Apökälîbïchi 2 - Mbëtï Ndjapä: TÄFO MADƗ̈

Mbëtï ndə̂ a wân rə̂ sə̈ Egilîze ndə̂ Ëfêze

¹ «Amö mbo mbëtï âtə kə̈ wân rə̂ sə̈ ânje ndə̂ Egilîze ndə̂ Ëfêze, kə̂ to rə̂ lə̂nə̈ päkëdə̂: «Tchanə̈ ndə̂ tche kʉ̂ akêkêrə̂ mïndûu manə̈ bïchuû ëtchânə̂ yê də ndôkö, ânyë kə̈ sə̂ lakə̂ nə lə̂ gûtə̂ ada-lâmba mïndûu manə̈ bïchuû ndə̂ a mbô rə̂ la lôlo lâme, tche tö rə̂ kâkë:

² Më wûnsə̂ akua ndə̂ zə̈ nə̂, ndjë la yûkü ndə̂ mo wûn rə̂ lakə̂ mbo kua ndə̂ zə̈. Më wûn ndjë sə̂ köbo ndə̂ mo rʉatə̂ su zə̈ lâme nə̂. Më wûnsə̂ nə̈ nə̂ pä mo wâbo ndə̂kə̂ rʉatə̂ su zə̈ la angbongbo azü-a. Azü ndə̂ andjë tô rə̂ pä anyë də̈ abadjângele lâme, ndə̂ mo pû apö pâ andjê, ânyë kə̈ wûnsə̂ nə̈ pä andjë də̈ a-earə̂ yepa.

³ Mo wünsə̂ kə̂ rʉatə̂ su zə̈, mo wün yûkü bëte rə̈ mê, kə̈ zôgoabô-a.

⁴ Praâbalë rə ndə̂ më nyîndə̂ kə̂ gbɨtɨ tü zə̈ pânə̈ də̈ rə̂ ndə̂, kə̂ nyində̂ mê ndə̂ mo nyîndə̂ mê dokʉ̈tchê lâme, mo gbôtə̂ köbo nə̈ nə̂.

⁵ Amö rɨ su zə̈ tə̂ tchô ndə̂ mo tô tâ ânyë kə̈ tê lâme. Amö gbotə̂ bəndɨ kə̂ mbo rə ndə̂ zə̈ lâme-ê, kə̂ ka ëpâ adokʉ̈ akua ndə̂ zə̈. Âdə mo âmboabô mbô tâ käko, mê nəadje pu mö kə̂ gi da lâmba ndə̂ zə̈ lə̂ kpâlâ nə̈ chï, bëte rə̂ ndə̂ mo kôsə̂ kə̂ gbotə̂ ngbongbo köbo zə̈ lâme.

⁶ Praâbalë rə ndə̂ âwâtə̂ tchôtchô nə̈ dəndə̂ zə̈ wä kâkë: Mo kösə̂ kə̂ mbo rə ndə̂ azü ndə̂ andjë sə̂ lə̂ ngâ kpûlû ndə̂ a ê rə̂ tâ pä Nïköläyîte, mëmê ndjë gbɛ̂ su mê kösə̂ nə̈.

⁷ «Akrə ndə̂ tche wâ la tü, äwäpä tche dje pö ndə̂ Yingö tô rə̂ sə̈ a-Egilîze! «Akrə ndə̂ tche rô lə̂ arə gbɛ̂ la gbôgbô, mê kʉadje alêlê yö ndə̂ âza tchîsûwu sə̈ akrə sə̈ tchë, ndə̂kə̂ pa tche zɨ rə̂. Alêlê yö nə̈ lâme wä bhâlə̂ paradï ndə̂ Ndjapä.»

Mbëtï ndə̂ a wân rə̂ sə̈ Egilîze ndə̂ Sïmîrine

⁸ «Amö mbo mbëtï kə̈ wân rə̂ sə̈ ânje ndə̂ Egilîze ndə̂ Sïmîrine, kə̂ to rə̂ lə̂nə̈ päkëdə̂: «Tchanə̈ ndə̂ tche wâ dokʉ̈tchê tə̂ arə gbɛ̂ ânyë kə̈ wätə̂ kə̂ ka ndə̂ arə gbɛ̂, ndə̂ tche tchû alême ânyë kə̈ kâ wâ la tʉ̈rʉ̂ la yê lâme, tche tö rə̂ päkëdə̂:

⁹ Më wûnsə̂ arə nyonyo ndə̂ zə̈ la yûkü ndə̂ zə̈ nə̂, praâbalë mo kä la rə ndə̂ zə̈ tâ! Angâ azü tö rə̂ pä anyë də̈ ajuîfu, dëkë andjë wâbo tə̂ ajuîfu-a, andjë də̈ kpûlû ndə̂ azü ndə̂ Satäa. Angbongbo pö ndə̂ andjë to rə̂ tə̂ zə̈ lâme, më wûnsə̂ nə̈ nə̂!

¹⁰ Âwâbo pä mo wa la wawa yûkü ndə̂ mô wun-adje rə̂ lâme-a. Amö djë pö âtə: Jâbolo vuadje nyê, kə̂ yiadje angâ azü lə̂ gbâtə̂ nyê lə̂ nda kânga. Nyê wun-adje yûkü lə̂ lö lə̂ könô gbɛ̂. Äwäpä mo mbo rə gundə̂sə̂ pö ma mê ndjoa ëtə̂ kuzü, ânyë mê zadje kurône ndə̂ tchîsûwu ndə̂ logbɛ̂ logbɛ̂ sə̈ mö.

¹¹ «Akrə ndə̂ tche wâ la tü, äwäpä tche dje pö ndə̂ Yingö tô rə̂ sə̈ a-Egilîze! «Akrə ndə̂ tche rô lə̂ arə gbɛ̂ la gbôgbô, tchê tchuabô bïchuû kuzü tee-a.»

Mbëtï ndə̂ a wân rə̂ sə̈ Egilîze ndə̂ Pêregâme

¹² «Amö mbo mbëtï âtə kə̈ wân rə̂ sə̈ ânje ndə̂ Egilîze ndə̂ Pêregâme kə̂ to rə̂ lə̂nə̈ päkëdə̂: «Tchanə̈ ndə̂ tche zâ besala ndə̂ manə̈ kî dəkalâ dəkalâ lâme to rə̂ kâkë:

¹³ Më wûnsə̂ tchô ndə̂ mo lô tâ nə̂, tchô nə̈ lâme wätə̂ ngendë-gbïɛ̈ ndə̂ Satäa. Praâbalë mo zätə̂ zə̈ gbɛ̂ sə̈ mê, mo vûâbo sə̂ su zə̈ ndə̂ mo zâ rə̂ sə̈ mê-a. Ndjë, tə̂ lo nə̈ ndə̂ a wôn Äntïpâse bhândə̂ nyê, sə̂ tchô ndə̂ Satäa sə̂ tâ. Äntïpâse nə̈ də̈ akrə ndə̂ tche mû pö pâ mê djîrə̂. Lə̂ arə lâme gbɛ̂ gbô su zə̈ kä pâ mê.

¹⁴ Praâbalë angâ arə kä tâ ndə̂ më nyîndə̂ kə̂ gbɨtɨ tü zə̈ pânə̈: Angâ azü kä bhândə̂ zə̈ ndə̂ andjë zâ tchêngbâ Bälâme lakə̂ nyisə̂ rə ndə̂ yê. Bälâme zä wängö alême sə̈ Bälâke ndə̂kə̂ pa tche dro kû tə̂ abechë gö ndə̂ Isarayële lakə̂ zro andjê ndə̂kə̂ pa andjë zɨ gûsû ndə̂ a wâ rə̂ la ngela sə̈ angakʉ̈lä, ndjë ndə̂kə̂ gbotə̂ köbo lëge Ndjapä.

¹⁵ Käko ndjë angâ azü kä tâ bhândə̂ zə̈ ndə̂ andjë zâ tchêngbâ a-earə̂ kə̂ nyisə̂ rə ndə̂ a-Nïköläyîte.

¹⁶ Amö gbotə̂ bəndɨ kə̂ mbo rə ndə̂ zə̈-ê, ârə̂ âdəabô də̂ käko, më ânə pu mö angangaâtə, kə̂ mbo kʉ̈ʉ̈ la andjê la besala ndə̂ âsə lakə̂ wutu lə̂ ma mê.

¹⁷ «Akrə ndə̂ tche wâ la tü, äwäpä tche dje pö ndə̂ Yingö tô rə̂ sə̈ a-Egilîze! «Akrə ndə̂ tche rô lə̂ arə gbɛ̂ la gbôgbô, mê zadje mâne ndə̂ gbô rə̂ wâ lə̂ küwû nə̈ la grôgrô täme sə̈ tchë. A mbö ngâ täfo rə̈ ëpâ täme nə̈ lâme, ndə̂ ngâ akrə ndə̂ tche wûnsə̂ nə̈ sə̂âbo-a, praâbalë kütû akrə ndə̂ tche gbo rə̂ kä ndə̂ âwunsə̂ nə̈.»

Mbëtï ndə̂ a mbô rə̂ sə̈ Egilîze ndə̂ Tïyätîre

¹⁸ «Amö mbo mbëtï âtə kə̈ wân rə̂ sə̈ ânje ndə̂ Egilîze ndə̂ Tïyätîre kə̂ to rə̂ lə̂nə̈ päkëdə̂: «Modô ndə̂ Ndjapä, tchanə̈ ndə̂ la yê tchô batə̂ gbölö tïmï wo, ânyë da yê wâ batə̂ ngâ ngbêngbê wɛ̂n ndə̂ a tchôwon kʉ̂tê nə̈ ânyë âsə̂ lakə̂ tchôtchö, tche tö rə̂ päkëdə̂:

¹⁹ Më wûnsə̂ akua ndə̂ zə̈ nə̂, lakə̂ nyində̂ ngâ ndə̂ zə̈, la su zə̈ ndə̂ mo zâ rə̂ sə̈ Ndjapä, la tchôtchô rə ndə̂ mo mbo rə̂ tə̂ azü, lakə̂ rʉatə̂ su zə̈. Më wûnsə̂ nə̈ nə̂ pä akua ndə̂ zə̈ ndə̂ mo mbô rə̂ angaâtə ngbä kə̈ rô anə̈ ndə̂ mo mbô rə̂ dokʉ̈tchê.

²⁰ Praâbalë rə ndə̂ më nyîndə̂ kə̂ gbɨtɨ tü zə̈ pânə̈ də̈ rə̂ ndə̂: Mo gbötə̂ köbo sə̈ Jëzäbêle, ɛ̈chë lâme ndə̂ tche tô rə̂ pâ anyë sə̈ lakə̂ to ndə̂ma Ndjapä. Tche mbö rə̂ pä köbo yu tə̂ azü ndə̂ mê, kə̈ sə̂ lakə̂ nyïsə̂ köbo sə̈ andjê ndə̂kə̂ gbotə̂ köbo lëge Ndjapä, lakə̂ zɨ kɨ̈zɨ̂ ndə̂ a wâ rə̂ la ngela sə̈ angakʉ̈lä.

²¹ Më gbötə̂ lö sə̈ tchë ndə̂kə̂ pa tche gbotə̂ bəndɨ kə̂ mbo rə ndə̂ yê, praâbalë tche nyîâbo ndə̂kə̂ ka pu lëge Ndjapä-a.

²² Bëte rə̂ kä ndə̂ mê yiadje tchë pâ kʉ̈ngrʉ ndə̂ yûkü. Âdə azü ndə̂ andjë sə̂ la tchë köchë la ɛ̈chë lâme, andjê âgboabô gbôtə̂ bəndɨ kə̂ mbo rə ndə̂ andjê, mê âyi ndjë gbölö yûkü tə̂ andjê.

²³ Pâ arə lâme gbɛ̂ më âkä won abechë ndə̂ yê. Käko a-Egilîze gbɛ̂ wun-adje sə̂nə̈ pä më də̈ akrə ndə̂ mê wunsə̂ apö ndə̂ âwâ lə̂ su akrə, la gʉ tə̂ su azü. Mê kʉadje rə sə̈ akrə balë balë lə̂ gûtə̂ nyê gundə̂sə̂ arə ndə̂ tche mbô rə̂.

²⁴ «Praâbalë më tö rə̂ sə̈ nyê, nyënyê adɨ̂ azü gö ndə̂ Tïyätîre, ndə̂ nyë kôsə̂ kə̂ za tchêngbâ andjê la ngbongbo pö ndə̂ andjë nyisə̂ nə̈ lâme, ânyë kə̈ zâbô su nyê zâ pâ rə ndə̂ andjë e rə̂ tâ päkëdə̂: ‹Kə̂ nyisə̂ rə ndə̂ Satäa ndə̂ gbô rə̂ wâ lə̂ küwû nə̈›, më zâbo ngâ kʉ̂ngbô ngbî ëpâ nyê-a.

²⁵ Praâbalë rə ndə̂ nyë wâ la rə̂, nyë bata rə̂ djîrə̂ zoo ëtə̂ lö kə̂ ka ndə̂ mê.

²⁶ «Akrə ndə̂ tche rô lə̂ arə gbɛ̂ la gbôgbô, ânyë kə̈ bâta ndjë akua ndə̂ mê ndjoa ëtə̂ manə̈, mê zadje kümändëmä sə̈ tchë ndə̂kə̂ sə pâ azü ndə̂ angâ agö ngbî.

²⁷ Tchê mboadje kümändëmä pâ andjê la gbôgbô, batə̂ rə̂ ndə̂ a ndjo tchə̂lə̂ lüsû ndə̂ a sôâ rə̂ la cho.

²⁸ «Batə̂ rə̂ ndə̂ mëmê ndjë gbɛ̂ më gbô kümändëmä tchânə̂ Bha mê, mê zadje ndjamunu sə̈ tchë.

²⁹ «Akrə ndə̂ tche wâ la tü, äwäpä tche dje pö ndə̂ Yingö tô rə̂ sə̈ a-Egilîze!»