Apökälîbïchi 19 - Mbëtï Ndjapä: TÄFO MADƗ̈

¹ Pânə̈ më djê ngâ gbölö ôn bhâ lafô batə̂ andə̂ angbängbä kpûlû azü päkëdə̂: «Alelûya! Earə̂ kə̂ tcha azə̂ lə̂ kuzü, voga la gbôgbô wätə̂ andə̂ Ndjapä ndə̂ azə̂!

² Bëte kə̂ wa ngbanga ndə̂ yê wä djîrə̂, ndjë la lëge pö! Bëte tche wâ ngbanga pâ gbölö ɛ̈chë ndə̂ kua ndə̂ yê wâ ndə̂kə̂ pu aköchë katchôgbɛ̂ lâme nə̂, bëte tche ndɨ̂ tchêbêche lə̂ köbosə̂ kə̂ pu aköchë katchôgbɛ̂ ndə̂ yê lâme nə̂. Ndjapä gï ngbongbo rə sə̈ tchë lə̂ köbosə̂ nə̈ ndə̂ tche wôn a-earə̂ kua ndə̂ Ndjapä.»

³ Andjë kâ tô rə̂ päkëdə̂: «Alelûya! Ngʉ̂wo gbölö gö ndə̂ âju sə̈ lakə̂ kenga logbɛ̂!»

⁴ Akpôkpô azü tə̂ akrə gbɛ̂ tchêpâ nə̈ voanə̈, la arə voanə̈ ndə̂ âwâ la tʉ̈rʉ̂ la lâme gʉ̂te lakə̂ voga Ndjapä ndə̂ tche sə̂ lə̂ ngendë-gbïɛ̈ ndə̂ yê lakə̂ to rə̂ päkëdə̂: «Amin! Alelûya!»

Kpülü ndə̂kə̂ to ɛ̈chë ndə̂ Ngbavö Ɛ̈bro-ngbaga

⁵ Käko a djê tchə̂lə̂ ngâ gɨ̈ bhâ lafô dəsə̂ ngendë-gbïɛ̈ nə̈ päkëdə̂: «Nyë vöga Ndjapä nyënyê ndə̂ a-earə̂ kua ndə̂ yê gbɛ̂, nyënyê ndə̂ nyë kpê wa yê, akpîɛ̂kpîɛ̂ azü la agbölö azü!»

⁶ Pânə̈ më djê tchə̂lə̂ ngâ gɨ̈ batə̂ andə̂ kpûlû angbängbä azü, kɨ̈ nə̈ wä batə̂ sɨ̈kɨ̈ gbölö ngû, batə̂ nyïvrö ndə̂ âsoa la gbôgbô. Pö ndə̂ a tô rə̂ kä âtə: «Alelûya! Bëte Gbölö Gbïɛ̈ Ndjapä ndə̂ azə̂ ndə̂ tche wâ la gbôgbô gbɛ̂ jêtə̂ kə̂ mbo kümändëmä ndə̂ yê nə̂.

⁷ Azə̈ wä la mômô, kə̂ ku atə̂ lafô la mômô, kə̂ voga tchë, bëte lö kpülü ndə̂ Ngbavö Ɛ̈bro-ngbaga tâ tâ nə̂, ɛ̈chë ndə̂ tche nyîndə̂ kə̂ to tchë nyîkrətə̂ yê nə̂.

⁸ A zä köbo sə̈ tchë ndə̂kə̂ yu lə̂ba ndə̂ lɛ̂n-ɛn ndə̂ kʉ̂tê nə̈ sə̂ lakə̂ tcho ânyë kə̈ dâka gbɛ̂.» (Lə̂ba ndə̂ lɛ̂n-ɛn nə̈ wä batə̂ adjîrə̂ akua ndə̂ azü ndə̂ Ndjapä mbô rə̂.)

⁹ Ânje nə̈ tô rə̂ sə̈ mê päkëdə̂: «Mbo pö âtə lə̂ mbëtï: Mômô wätə̂ azü ndə̂ a ê andjê ndə̂ kpülü ndə̂kə̂ to ɛ̈chë ndə̂ Ngbavö Ɛ̈bro-ngbaga nə̈!» Tche kâ tô rə̂ päkëdə̂: «Apö lâme də̈ alëge pö ndə̂ Ndjapä.»

¹⁰ Käko më gʉ̂te tchâtchâ ânje nə̈ ndə̂kə̂ voga tchë, praâbalë tche tô rə̂ sə̈ mê päkëdə̂: «Amö mboabô rə mbô käko-ë! Më də̈ ngâ zə̈ earə̂ kua ndjë la angâ zə̈ ndə̂ andjë bâta alëge pö ndə̂ Jezü mû rə̂. Ndjapä kä ndə̂ mo wâ ndə̂kə̂ voga tchë!» Bëte alëge apö ndə̂ Jezü nyîsə̂ nə̈ kä ndə̂ âzâ gbôgbô sə̈ a-earə̂ ndə̂ma Ndjapä ndə̂kə̂ to ndə̂ma yê.

Akrə ndə̂ tche sə̂ pâ grôgrô mbâlâtâ

¹¹ Pânə̈ më wûn tchêlafô ndə̂ âkrô ânyë ngâ grôgrô mbâlâtâ wûtu. Tchanə̈ ndə̂ tche sə̂ pâ yê, rə̈ yê wü päkëdə̂: Djîrə̂ la Lëge pö, tche wä ngbanga, kə̈ mbô kʉ̈ʉ̈ lə̂ köbosə̂ djîrə̂ kə̂ wa ngbanga.

¹² La yê wä batə̂ agbölö tïmï wo, angbängbä akurône kä tə̂ küma yê, a mbö ngâ rə̈ pânə̈, ndə̂ kütû tchetchë balë kä ndə̂ âwûnsə̂ nə̈.

¹³ Tche yü ngâ gbölö lə̂ba ndə̂ jï zâ kʉ̂tê nə̈ gbɛ̂. Rə̈ yê wü päkëdə̂: «Pö Ndjapä.»

¹⁴ Aturûgu ndə̂ tchêlafô zâ tchêngbâ yê pâ agrôgrô ambâlâtâ, kə̈ yû lə̂ba ndə̂ lɛ̂n-ɛn ndə̂ âgrô vuu ânyë kə̈ dâka gbɛ̂.

¹⁵ Ngâ besala ndə̂ manə̈ kî tə̂ gbölösə̂nə̈ wütu lə̂ ma yê ndə̂kə̂ pa tche won azü pâ cho la rə̂. Tchê nyiadje sə̂ köbo sə̈ andjê la gbôgbô kümändëmä, kə̂ nunuadje tchə̂lə̂ ndjî vînye lə̂ loköo ndə̂ mêrâ ndə̂ Ndjapä, ndə̂ tche wâ la gbôgbô gbɛ̂.

¹⁶ A mbö ngâ rə̈ pâ gbölö lə̂ba ndə̂ yê ndjë pâ kü yê, rə̈ nə̈ tö rə̂ päkëdə̂: «Gbïɛ̈ ndə̂ agbïɛ̈ la Gbölö Gbïɛ̈ ndə̂ agbölö gbïɛ̈.»

¹⁷ Pânə̈ më wûn ngâ ânje ndə̂ tche krʉ̂ lə̂ lo. Tche ôn ngbôô sə̈ anyïɛ̈nə̈ ndə̂ andjë wrʉ lafô päkëdə̂: «Nyë nə̈ kə̈ pâlatə̂ nyê bëte kpülü ndə̂ Ndjapä!

¹⁸ Nyë nə̈ kə̈ dê mbë agbïɛ̈, mbë amakündji ndə̂ aturûgu, mbë azü ndə̂ andjë wâ la gbôgbô, mbë ambâlâtâ la a-earə̂ kə̂ kpe la ambâlâtâ, mbë azü gbɛ̂, mbë azü ndə̂ andjë wâbô wâ lə̂ ngbâa, angbâa, ayɛ̈yɛ̈ azü la agbölö azü.»

¹⁹ Pânə̈ më wûn gia nə̈, agbïɛ̈ ndə̂ tchêbêche la aturûgu ndə̂ andjë pâlatə̂ andjê ndə̂kə̂ mbo kʉ̈ʉ̈ la tchanə̈ ndə̂ tche sə̂ pâ mbâlâtâ nə̈, ndjë la aturûgu ndə̂ yê.

²⁰ A zâ gia nə̈, ndjë la earə̂ ndə̂ma ndjapä ndə̂ yepa ndə̂ tche mbô akpɨ̈ngbɨ̈ rə tchâtchu gbölö gia nə̈ lâme. Earə̂ ndə̂ma ndjapä ndə̂ yepa nə̈ kä ndə̂ âmbô rə̂ pä köbo yû tə̂ andjanə̈ ndə̂ andjë gbô nyîsɨ̂ gia nə̈, ânyë kə̈ vôga nyîsɨ̂ yê. A yî gia nə̈ la earə̂ ndə̂ma ndjapä ndə̂ yepa lâme la tʉ̈rʉ̂ la andjê lə̂ gbölö tïmï wo ndə̂ sûfre.

²¹ A wôn adɨ̂ aturûgu ndə̂ yê gbɛ̂ la besala ndə̂ âwûtu lə̂ ma tchanə̈ ndə̂ tche sə̂ pâ mbâlâtâ lâme, ânyë anyïɛ̈nə̈ dê mbë andjê tchə̂lə̂ andjê sɨ̂-î.