Apökälîbïchi 14 - Mbëtï Ndjapä: TÄFO MADƗ̈

Düwü ndə̂ azü ndə̂ Ndjapä tchâ andjê

¹ Më kâ wûn tchô, kə̈ wûn Ngbavö Ɛ̈bro-ngbaga ndə̂ tche krʉ̂ pâ aga ndə̂ Siyön la azü sâke ngbangbo balë la tə̂ azü bïchuû la tchêpâ nə̈ voanə̈ (144 000), ndə̂ a mbô rə̈ yê la rə̈ Bha nə̈ pâ la andjê.

² Më djê ngâ tchə̂lə̂ gɨ̈ ndə̂ âtô bhâ lafô batə̂ gbölö ngû, batə̂ sɨ̈kɨ̈ gbölö nyïvrö ndə̂ âsoa, ânyë tchə̂lə̂ gɨ̈ ndə̂ më djê rə̂ lâme wä batə̂ a-earə̂ kundi ndə̂ andjë sə̂ lakə̂ na kundi ndə̂ andjê.

³ Angbängbä azü nə̈ lâme pä täfo düwü tchâtchu ngendë-gbïɛ̈, tchâtchu arə voanə̈ ndə̂ andjë wâ la tʉ̈rʉ̂ la andjê la akpôkpô azü. Akrə balë wâbo ndə̂kə̂ manda düwü nə̈ lâme-a, kütû azü sâke ngbangbo balë la tə̂ azü bïchuû la tchêpâ nə̈ voanə̈ (144 000) ndə̂ a tchâ andjê bhâ bêche.

⁴ Andjë də̈ azü ndə̂ andjë ndɨ̂âbô tə̂ andjê ndɨ̂ lə̂ köbosə̂ kə̂ pu aɛ̈chë-ê, andjë bäta tə̂ andjê ngbî. Andjë zä tchêngbâ Ngbavö Ɛ̈bro-ngbaga kusə̂ tchô gbɛ̂ ndə̂ tche e tâ. A tchä andjê lə̂ gbâtə̂ azü ndə̂kə̂ pa a kʉ andjê dokʉ̈tchê sə̈ Ndjapä ndjë sə̈ Ngbavö Ɛ̈bro-ngbaga.

⁵ A gbôâbo ngâ pö yepa balë lə̂ ma andjê-a, ngbongbo rə balë wâbo lə̂ andjê-a.

Aânje vötaâ

⁶ Pânə̈ më wûn ngâ ânje ndə̂ tche sə̂ lakə̂ wrʉ ngrɨ̈ lə̂ gûgû tchə̂lə̂ɛtchô, tche wä la Tchôtchô Pö ndə̂ logbɛ̂ logbɛ̂ ndə̂ tche wâ ndə̂kə̂ mu rə̂ sə̈ azü gbɛ̂ ndə̂ andjë mbô gö pâ cho, pâ amawo gbɛ̂, lə̂ ama gö gbɛ̂ la azü gö gbɛ̂.

⁷ Tche tö rə̂ ngbôô päkëdə̂: «Nyë kpë wa Ndjapä! Nyë lüsə̂ yê, bëte lo kə̂ wa ngbanga ndə̂ yê wûtu nə̂. Nyë vöga tchanə̈ ndə̂ tche mbô tchêlafô la tchêbêche la gbölö ngû ngbro la aküma ngû!»

⁸ Ngâ bïchuû ânje kâ nə̂ la tchêngbâ dokʉ̈ nə̈ kə̈ tô rə̂ päkëdə̂: «Tche tê nə̂, tche tê nə̂, gbölö Bäbïlône! Tche mbö rə̂ pä azü pâ cho gbɛ̂ ndjo vɛ̂n-ɛn ndə̂ yê, âmbô andjê ndə̂kə̂ pu aɛ̈chë âdəndjë aköchë katchôgbɛ̂ batə̂ tchë!»

⁹ Vötaâ ânje nə̈ nə̂ la tchêngbâ adokʉ̈ nə̈ lâme, kə̈ tô rə̂ ngbôô päkëdə̂: «Akrə ndə̂ tche vôga gia nə̈ la nyîsɨ̂ yê, ânyë sɨ̂nyî yê wâ pâla yê âdəndjë tchânə̂ yê,

¹⁰ tchê ndjoadje vɛ̂n-ɛn ndə̂ mêrâ ndə̂ Ndjapä ndə̂ a rɨ̂nyiabô tchə̂lə̂ nə̈ rɨ̂nyi, ndə̂ âwâ lə̂ kangûchi mêrâ ndə̂ yê! Azü käko wun-adje yûkü bhâlə̂ atïmï wo la sûfre tchâtchu aânje ndə̂ andjë wâ ngbî ânyë kə̈ dâka gbɛ̂ bëte Ndjapä, ndjë tchâtchu Ngbavö Ɛ̈bro-ngbaga.

¹¹ Ngʉ̂wo wo ndə̂ âmbo andjê la yûkü älafô logbɛ̂ logbɛ̂, andjë gbôâbo köbo ndə̂kə̂ yatə̂ andjê-a, dalo âdəndjë la tchə̂lə̂ bütchî-a, andjanə̈ ndə̂ andjë voga gia nə̈ la nyîsɨ̂ yê, la akrə ndə̂ tche gbô sɨ̂nyî rə̈ yê lâme.»

¹² Lo nə̈ tâ tâ nə̂ ndə̂kə̂ pa azü ndə̂ Ndjapä rʉatə̂ su andjê, andjanə̈ ndə̂ andjë bâta ndïɛ̈ ndə̂ Ndjapä ânyë kə̈ zâ su andjê sə̈ Jezü.

¹³ Pânə̈ më kâ djê ngâ tchə̂lə̂ gɨ̈ bhâ lafô päkëdə̂: «Mbo pö âtə lə̂ mbëtï päkëdə̂: ‹Mômô kä tə̂ azü ndə̂ andjë tchû angêta bëte kua ndə̂ Gbölö Gbïɛ̈!› ‹Ɛn-ɛn, Kpɨ̂ki Yingö tö rə̂ päkëdə̂: Mômô kä tə̂ andjê. Andjê yadje tə̂ andjê la tchêngbâ gbôgbô kua ndə̂ andjë mbô rə̂, bëte kua ndə̂ andjë mbô rə̂ lâme zä tchêngbâ andjê!›»

Kə̂ gra andjî rəgʉ pâ cho

¹⁴ Më kâ wûn tchô, kə̈ wûn ngâ grôgrô ndrö, pâ ndrö nə̈ ngâ akrə sə̂ ëpânə̈ batə̂ ngâ modô ndə̂ akrə. Tche yü kurône tə̂ küma yê ndə̂ a mbô rə̂ la lôlo, ngrɨ̈ngrɨ̈ kamba ndə̂ manə̈ kî kä tchânə̂ yê.

¹⁵ Pânə̈ ngâ ânje ngbî wûtu lə̂ gbölö nda Ndjapä, kə̈ ôn ngbôô sə̈ tchanə̈ ndə̂ tche sə̂ pâ ndrö nə̈ lâme päkëdə̂: «Za ngrɨ̈ngrɨ̈ kamba ndə̂ zə̈ kə̈ grâ rəgʉ nə̈, bëte lö ndə̂kə̂ pa a gra ndjî rəgʉ nə̈ tâ tâ nə̂, ânyë rəgʉ tchêbêche drô nə̂!»

¹⁶ Käko tchanə̈ ndə̂ tche sə̂ pâ ndrö nə̈ yî ngrɨ̈ngrɨ̈ kamba ndə̂ yê atə̂ bêche, ânyë a grâ rəgʉ tchêbêche nə̈ gbɛ̂.

¹⁷ Ngâ ânje ngbî wûtu lə̂ gbölö nda Ndjapä bhâ lafô, tche wä ndjë la ngrɨ̈ngrɨ̈ kamba ndə̂ manə̈ kî tchânə̂ yê.

¹⁸ Pânə̈ ngâ ânje ngbî ndə̂ tche wâ la gbôgbô pâ wo, wûtu dəsə̂ gbalâka-ngela. Tche ôn ngbôô sə̈ tchanə̈ ndə̂ tche wâ la ngrɨ̈ngrɨ̈ kamba ndə̂ manə̈ kî lâme päkëdə̂: «Yi ngrɨ̈ngrɨ̈ kamba ndə̂ zə̈ ndə̂ manə̈ kî lâme kə̈ grâ agë vînye pâ cho, bëte lêlê vînye nə̈ drô nə̂.»

¹⁹ Ânje nə̈ yî ngrɨ̈ngrɨ̈ kamba ndə̂ yê pâ cho, kə̈ grâ agë vînye pâ cho nə̈, kə̈ yî rə̂ bhâlə̂ gbölö loköo ndə̂ mêrâ ndə̂ Ndjapä.

²⁰ A däda tchə̂lə̂ andjî vînye nə̈ lə̂ loköo də sûwu gö nə̈. Jï nə̈ sɨ̂ tchə̂lə̂ loköo nə̈, kə̈ wûtu, kə̈ sə̂ lakə̂ kpe. Âdə mbâlâtâ âkrʉ lə̂nə̈, âte tchë tchâ bogâ yê. Jï nə̈ vö katchôgbɛ̂ kə̈ vô ngbâ kïlömɛ̂tere ngbangbo vötaâ.