Apökälîbïchi 16 - Mbëtï Ndjapä: TÄFO MADƗ̈

Akangûchi mêrâ ndə̂ Ndjapä

¹ Pânə̈ më djê tchə̂lə̂ ngâ gɨ̈ ngbôô ndə̂ âtô bhâlə̂ gbölö nda Ndjapä, ânyë kə̈ tô rə̂ sə̈ aânje mïndûu manə̈ bïchuû lâme päkëdə̂: «Nyë êë kə̈ sû akangûchi mêrâ ndə̂ Ndjapä mïndûu manə̈ bïchuû lâme pâ cho!»

² Dokʉ̈ ânje nə̈ ê kə̈ sû arə ndə̂ âwâ lə̂ kangûchi ndə̂ yê pâ cho. Ngâ ngbongbo ku ndə̂ âgarɨ ânyë kə̂ ka tchô tə̂ gbölösə̂nə̈ zâ kʉ̂tê azü gbɛ̂, ndə̂ sɨ̂nyî gia nə̈ wâtə̂ andjê, ânyë andjë vôga nyîsɨ̂ yê.

³ Bïchuû ânje nə̈ sû arə ndə̂ âwâ lə̂ kangûchi ndə̂ yê lə̂ gbölö ngû ngbro. Ngû nə̈ dôtə̂ yê batə̂ jï krʉkrʉ akrə, ânyë agia gbɛ̂ ndə̂ andjë wâ la tʉ̈rʉ̂ la lə̂ gbölö ngû ngbro tchû-ê.

⁴ Vötaâ ânje nə̈ sû arə ndə̂ âwâ lə̂ kangûchi ndə̂ yê lə̂ agbölö ngû la aküma ngû ânyë âdôtə̂ yê tə̂ jï.

⁵ Më kâ djê tchə̂lə̂ gɨ̈ ânje ndə̂ tche wâ la kümändëmä pâ angû päkëdə̂: «Momö ndə̂ mo wâ ngbî ânyë kə̈ dâka gbɛ̂, momö ndə̂ mo wâ angêta, momö ndə̂ mo wâ tâ alême, momö ndə̂ mo wâ djîrə̂, bëte mo wâ djîrə̂ ngbanga ndə̂ zə̈ nə̂.

⁶ Bëte jï a-earə̂ ndə̂ma zə̈ ndə̂ andjë wâ ngbî bëte mo tü alême tchânə̂ andjê, ânyë angaâtə mo zä jï sə̈ andjê ndə̂kə̂ ndjo rə̂. Rə ndə̂ âwâ ndə̂kə̂ gbo andjê kä lâme!»

⁷ Pânə̈ më djê tchə̂lə̂ gɨ̂ ndə̂ âtô bhâsə̂ gbalâka-ngela nə̈ päkëdə̂: «Ɛn-ɛn, Gbölö Gbïɛ̈ Ndjapä ndə̂ tche wâ la gbôgbô gbɛ̂, kə̂ wa ngbanga ndə̂ zə̈ wä djîrə̂ lə̂ köbosə̂ lëge pö!»

⁸ Voanə̈ ânje nə̈ sû arə ndə̂ âwâ lə̂ kangûchi ndə̂ yê pâ lo. A zâ köbo sə̈ lo nə̈ ndə̂kə̂ ju azü la wo.

⁹ Käko azü jû lə̂ köbosə̂ gbölö tchâkʉ̈wô, andjë drô rə̈ Ndjapä ndə̂ tche wâ la gbôgbô pâ arə nyonyo nə̈ lâme. Praâbalë andjë gbôâbo tə̂ bəndɨ kə̂ mbo rə ndə̂ andjê ndə̂kə̂ voga tchë-a.

¹⁰ Mïndûu ânje nə̈ sû arə ndə̂ âwâ lə̂ kangûchi ndə̂ yê lə̂ ngendë-gbïɛ̈ ndə̂ gia nə̈, ânyë tchô bû biî lə̂ gbölö gö-gbïɛ̈ ndə̂ gia nə̈. Käko azü lô tïmï andjê la nyonyo.

¹¹ Andjë drö Ndjapä ndə̂ tchêlafô, bëte yûkü ndə̂ andjë wûn rə̂ la aku ndə̂ âwâtə̂ andjê lâme. Praâbalë andjë gbôâbo tə̂ abəndɨ kə̂ mbo rə ndə̂ andjê-a.

¹² Mïndûu manə̈ balë ânje nə̈ sû arə ndə̂ âwâ lə̂ kangûchi ndə̂ yê lə̂ gbölö ngû ndə̂ Ə̈frâte. Gbölö ngû nə̈ hrô-ê. Käko agbïɛ̈ ndə̂ andjë tô dəsə̂nə̈ ndə̂ lo wutu tâ, gbô köbo ndə̂kə̂ ro.

¹³ Käko lə̂ ma gia ndə̂ tche wâ batə̂ mbölëngä lâme, më wûn angbongbo atchozö vötaâ batə̂ aletro ndə̂ andjë sə̂ lakə̂ wutu lə̂ ma gia nə̈, ndjë lə̂ ma earə̂ ndə̂ma ndjapä ndə̂ yepa.

¹⁴ Andjë wätə̂ angbongbo atchozö ndə̂ andjë mbo akpɨ̈ngbɨ̈ rə. Andjë ë pu agbïɛ̈ kupâ cho gbɛ̂ ndə̂kə̂ pala andjê bëte kʉ̈ʉ̈ ndə̂ âwutuadje losə̂ gbölö lo ndə̂ Ndjapä ndə̂ tche wâ la gbôgbô gbɛ̂.

¹⁵ «Gbölö Gbïɛ̈ tö rə̂ päkëdə̂: Amö dje rə̂, më âka batə̂ earə̂ ngbä! Mômô kä tə̂ akrə ndə̂ tche lôâbô lô-ê, ânyë kə̈ bâta lə̂ba ndə̂ yê, ndə̂kə̂ pa tche nəabô nə̂ kpâkpändëwä-ê, ânyë a wun-abô ganô ndə̂ yê wûn-î.»

¹⁶ Angbongbo atchozö nə̈ päla agbïɛ̈ nə̈ lə̂ tchô ndə̂ rə̈ nə̈ la ma heborö wû pä Harmagedön.

¹⁷ Mïndûu manə̈ bïchuû ânje nə̈ sû arə ndə̂ âwâ lə̂ kangûchi ndə̂ yê lə̂ yi. A djê ngâ ôn ngbôô lə̂ gbölö nda Ndjapä dəsə̂ ngendë-gbïɛ̈ päkëdə̂: «Âkâ nə̂!»

¹⁸ Käko nyïvrö srô, a djê tchə̂lə̂ agɨ̈, nyïvrö sôâ tə̂ gbölösə̂nə̈, ânyë cho trô tə̂ gbölösə̂nə̈. Ngâ cho trôâbo käko dokʉ̈tchê nə̂-a, ätö tə̂ lo nə̈ ndə̂ akrə sə̂ pâ cho ndjoa ëtə̂ tchô angêta!

¹⁹ Tchə̂lə̂ gbölö gö nə̈ ndjô vötaâ, agö ngbî ngbî pâ cho ndjô gbɛ̂. Käko sə̂ gbölö Bäbïlône tê lə̂ Ndjapä, ndə̂kə̂ pa tche za kangûchi vɛ̂n-ɛn ndə̂ gbölö mêrâ ndə̂ yê sə̈ tchë, tche ndjo rə̂.

²⁰ Adälä gbɛ̂ yû-ê, ânyë a kä wûn-âbo ngâ aga balë-a.

²¹ Agbölö avotäme ndə̂kə̂ lu ndə̂nə̈ wâ ndola kelö tə̂ azü bïchuû, tô bhâ lafô kə̈ tü pâ azü, ânyë azü drô Ndjapä bëte arə nyonyo ndə̂ votäme nə̈ lâme, bëte arə nyonyo nə̈ lâme mbö andjê la yûkü tə̂ gbölösə̂nə̈.