Apökälîbïchi 18 - Mbëtï Ndjapä: TÄFO MADƗ̈

Kə̂ te ndə̂ Bäbïlône

¹ Pânə̈ më wûn ngâ ânje ngbî ndə̂ tche tô bhâ lafô ânyë kə̈ jrê. Tche wä la gbölö kümändëmä, ânyë ngbänga yê zâ tchêpâ cho gbɛ̂.

² Tche ôn ngbôô päkëdə̂: «Tche tê nə̂, gbölö Bäbïlône tê nə̂! Angaâtə, ädə̈ tchô ndə̂ angbongbo atchozö sə tâ, ädə̈ sə̂ tchô ndə̂ angbongbo atchozö zatə̂ andjê wü tâ, tchô ndə̂ angbongbo anyïɛ̈nə̈ gbɛ̂ zatə̂ andjê wü tâ, la angbongbo agia gbɛ̂, ndə̂ azü kôsə̂ andjê.

³ Bëte azü pâ cho gbɛ̂ ndjö vɛ̂n-ɛn âmbô andjê lə̂ köbosə̂ kə̂ pu aköchë katchôgbɛ̂ ndə̂ yê lâme. Agbïɛ̈ ndə̂ tchêbêche sə̂ la tchë köchë la ɛ̈chë nə̂, ânyë a-earə̂ waɛ̂che pâ cho gbö arə tə̂ gbölösə̂nə̈ lə̂ köbosə̂ afûfû arə ndə̂ yê ndə̂ ârô masə̂nə̈.»

⁴ Pânə̈ më djê ngâ tchə̂lə̂ gɨ̈ ngbî bhâ lafô päkëdə̂: «Azü gö ndə̂ mê, nyë wütu lə̂ gûtə̂ andjê, ânyë kə̂ ngboabô ngbô tə̂kə̂ mbo angbongbo rə la tchë-ê, ânyë arə nyonyo ndə̂ âwâ ndə̂kə̂ te pâ yê lâme teabô tə̂ pâ nyê-ê.

⁵ Bëte angbongbo arə ndə̂ yê wä ëpânə̈ ëpânə̈, kə̈ kênga zoo kə̈ gbô tchêlafô, ânyë bəndɨ kə̂ mbo rə ndə̂ yê lâme sə̂nə̈ yûâbo tə̂ Ndjapä-a.

⁶ Nyë mbö rə tə̂ yê tiî batə̂ rə̂ ndə̂ tche mbô ndjë rə̂ tə̂ angâ yê. Rə ndə̂ tche mbô rə̂, nyë mbö rə̂ tə̂ yê sûsunə̈ bïchuû. Pî ndə̂ tche sû rə̂ lə̂ kangûchi sə̈ azü lâme, nyë sü andə̂ ye nə̈ sə̈ tchë lə̂ kangûchi sûsunə̈ bïchuû.

⁷ Nyë mbö tchë la gbölö yûkü, la nyonyo gundə̂sə̂ kə̂ lusə̂tə̂ yê la gbölö gʉ ndə̂kə̂ gbo afûfû arə ndə̂ yê tə̂ gbölösə̂nə̈. Bëte tche tö rə̂ la tə̂ yê päkëdə̂: ‹Më sə̈ tchâtə batə̂ ɛ̈chë-gbïɛ̈, më wâbo tə̂ ɛ̈chë lə̂ ndavrö-a, mê səabô lə̂ müä lo balë tee-a.›

⁸ Bëte rə̂ kä ndə̂, kütû lə̂ lö balë, arə nyonyo ndə̂ a nyîkrə rə̂ bëte tchë âteadje pâ yê, arə batə̂: Kuzü la müä la gbölö gʉ, ânyë a âyiadje tchë lə̂ wo. Bëte Gbölö Gbïɛ̈ Ndjapä ndə̂ tche wâ ngbanga pâ yê, tche wä la gbôgbô.»

⁹ Agbïɛ̈ ndə̂ tchêbêche gbɛ̂ ndə̂ andjë sə̂ la tchë köchë la ɛ̈chë, ânyë kə̈ gbô rə lə̂ köbosə̂ afûfû arə ndə̂ yê ndə̂ ârô masə̂nə̈ lâme, andjê kɨadje, kə̂ dɨadje tchə̂lə̂ ma andjê tə̂ pö ndə̂ yê, sə̂nə̈ ndə̂ andjê wun-adje ngʉ̂wo yê ndə̂ âsəadje lakə̂ ju.

¹⁰ Wawa arə nyonyo ndə̂ yê lâme âmboadje andjê, ânyë andjê səadje tə̂ yê ngrɨ̈ bhâchï, ânyë kə̂ toadje rə̂ päkëdə̂: «Nyonyo! Nyonyo giamâ awɛ kä âtə! Bäbïlône, gbölö gö ndə̂ âwâ la gbôgbô! Kütû lə̂ dalo balë a wâ ngbanga pâ zə̈ nə̂!»

¹¹ A-earə̂ waɛ̂che ndə̂ tchêbêche sə̈ ndjë lakə̂ kɨ̈ lakə̂ dɨ tchə̂lə̂ ma andjê tə̂ pö ndə̂ yê, bëte ngâ akrə kä yôâbo akʉ̂ngbô ndə̂ andjê balë-a.

¹² Akʉ̂ngbô nə̈ də̈: Lôlo, la wɛ̂n ndə̂ a mbo rə̂ la makətche, la atäme ndə̂ gbölö makətche la akɨ̂dji, la afûfû alə̂ba ngbî ngbî ndə̂ gbölö makətche, la ayö balë balë gbɛ̂ ndə̂ sə̂kə̂ gbo rə̂ kâkä la arə ndə̂ a mbô rə̂ la jï mbala la arə ndə̂ a mbo rə̂ la yö ndə̂ gbölö makətche la ngbêngbê wɛ̂n la wɛ̂n la afûfû atäme ndə̂kə̂ mbo rə̂ la nda;

¹³ la akʉngôâ yö ngbî ngbî ndə̂kə̂ fa rə̂ la kɨ̈zɨ̂ la ayömbö la mîre la dukâni la vɛ̂n-ɛn la kâdâ la farîni la blë la abâgala la aɛ̈bro-ngbaga la ambâlâtâ la apusu-pûsu ndə̂ ambâlâtâ la angbâa ndjë la vrö azü.

¹⁴ A-earə̂ waɛ̂che nə̈ sə̈ lakə̂ to rə̂ päkëdə̂: «Arə ndə̂ zə̈ gbɛ̂ ndə̂ mo nyîndə̂ nə̈, âyû bhândə̂ zə̈ nə̂, ânyë arə ndə̂ zə̈ ndə̂ âwâtə̂ gbölösə̂nə̈ la afûfû arə ndə̂ zə̈ ndə̂ ârô masə̂nə̈, â yû bhândə̂ zə̈ nə̂, ânyë a âkä gbo bata rə̂ balë tee-a!»

¹⁵ A-earə̂ waɛ̂che ndə̂ andjë gbô arə lə̂ köbosə̂ waɛ̂che lə̂ gö lâme, andjê səadje tə̂ zə̈ ngrɨ̈ bhâchï, la wawa gbölö yûkü ndə̂ mo sə̂ lakə̂ wun rə̂ lâme, ânyë andjê kɨadje lakə̂ dɨadje tchə̂lə̂ ma andjê;

¹⁶ lakə̂ to rə̂ päkëdə̂: «Nyonyo giamâ kä âtə! Nyonyo giamâ kä âtə! Bëte gbölö gö ndə̂ tche yû lə̂ba ndə̂ a mbô rə̂ la lɛ̂n-ɛn lâme, la ngbêngbê lə̂ba ndə̂ gbölö makətche ndə̂ kʉ̂tê nə̈ sə̂ lakə̂ tchôtchö lâme. Bëte kʉ̂tê gö nə̈ gbɛ̂ wä alême la lôlo la atäme ndə̂ gbölö makətche la akɨ̂dji.

¹⁷ Kütû lə̂ dalo balë arə lâme gbɛ̂ ndɨ̂-î!» A-earə̂ kə̂ kpe la ayɛ̈yɛ̈ abatöo gbɛ̂, la azü ndə̂ andjë e la ngâ wrʉ̂, la azü ndə̂ andjë mbo kua lə̂ dju ngû, la azü gbɛ̂ ndə̂ andjë pu kɨ̈zɨ̂ ma andjê la gbölö ngû ngbro, andjë sə̈ ngrɨ̈ bhâchï.

¹⁸ Ndə̂ andjë wûn ngʉ̂wo gö nə̈ ndə̂ âsə̂ lakə̂ ju, andjë tâ wârə̂ lakə̂ to rə̂ päkëdə̂: «Ngâ gö balë wâbo batə̂ gbölö gö âtə-a!»

¹⁹ Andjë vö woye lə̂ küma andjê, andjë kɨ̈ lakə̂ mbo müä lakə̂ ta wârə̂ päkëdə̂: «Nyonyo giamâ kä âtə! Nyonyo giamâ kä tə̂ gbölö gö âtə! Lə̂ köbosə̂ arə ndə̂ tche wâ la rə̂ tə̂ gbölösə̂nə̈ kä ndə̂ a-earə̂ batöo gbô arə ndə̂ andjê, sə̂nə̈ ndə̂ andjë nə la gbölö ngû ngbro. Kütû lə̂ dalo balë, ândɨ̂ndɨ gbɛ̂!»

²⁰ Tchêlafô, amö wa la mômô bëte kə̂ ndɨ ndə̂ yê! Nyënyê ndjë gbɛ̂ nyë wä la mômô azü ndə̂ Ndjapä, la abadjângele la a-earə̂ ndə̂ma Ndjapä! Bëte Ndjapä wâ ngbanga pâ yê nə̂, bëte ngbongbo rə ndə̂ tche mbô rə̂ tə̂ nyê!

²¹ Käko ngâ gbôgbô ânje zâ ngâ täme ndə̂ âwâ batə̂ ngâ gbölö täme ndə̂ a nu rə̂ la blë, kə̈ yî rə̂ bhâlə̂ gbölö ngû ngbro, kə̂ tô rə̂ päkëdə̂: «Käko kä ndə̂ a yiadje gbölö gö Bäbïlône la gbôgbô atə̂ bêche, ânyë a âkä wun bata tchë balë tee-a.

²² A âkä dje bata ndûgû ndə̂ a-earə̂ ɛ̈ngbä bhândə̂ zə̈ tee-a, âdəndjë a-earə̂ kə̂ na kundi, âdəndjë a-earə̂ küdambala la tätälîtä-a. A âkä gbo bata angâ a-earə̂ kə̂ mbo arə ngbî ngbî la känyï bhândə̂ zə̈ balë tee-a, kə̂ kä dje bata sɨ̈kɨ̈ kə̂ nu blë bhândə̂ zə̈ balë tee-a.

²³ Ngbänga lâmba kä tcho bata bhândə̂ zə̈ balë tee-a, a âkä dje bata tchə̂lə̂ gɨ̈ bechë-ɛ̈köchë la bechë-ɛ̈chë ndə̂ andjë totə̂ andjê tə̂ täfo nə̈ balë tee-a. Bëte a-earə̂ waɛ̂che ndə̂ zə̈ wä alême tə̂ agbölö azü tchêbêche, ânyë lə̂ köbosə̂ yëwä ndə̂ zə̈ köbo yu tə̂ azü gö gbɛ̂.»

²⁴ Bhâ Bäbïlône kä ndə̂ jï a-earə̂ ndə̂ma Ndjapä tû, la azü ndə̂ Ndjapä, la azü gbɛ̂ ndə̂ a wôn andjê pâ cho âtə.