Apökälîbïchi 21 - Mbëtï Ndjapä: TÄFO MADƗ̈

Täfo tchêlafô la täfo tchêbêche

¹ Käko më wûn ngâ täfo tchêlafô la ngâ täfo tchêbêche. Dokʉ̈ tchêlafô la dokʉ̈ tchêbêche yû nə̂, ânyë gbölö ngû ngbro kâ wâbo-a.

² Më wûn tchôtchô gö ndə̂ âfû ânyë kə̈ dâka gbɛ̂, täfo Jerûzalêmo ndə̂ âtô bhâ lafô. Ndjapä jrê rə̂ atə̂ bêche batə̂ ngâ ɛ̈chë ndə̂ tche nyîkrətə̂ yê, ânyë kə̈ ê ndə̂kə̂ takpa tə̂ yê la köchë ndə̂ yê.

³ Më djê ngâ ôn ngbôô ndə̂ âtô dəsə̂ ngendë-gbïɛ̈ nə̈ päkëdə̂: «Angaâtə nda ndə̂ Ndjapä kä lə̂ gbâtə̂ azü! Tchê səadje lə̂ gbâtə̂ andjê, ânyë andjê wadje tə̂ azü gö ndə̂ yê. Ndjapä la tə̂ yê səadje ndrotə̂ andjê, kə̂ wadje tə̂ Ndjapä ndə̂ andjê.

⁴ Tchê troadje ngûla andjê gbɛ̂. Kuzü kä wa bata tee-a, müä lakə̂ dɨ tchə̂lə̂ ma la yûkü kä wa bata tee-a, bëte abəndɨ arə âroadje.»

⁵ Käko tchanə̈ ndə̂ tche sə̂ lə̂ ngendë-gbïɛ̈ nə̈ tô rə̂ päkëdə̂: «Angaâtə më âmbo arə gbɛ̂ tə̂ täfo nə̈.» Pânə̈ tche tô rə̂ sə̈ mê päkëdə̂: «Amö mbo pö âtə lə̂ mbëtï, bëte apö ndə̂ mê wätə̂ lëge pö, kə̈ wâ ndə̂kə̂ pa akrə za su yê pânə̈.»

⁶ Tche kâ tô rə̂ sə̈ mê päkëdə̂: «A mbô rə̂ nə̂! Më wätə̂ kêsâ nə̈, kə̈ wâtə̂ kə̂ ka ndə̂nə̈, më wä dokʉ̈tchê tə̂ arə gbɛ̂, kə̂ wâtə̂ adɨ̂ arə gbɛ̂. Akrə ndə̂ tchə̂lə̂ gɨ̈ yê hrô la gʉ ngû, mê zadje küma ngû ndə̂ âza tchîsûwu sə̈ tchë ndə̂kə̂ pa tche ndjo rə̂ ämbämbänə̈.

⁷ Akrə ndə̂ tche rô la gbôgbô ndjoa ëtə̂ manə̈, tchê gboadje ngâ rə tchânə̂ mê, mê wadje tə̂ Ndjapä ndə̂ yê ânyë tchê wadje tə̂ bechë ndə̂ mê.

⁸ Andə̂ a-earə̂ gbugbu la azü ndə̂ andjë zâbô su andjê zâ sə̈ Ndjapä la a-earə̂ ngbongbo rə la a-earə̂ kə̂ won tchô la a-earə̂ kə̂ pu aɛ̈chë âdəndjë aköchë katchôgbɛ̂ la a-earə̂ yëwä la a-earə̂ kə̂ voga angakʉ̈lä la a-earə̂ yepa gbɛ̂; tchô ndə̂ andjê kä bhâlə̂ gbölö tïmï wo ndə̂ sûfre, ndə̂ âwâtə̂ bïchuû kuzü.»

Täfo Jerûzalêmo

⁹ Ngâ ânje balë lə̂ gbâtə̂ aânje mïndûu manə̈ bïchuû nə̂ kə̈ tô rə̂ sə̈ mê päkëdə̂: «Nə atâ, mê nyiadje sə̂ bechë-ɛ̈chë ndə̂ tche wâtə̂ ɛ̈chë ndə̂ Ngbavö Ɛ̈bro-ngbaga sə̈ mö.» Aânje mïndûu manə̈ bïchuû nə̈ lâme kʉ̂ akangûchi mïndûu manə̈ bïchuû ndə̂ adɨ̂ arə nyonyo mïndûu manə̈ bïchuû tchânə̂ andjê.

¹⁰ Kpɨ̂ki Yingö tchû mê kproô, ânyë ânje nə̈ rô la mê bhâlə̂ kêkê gbölö küma aga. Tche nyîsə̂ tchôtchô gö ndə̂ âdâka gbɛ̂ sə̈ mê, Jerûzalêmo ndə̂ âtô bhâ lafô ndə̂ Ndjapä jrê rə̂ atə̂ bêche.

¹¹ Golowäre ndə̂ Ndjapä kä lakə̂ tcho lə̂nə̈. Gö nə̈ tchö batə̂ ngâ täme ndə̂ rə̈ nə̈ wû pä jâsepe ndə̂ a wun tchô lə̂nə̈ ngrôô batə̂ krïstâle.

¹² Gö nə̈ wä la gbadja ndə̂ âmî ânyë kə̈ gû atə̂ lafô, äwä la amanda lə̂ könô gbɛ̂ tchêpâ nə̈ bïchuû ndə̂ aânje lə̂ könô gbɛ̂ tchêpâ nə̈ bïchuû wun tchô pânə̈. Pâ amanda nə̈, a mbö arə̈ azü pâ amawo lə̂ könô gbɛ̂ tchêpâ nə̈ bïchuû ndə̂ Isarayële.

¹³ Amanda gbadja nə̈ wä vötaâ ndəkrʉ nə̈ balë balë: Vötaâ dəsə̂nə̈ ndə̂ lo wutu tâ, vötaâ dəpâ aga, vötaâ də ginikî ânyë vötaâ dəsə̂nə̈ ndə̂ lo li tâ.

¹⁴ Gbadja gö nə̈ krʉ̈ pâ ada täme lə̂ könô gbɛ̂ tchêpâ nə̈ bïchuû ndə̂ a mbô arə̈ abadjângele lə̂ könô gbɛ̂ tchêpâ nə̈ bïchuû ndə̂ Ngbavö Ɛ̈bro-ngbaga ëpânə̈.

¹⁵ Ânje ndə̂ tche tô pö sə̈ mê lâme, tche zä mɛ̂tere ëtchânə̂ yê batə̂ wärə̈ ndə̂ a mbô rə̂ la lôlo ndə̂kə̂ dɨ kə̂ gu ndə̂ gö nə̈ la amanda nə̈ la gbadja nə̈.

¹⁶ Kʉ̂tê gbadja gö nə̈ wä voanə̈, ânyë kə̂ gu ndə̂ atchô ndəkrʉ nə̈ wä balë. Ânje nə̈ dɨ̂ mɛ̂tere gö nə̈ la wärə̈: Kə̂ gu ndə̂nə̈ wä kïlömɛ̂tere sâke bïchuû la ngbangbo bïchuû la tə̂ akrə gbɛ̂ (2 220). Kə̂ gu ndə̂ ngrɨ̈ngrɨ̈ nə̈, la ndöndö nə̈, lakə̂ gu ndə̂nə̈ atə̂ lafô wä nyɛ̂ɛ̂ balë.

¹⁷ Tche gbɨ̈ ndjë wû tə̂ gbadja nə̈: Kə̂ gu ndə̂nə̈ atə̂ lafô wä mɛ̂tere tə̂ azü vötaâ la lə̂ könô gbɛ̂ tchêpâ nə̈ bïchuû (72). Ânje nə̈ gbɨ̈ wû tâ batə̂ rə̂ ndə̂ akrə gbɨ wû tə̂ rə.

¹⁸ A mbö gbadja nə̈ la täme ndə̂ jâsepe, kə̈ mbô gö nə̈ la tchôtchô lôlo ndə̂ âwâ batə̂ krïstâle ndə̂ a wun tchô lə̂nə̈ ngrôô.

¹⁹ A mbö ada gbadja gö nə̈ la atäme ngbî ngbî ndə̂ gbölö makətche: Dokʉ̈ nə̈ də̈ jâsepe, bïchuû nə̈ də̂ säfîre, vötaâ nə̈ də̂ kälësëdöwâne, voanə̈ nə̈ də̂ ëmërôde,

²⁰ mïndûu nə̈ də̂ Särädönîkese, mïndûu manə̈ balë nə̈ də̂ särëdöwâne, mïndûu manə̈ bïchuû nə̈ də̂ krïzölîte, mïndûu manə̈ vötaâ nə̈ də̂ bërîle, mïndûu manə̈ voanə̈ nə̈ də̂ töpâze, lə̂ könô gbɛ̂ nə̈ də̂ krïzöprâze, lə̂ könô gbɛ̂ tchêpâ nə̈ balë nə̈ də̂ türëkûâze, lə̂ könô gbɛ̂ tchêpâ nə̈ bïchuû nə̈ də̂ ämëtîsete.

²¹ Amanda lə̂ könô gbɛ̂ tchêpâ nə̈ bïchuû nə̈ də̈ akɨ̂dji lə̂ könô gbɛ̂ tchêpâ nə̈ bïchuû. A mbö manda balë balë la kɨ̂dji balë balë. A mbö gbölö köbo ndə̂ gö nə̈ la tchôtchô lôlo ndə̂ a wun tchô lə̂nə̈ ngrôô.

²² Më wûn-âbo gbölö nda Ndjapä lə̂ gö nə̈ lâme-a, bëte Gbölö Gbïɛ̈ Ndjapä ndə̂ tche wâ la gbôgbô gbɛ̂, tche də̈ gbölö nda Ndjapä, ndjë la Ngbavö Ɛ̈bro-ngbaga.

²³ Gö nə̈ krʉ̂âbo bëte lo âdəndjë nyîpï ndə̂kə̂ ta lə̂nə̈-a, bëte golowäre ndə̂ Ndjapä kä ndə̂ âtcho lə̂nə̈, ânyë Ngbavö Ɛ̈bro-ngbaga kä ndə̂ âdə̂ lâmba nə̈.

²⁴ Azü pâ cho gbɛ̂ nəadje ndə̂sə̂ ngbänga yê, ânyë agbïɛ̈ ndə̂ tchêbêche nəadje la atchôtchô arə ndə̂ andjê sə̈ tchë.

²⁵ A âkä tchu bata amanda gö nə̈ balë tee-a, bëte lə̂ gö lâme tchə̂lə̂ bütchî kä wa bata balë tee-a.

²⁶ A nəadje la golowäre lakə̂ lusə̂tə̂ ndə̂ azü pâ cho sə̈ tchë.

²⁷ Praâbalë ngâ rə ndə̂ kâkpö kä li bata balë lə̂ gö nə̈ tee-a, âdəndjë a-earə̂ kə̂ mbo agbölö angbongbo rə, âdəndjë apö yepa. Praâbalë azü ndə̂ andjë li bhâye də̈ kütû azü ndə̂ a mbô rə̈ andjê lə̂ mbëtï ndə̂ tchîsûwu ndə̂ Ngbavö Ɛ̈bro-ngbaga.