Apökälîbïchi 22 - Mbëtï Ndjapä: TÄFO MADƗ̈

¹ Ânje nə̈ nyîsə̂ gbölö ngû ndə̂ âza tchîsûwu sə̈ azü sə̈ mê, ndə̂ âsə̂ lakə̂ tcho batə̂ krïstâle, ndə̂ âsə̂ lakə̂ bro jîi tə̂ ngendë-gbïɛ̈ ndə̂ Ndjapä la andə̂ Ngbavö Ɛ̈bro-ngbaga nə̈.

² Ngû nə̈ sə̈ lakə̂ kpe kulə̂ gbâtə̂ gbölö köbo ndə̂ gö nə̈. Ngâ da yö ndə̂ âza tchîsûwu sə̈ azü kä tə̂ maga gbölö ngû nə̈ dəkalâ dəkalâ. Da yö nə̈ lâme lë lə̂ ngû balë sûsunə̈ lə̂ könô gbɛ̂ tchêpâ nə̈ bïchuû. Lə̂ nyîpï balë älë sûsunə̈ balë. Akʉ̈kʉ̂ yö nə̈ wä ndə̂kə̂ tcha atə̂kömbô tə̂ azü pâ cho.

³ Ngâ rə balë kâ wâbo lə̂ gö nə̈ ndə̂kə̂ pa Ndjapä e ngbongbo pö pânə̈-a. Ngendë-gbïɛ̈ ndə̂ Ndjapä la andə̂ Ngbavö Ɛ̈bro-ngbaga wadje lə̂ gö nə̈ ânyë azü kua ndə̂ yê vogadje tchë.

⁴ Andjê wun-adje tchâtchu yê ânyë a mboadje rə̈ yê pâ la andjê.

⁵ Tchô kä buabô tee-a, andjê kä krʉabô bëte ngbänga lâmba âdəndjë ngbänga lo tee-a, bëte Gbölö Gbïɛ̈ Ndjapä mboadje rə̂ pä ngbänga yê tcho pâ andjê, ânyë kə̂ mboadje kümändëmä tə̂ logbɛ̂ logbɛ̂.

Kə̂ ka ndə̂ Jezü

⁶ Pânə̈ ânje nə̈ tô rə̂ sə̈ mê päkëdə̂: «Apö nə̈ wätə̂ lëge nə̈, kə̈ wâ ndə̂kə̂ pa akrə za su yê pânə̈. Gbölö Gbïɛ̈ Ndjapä ndə̂ tche zâ Yingö ndə̂ yê sə̈ a-earə̂ ndə̂ma yê, wän ânje ndə̂ yê ndə̂kə̂ nyisə̂ rə ndə̂ âwâ ndə̂kə̂ wutu angaâtə sə̈ a-earə̂ kua ndə̂ yê.»

⁷ «Jezü tö rə̂ päkëdə̂: Wunsaâ, mê âka angaâtə! Mômô kä tə̂ akrə ndə̂ tche mbô rə gundə̂sə̂ apö ndə̂ âwâtə̂ apö ndə̂ma Ndjapä ndə̂ a mbô rə̂ lə̂ mbëtï âtə!»

⁸ Mëmê Jâan, më djê rə̂ ânyë kə̈ wûn arə lâme. Pânə̈ ndə̂ më djê rə̂ ânyë kə̈ wûn rə̂, më gʉ̂te ndə̂kə̂ voga ânje ndə̂ tche nyîsə̂ arə lâme sə̈ mê.

⁹ Praâbalë tche tô rə̂ sə̈ mê päkëdə̂: «Amö mboabô mbô tâ käko-ë! Bëte më wä ndjë tə̂ earə̂ kua batə̂ mö, ndjë batə̂ a-earə̂ ndə̂ma Ndjapä, ndjë batə̂ andjanə̈ ndə̂ andjë bâta apö lə̂ mbëtï âtə, Ndjapä kä ndə̂ mo wâ ndə̂kə̂ voga tchë!»

¹⁰ Pânə̈ tche kâ tô rə̂ sə̈ mê päkëdə̂: «Apö lə̂ mbëtï âtə, ndə̂ âwâtə̂ apö ndə̂ma Ndjapä, amö batabô rə̂ bâta lə̂ küwû nə̈, bëte lö arə nə̈ ndô nə̂.

¹¹ Akrə ndə̂ tche mbô ngbongbo rə, äwäpä tche sə kpôtə̂ kə̂ mbo ngbongbo rə, akrə ndə̂ tche wâ lêgbrô, äwäpä tche sə kpôtə̂ kə̂ mbo lêgbrô, akrə ndə̂ tche wâ djîrə̂, äwäpä tche sə kpôtə̂ kə̂ mbo djîrə̂ rə, ânyë akrə ndə̂ tche wâ ngbî bëte Ndjapä, äwäpä tche ka zâtə̂ yê gbɛ̂ sə̈ Ndjapä.»

¹² Jezü tö rə̂ päkëdə̂: «Dje pö âtə, mê âka angaâtə! Mê kadje la arə ndə̂ mê potə̂ mê ndə̂kə̂ kʉ rə̂ sə̈ akrə balë balë gundə̂sə̂ kua ndə̂ tche mbô rə̂.

¹³ Më wätə̂ kêsâ nə̈, kə̈ wâtə̂ kə̂ ka ndə̂nə̈, më wätə̂ küma nə̈, kə̈ wâtə̂ dju nə̈, më wä dokʉ̈tchê tə̂ arə gbɛ̂, kə̈ wâtə̂ adɨ̂ arə gbɛ̂.»

¹⁴ Mômô kä tə̂ azü ndə̂ andjë djûtu alə̂ba ndə̂ andjê, ânyë a zâ köbo sə̈ andjê ndə̂kə̂ zɨ alêlê yö ndə̂ âza tchîsûwu sə̈ azü, ndjë ndə̂kə̂ li lə̂ amanda gö nə̈.

¹⁵ Praâbalë a âyiadje azü kâkë atə̂ sûwu: Azü ndə̂ andjë mbo rə batə̂ aɛ̈vrô la a-earə̂ yëwä la azü ndə̂ andjë pu aɛ̈chë âdəndjë aköchë katchôgbɛ̂ la a-earə̂ kə̂ won azü la a-earə̂ kə̂ voga angakʉ̈lä la akrə balë balë gbɛ̂ ndə̂ tche nyîndə̂ yepa lakə̂ mo yepa!

¹⁶ «Mëmê Jezü, më wän ânje ndə̂ mê sə̈ nyê ndə̂kə̂ e ndə̂kə̂ nyisə̂ arə gbɛ̂ lə̂ a-Egilîze. Më də̈ akrə pâ mawo ndə̂ Davîdi, ngbänga mê wä batə̂ andə̂ ndjamunu.»

¹⁷ Yingö la Ɛ̈chë ndə̂ köchë lâme tö rə̂ päkëdə̂: «Nə atâ!» Äwäpä akrə ndə̂ tche djê pö âtə to ndjë rə̂ päkëdə̂: «Nə atâ!» Akrə ndə̂ gʉ ngû nyû tchë, äwäpä tche nə atâ; akrə ndə̂ tche nyîndə̂ ngû ndə̂ âza tchîsûwu sə̈ akrə, äwäpä tche nə kə̂ ndjo rə̂ ämbämbänə̈.

Kə̂ ka ndə̂ pö nə̈

¹⁸ Mëmê Jâan, më tö pö lâme tə̂ lëge nə̈ sə̈ akrə balë balë gbɛ̂ ndə̂ tche djê apö ndə̂ma Ndjapä ndə̂ âwâ lə̂ mbëtï âtə: Âdə ngâ akrə âza ngâ rə ëpânə̈, Ndjapä kʉadje arə nyonyo ëpâ anə̈ ndə̂ a tô pö ndə̂nə̈ lə̂ mbëtï âtə kə̂ kʉ rə̂ sə̈ tchë.

¹⁹ Âdə ngâ akrə âji ngâ pö lə̂ mbëtï âtə, ndə̂ âwâtə̂ apö ndə̂ma Ndjapä, Ndjapä jiadje andə̂ ye nə̈ alêlê yö ndə̂ âza tchîsûwu sə̈ akrə, ndjë tchê liabô atə̂lə̂ gö ndə̂ âdâka gbɛ̂, ndə̂ a tô pö ndə̂nə̈ lə̂ mbëtï âtə tee-a.

²⁰ Akrə ndə̂ tche tô pö ndə̂ arə lâme, tche tö rə̂ päkëdə̂: «Ɛn-ɛn, më âka angaâtə!» Amin! Nə atâ Gbölö Gbïɛ̈ Jezü!

²¹ Äfü pä tchôtchô su ndə̂ Gbölö Gbïɛ̈ Jezü wa pâ nyê gbɛ̂.