Apökälîbïchi 17 - Mbëtï Ndjapä: TÄFO MADƗ̈

Gbölö ɛ̈chë ndə̂ tche pû aköchë katchôgbɛ̂

¹ Käko ngâ ânje balë lə̂ gûtə̂ aânje mïndûu manə̈ bïchuû ndə̂ andjë kʉ̂ akangûchi mïndûu manə̈ bïchuû tchânə̂ andjê, andjë nə̂ kə̈ tô rə̂ sə̈ mê päkëdə̂: «Nə atâ, mê nyiadje sə̂ kə̂ wa ngbanga pâ gbölö ɛ̈chë ndə̂ kua ndə̂ yê wâ ndə̂kə̂ pu aköchë lâme, ndə̂ tche sə̂ pâ maga agbölö ngû.

² Agbïɛ̈ tchêbêche pü ɛ̈chë ndə̂ tche pu aköchë katchôgbɛ̂ lâme, ânyë azü tchêbêche ndjô vɛ̂n-ɛn âmbô andjê, lə̂ köbosə̂ kə̂ pu aköchë katchôgbɛ̂ ndə̂ yê lâme.»

³ Kpɨ̂ki Yingö tchû mê kproô, ânyë ânje nə̈ ê la mê atə̂lə̂ kpaɛ̈gâ. Më wûn ngâ ɛ̈chë ndə̂ tche sə̂ pâ ngbêngbê gia ndə̂ kʉ̂tə̂ yê gbɛ̂ wâ la rə̈ kə̂ dro Ndjapä, tche wä la aküma mïndûu manə̈ bïchuû la adudu lə̂ könô gbɛ̂.

⁴ Ɛ̈chë nə̈ yü ngbêngbê lə̂ba ndə̂ âfû, anyë kə̈ sə̂ lakə̂ tchôtchö, ndə̂ a mbô rə̂ la lôlo, la täme ndə̂ gbölö makətche la akɨ̂dji. Tche zâ kangûchi tchânə̂ yê ndə̂ a mbô rə̂ la lôlo ndə̂ tchə̂lə̂ nə̈ sɨ̂sɨ̈ la agbölö angbongbo arə la arə kâkpö, ndə̂ ânyîndə̂ kə̂ to rə̂ pä arə ndə̂ yê ngbâ kə̂ pu aköchë katchôgbɛ̂ ndə̂ yê lâme.

⁵ A mbô ngâ rə̈ pâ la yê ndə̂ gbô dju nə̈ wâ lə̂ küwû nə̈: «Gbölö Bäbïlône, anyï aɛ̈chë ndə̂ kua ndə̂ andjê wâ ndə̂kə̂ pu aköchë lâme, la agbölö angbongbo arə ndə̂ tchêbêche âtə.»

⁶ Më kâ wûn ɛ̈chë lâme ndə̂ tche ndjô jï azü, ânyë âmbô tchë batə̂ pî. Azü nə̈ lâme də̈ azü ndə̂ andjë wâ ngbî bëte Ndjapä, la azü ndə̂ andjë wûnsə̂ pö pâ Jezü ânyë kə̈ mû rə̂. Lakə̂ wun tchë käko, tchə̂lə̂ küma mê djîngɨli-î.

⁷ Ânje nə̈ kâ tô rə̂ sə̈ mê päkëdə̂: «Tchə̂lə̂ küma zə̈ djïngɨli bëte giamâ? Mê toadje pö lə̂ küwû ndə̂ ɛ̈chë nə̈ lâme sə̈ mö, la andə̂ gia ndə̂ aküma yê wâ mïndûu manə̈ bïchuû la adudu yê lə̂ könô gbɛ̂ lâme.

⁸ Gia ndə̂ mo wûn tchë lâme, tche alême kä tâ la tʉ̈rʉ̂ la yê, praâbalë tche kâ sə̂âbo-a, tchê wutuadje lə̂ gbölö kudû ndə̂ tchə̂lə̂ nə̈ bû biî ndə̂kə̂ e pu kuzü. Azü gö ndə̂ tchêbêche ndə̂ a mbôâbô rə̈ andjê mbô lə̂ mbëtï ndə̂ tchîsûwu dokʉ̈tchê, sə̂nə̈ ndə̂ a mbô tchêbêche, tchə̂lə̂ küma andjê âdjingɨliadje lakə̂ wun gia nə̈, bëte tche wä alême la tʉ̈rʉ̂ la yê, kə̈ kâ wâbo-a, praâbalë tchê kadje ngbâ yê.

⁹ «Tchâtə âtə, äwäpä akrə wunsə̂ rə, küma yê wa lanə̈. Aküma mïndûu manə̈ bïchuû lâme wätə̂ aga mïndûu manə̈ bïchuû ndə̂ ɛ̈chë nə̈ sə̂ pânə̈. Andjë də̈ ndjë agbïɛ̈ mïndûu manə̈ bïchuû:

¹⁰ Andjë mïndûu lə̂ gbâtə̂ andjê tê nə̂, ngânə̈ balë kä lakə̂ mbo kümändëmä angaâtə, mïndûu manə̈ bïchuû nə̈ nə̂âbo dämba-a. Âdə tchê ânə, kə̂ sə kütû ndə̂ kpîɛ̂kpîɛ̂ lö.

¹¹ Gia ndə̂ tche wâ alême la tʉ̈rʉ̂ la yê, ânyë kə̈ kâ sə̂âbô sə̂ lâme-ê, tchetchë la tə̂ yê də̈ ndjë mïndûu manə̈ vötaâ gbïɛ̈ nə̈, tche də̈ ndjë ngâ gbïɛ̈ lə̂ gûtə̂ agbïɛ̈ mïndûu manə̈ bïchuû nə̈, tchê eadje ndə̂kə̂ tchu.

¹² «Adudu lə̂ könô gbɛ̂ ndə̂ mo wûn rə̂ lâme də̈ agbïɛ̈ lə̂ könô gbɛ̂ ndə̂ andjë mbôâbô kümändëmä mbô dämba-ê, praâbalë andjê gboadje gbôgbô ndə̂kə̂ mbo kümändëmä la gia nə̈ lə̂ dalo balë.

¹³ Pö tə̂ su andjê gbɛ̂ wä balë: Äwä ndə̂kə̂ za gbôgbô la kümändëmä ndə̂ andjê sə̈ gia nə̈.

¹⁴ Andjê mboadje kʉ̈ʉ̈ la Ngbavö Ɛ̈bro-ngbaga ânyë Ngbavö Ɛ̈bro-ngbaga nə̈ roadje pâ andjê bëte tche wätə̂ Gbölö gbïɛ̈ ndə̂ agbölö gbïɛ̈ la Gbïɛ̈ ndə̂ agbïɛ̈. Ngbavö Ɛ̈bro-ngbaga nə̈ la azü ndə̂ tche ê andjê ânyë kə̈ dɨ̂ andjê ndə̂kə̂ watə̂ azü ndə̂ yê lâme, andjê roadje pâ agbïɛ̈ lâme la kʉ̈ʉ̈.»

¹⁵ Ânje nə̈ kä tô rə̂ sə̈ mê päkëdə̂: «Angû ndə̂ mo wûn rə̂ lâme wätə̂ azü gö la akpûlû azü la azü ndə̂ angâ agö ngbî la ama gö. Ɛ̈chë ndə̂ kua ndə̂ yê wâ ndə̂kə̂ pu aköchë lâme mbö gö tə̂ maga angû nə̈ lâme.

¹⁶ Âdə andə̂ adudu lə̂ könô gbɛ̂ ndə̂ mo wûn rə̂ lâme la gia nə̈, andjê koadje sə̂ ɛ̈chë ndə̂ kua ndə̂ yê wâ ndə̂kə̂ pu aköchë lâme: Andjê kʉadje arə ndə̂ yê gbɛ̂, kə̂ gboadje tə̂ yê kpändëwä, kə̂ zɨadje mbë yê, ânyë kə̂ choadje tchë la wo.

¹⁷ Bëte Ndjapä zä rə̂ tə̂ su andjê ndə̂kə̂ mbo rə gundə̂sə̂ rə ndə̂ su yê nyîndə̂ nə̈. Su agbïɛ̈ nə̈ gbɛ̂ wä balë ndə̂kə̂ za kümändëmä ndə̂ andjê sə̈ gia nə̈, zoo ndə̂kə̂ pa apö ma Ndjapä mbo gundə̂sə̂ nə̈ ânyë.

¹⁸ «Ɛ̈chë ndə̂ mo wûn tchë lâme də̈ gbölö gö ndə̂ âwâ la kümändëmä pâ agbïɛ̈ ndə̂ tchêbêche.»