Apökälîbïchi 15 - Mbëtï Ndjapä: TÄFO MADƗ̈

Aânje mïndûu manə̈ bïchuû la adɨ̂ arə nyonyo

¹ Më kâ wûn ngâ gbölö nyîsɨ̂ rə bhâ lafô ndə̂ âdâka, aânje mïndûu manə̈ bïchuû kʉ̂ adɨ̂ arə nyonyo mïndûu manə̈ bïchuû tchânə̂ andjê. Bëte lə̂ köbosə̂ arə nyonyo nə̈ lâme kä ndə̂ Ndjapä mbo adɨ̂ mêrâ ndə̂ yê tratralë-ê.

² Më wûn ngâ rə batə̂ ngû ngbro ndə̂ a wun tchô lə̂nə̈ ngrôô, ndə̂ ârɨ̂nyi tə̂ yê la wo. Azü ndə̂ andjë krʉ̂ pâ ngû ngbro ndə̂ a wun tchô lə̂nə̈ lâme, də̈ azü ndə̂ andjë rôpâ gia nə̈ la gbôgbô, kə̈ rôpâ nyîsɨ̂ yê, ndjë pâ kə̂ ngba ndə̂ rə̈ yê. Akundi ndə̂ Ndjapä kʉ̂ rə̂ sə̈ andjê kä tchânə̂ andjê.

³ Andjë pä düwü ndə̂ Möyîze earə̂ kua ndə̂ Ndjapä, la düwü ndə̂ Ngbavö Ɛ̈bro-ngbaga päkëdə̂: «Gbölö Gbïɛ̈ Ndjapä ndə̂ mo wâ la gbôgbô gbɛ̂, arə könô zə̈ gë tə̂ gbölösə̂nə̈, kə̈ dâka gbɛ̂! Gbïɛ̈ ndə̂ azü tchêpâ cho gbɛ̂, köbo kə̂ mbo rə ndə̂ zə̈ wä djîrə̂ kə̈ wâtə̂ lëge nə̈!

⁴ Gbölö Gbïɛ̈, tchabâ kä ndə̂ âkpeabô wa zə̈ me kpê-ê? Tchabâ kä ndə̂ âkoadje sə̂kə̂ lusə̂ zə̈? Bëte momö balë, mo wä ngbî ânyë kə̈ dâka gbɛ̂, azü pâ cho gbɛ̂ nəadje ndə̂kə̂ voga mö, bëte kə̂ mbo adjîrə̂ rə ndə̂ zə̈ mâtə̂ yê nə̂ kraâ sə̈ andjê.»

⁵ Pânə̈ më wûn gbölö nda Ndjapä bhâ lafô ndə̂ a krô manda nə̈, la ndokʉ̈-madɨ̈ ndə̂ Ndjapä.

⁶ Aânje mïndûu manə̈ bïchuû ndə̂ andjë kʉ̂ arə nyonyo mïndûu manə̈ bïchuû tchânə̂ andjê wûtu lə̂ gbölö nda Ndjapä nə̈. Andjë yü grôgrô lə̂ba ndə̂ âsə̂ lakə̂ tcho ngbɨli ngbɨli, kə̈ î tchə̂lə̂ andjê la wû tchêpâ lə̂ba ndə̂ a mbô rə̂ la lôlo.

⁷ Ngânə̈ balë lə̂ gbâtə̂ arə voanə̈ ndə̂ andjë wâ la tʉ̈rʉ̂ la andjê kʉ̂ akangûchi mïndûu manə̈ bïchuû ndə̂ a mbô rə̂ la lôlo sə̈ aânje mïndûu manə̈ bïchuû. Kangûchi nə̈ lâme sɨ̂sɨ̈ la mêrâ ndə̂ Ndjapä ndə̂ tche wâ pïï etə̂.

⁸ Gbölö nda Ndjapä nə̈ sɨ̂sɨ̈ la ngʉ̂wo, la sɨ̂nyî golowäre la gbôgbô ndə̂ Ndjapä. Akrə balë wâbo ndə̂kə̂ li bhâlə̂ gbölö nda Ndjapä nə̈ dokʉ̈tchê-a, zoo arə nyonyo ndə̂ aânje mïndûu manə̈ bïchuû nə̂ la rə̂ lâme âka ânyë.