Apökälîbïchi 20 - Mbëtï Ndjapä: TÄFO MADƗ̈

Pö ndə̂ angû sâke balë

¹ Pânə̈ më wûn ngâ ânje ndə̂ tche tô bhâ lafô kə̈ jrê, kə̈ zâ kûlïɛ̈ manda ndə̂ gbölö kudû ndə̂ tchə̂lə̂ nə̈ bû biî la ngâ gbölö djingîli tchânə̂ yê.

² Tche zâ gia ndə̂ tche wâ batə̂ mbölëngä lâme, ndə̂ tche wâtə̂ bəndɨ ɛ̈krʉ̂, ndə̂ tche də̂ Jâbolo âdəndjë Satäa, kə̈ î tchë la djingîli nə̈ ngbâ ngû sâke balë.

³ Ânje nə̈ yî tchë bhâlə̂ gbölö kudû ndə̂ tchə̂lə̂ nə̈ bû biî lâme, kə̈ nâ manda nə̈, kə̈ pî tchêpâ nə̈ kpolo-ê, ndə̂kə̂ pa gia ndə̂ tche kʉ̂ mbölëngä lâme ka bolo bata azü pâ cho bôlo-ê, zoo ndə̂kə̂ pa ngû sâke balë nə̈ ro ânyë. La tchêngbâ nə̈ a ji tchë ndə̂ kpîɛ̂kpîɛ̂ lö.

⁴ Pânə̈ më wûn angendë-gbïɛ̈, ânyë a zâ gbôgbô sə̈ andjanə̈ ndə̂ andjë sə̂ pânə̈ ndə̂kə̂ wa ngbanga. Më wûn ndjë avrö azü ndə̂ a wâ gɨ̈ andjê bëte rə̂ ndə̂ andjë wûnsə̂ apö pâ Jezü ânyë kə̈ nyîsə̂ nə̈, ndjë la pö Ndjapä ndə̂ andjë mû rə̂. Andjë gʉ̂teabô tchâtchâ gia nə̈-a, âdəndjë nyîsɨ̂ yê-a, a gbôâbo ndjë sɨ̂nyî gia nə̈ pâ la andjê âdəndjë pâ könô andjê-a. Andjë jö lə̂ kuzü ânyë kə̈ mbô kümändëmä la Krîsiti lə̂ ngû sâke balë.

⁵ Adɨ̂ akuzü nə̈ wâbô ndə̂kə̂ jo lə̂ kuzü-a, zoo ngû sâke balë nə̈ ro ânyë. Dokʉ̈ kə̂ jo ndə̂ akuzü kä lâme.

⁶ Mômô kä tə̂ azü ndə̂ andjë jô tə̂ dokʉ̈ kə̂ jo ndə̂ akuzü! Andjë wätə̂ azü ndə̂ Ndjapä, ânyë bïchuû kuzü wâbo la kümändëmä pâ andjê-a. Andjê wadje tə̂ a-earə̂ kə̂ wa ngela ndə̂ Ndjapä la andə̂ Krîsiti, andjê mboadje kümändëmä la Krîsiti lə̂ ngû sâke balë.

Ndjapä rô Satäa la gbôgbô nə̂

⁷ Ndə̂ ngû sâke balë nə̈ âsə̈ ro, a jiadje Satäa lə̂ kânga ndə̂ yê,

⁸ ânyë tchê eadje ndə̂kə̂ bolo azü pâ cho gbɛ̂, ndə̂ ânyîndə̂ kə̂ to rə̂ pä Gôgo la Magôgo. Tchê paladje andjê bëte kʉ̈ʉ̈, kə̂ ngba ndə̂ andjê wadje ndjë batə̂ mïndü tə̂ maga gbölö ngû ngbro.

⁹ Andjë nə̈ kupâ cho gbɛ̂, kə̈ tâkpa ndə̂ gö ndə̂ azü ndə̂ Ndjapä batə̂ gbâdjâ, gö ndə̂ Ndjapä nyîndə̂ nə̈. Praâbalë wo tô bhâ lafô kə̈ tê ânyë kə̈ jû andjê.

¹⁰ Käko Jâbolo ndə̂ tche bôlo andjê, a yî tchë bhâlə̂ gbölö tïmï wo ndə̂ sûfre ndrotə̂ gia nə̈, la earə̂ ndə̂ma ndjapä ndə̂ yepa lâme. Andjê wun-adje yûkü lə̂nə̈ dalobiî pïï etə̂.

Adɨ̂ kə̂ wa ngbanga

¹¹ Pânə̈ më wûn ngâ gbölö grôgrô ngendë-gbïɛ̈ la akrə ndə̂ tche sə̂ pânə̈. Tchêlafô la tchêbêche rô tchâtchu yê, ânyë a kä wûn bata rə̂-a.

¹² La tchêngbâ nə̈ më wûn akuzü la agbölö azü la akpîɛ̂kpîɛ̂ azü ndə̂ andjë krʉ̂ tchâtchu ngendë-gbïɛ̈ nə̈. A vrô tchêla ambëtï. A kâ vrô tchêla ngâ mbëtï, ndə̂ a mbô rə̈ azü ndə̂ andjë wâ la tchîsûwu lə̂nə̈. A wâ ngbanga pâ akuzü gundə̂sə̂ rə ndə̂ andjë mbô rə̂ batə̂ rə̂ ndə̂ a mbô rə̂ lə̂ ambëtï.

¹³ Gbölö ngû ngbro kʉ̂ azü ndə̂ andjë tchû lə̂ yê ësûwu. Kuzü la tchô ndə̂ akuzü, andjë kʉ̂ ndjë akuzü ësûwu. A wâ ngbanga pâ akrə balë balë gundə̂sə̂ rə ndə̂ tche mbô rə̂.

¹⁴ A yî kuzü la tchô ndə̂ akuzü lə̂ gbölö tïmï wo. Tïmï wo nə̈ lâme də̈ bïchuû kuzü.

¹⁵ Akrə balë balë gbɛ̂ ndə̂ a gbôâbô rə̈ yê gbô lə̂ mbëtï ndə̂ tchîsûwu, a âyiadje tchë lə̂ gbölö tïmï wo.