ tchôtchô köbo. Amö za su zə̈ gbɛ̂ lakə̂ mbo kua, kə̂ gbotə̂ bəndɨ kə̂ mbo rə ndə̂ zə̈-ê.

²⁰ Wunsaâ, më krʉ̈ pâ manda lakə̂ gʉgʉ rə̂. Âdə ngâ akrə âdje tchə̂lə̂ gɨ̈ mê ânyë kə̈ krô manda nə̈, mê liadje bhâ tchâalê ndə̂ yê, kə̂ zɨadje kɨ̈zɨ̂ la tchë, ânyë tchetchë ndjë gbɛ̂, tchê zɨadje kɨ̈zɨ̂ la mê.

²¹ «Akrə ndə̂ tche rô lə̂ arə gbɛ̂ la gbôgbô, mê zadje köbo sə̈ tchë ndə̂kə̂ sə sə̂nə̈ balë la mê lə̂ ngendë-gbïɛ̈ ndə̂ mê, batə̂ rə̂ ndə̂ mëmê ndjë gbɛ̂, më rô lə̂ arə gbɛ̂ la gbôgbô ânyë kə̈ sə̂ sə̂nə̈ balë la Bha mê lə̂ ngendë-gbïɛ̈ ndə̂ yê.

²² «Akrə ndə̂ tche wâ la tü, äwäpä tche dje pö ndə̂ Yingö tô rə̂ sə̈ a-Egilîze!»