Apökälîbïchi 13 - Mbëtï Ndjapä: TÄFO MADƗ̈

Pö ndə̂ agia bïchuû

¹ Pânə̈ më wûn ngâ gia ndə̂ tche wûtu lə̂ gbölö ngû ngbro, tche wä la aküma mïndûu manə̈ bïchuû la adudu yê lə̂ könô gbɛ̂. Akurône kä pâ adudu nə̈ balë balë ânyë a mbô arə̈ ndə̂kə̂ dro Ndjapä ëpâ aküma yê balë balë gbɛ̂.

² Gia ndə̂ më wûn tchë lâme kʉ̈ mîrə̂, da yê wä batə̂ andə̂ zogbô, ânyë tchə̂lə̂ ma yê wâ batə̂ andə̂ bämalä. Gia ndə̂ tche wâ batə̂ mbölëngä lâme zâ gbôgbô ndə̂ yê sə̈ tchë, la ngendë-gbïɛ̈ ndə̂ yê la gbölö kümändëmä.

³ Ngâ küma gia nə̈ kʉ̈tə̂ yê la ngâ akrə ndə̂ a tû ku tə̂ yê, ndə̂ tche wâ ndə̂kə̂ tchu la rə̂, praâbalë ku nə̈ lâme nyû-ê. Käko tchə̂lə̂ küma azü tchêbêche gbɛ̂ djîngɨli, ânyë andjë zâ tchêngbâ gia nə̈.

⁴ Azü gbɛ̂ sə̂ lakə̂ voga gia ndə̂ tche wâ batə̂ mbölëngä lâme, bëte tche zä kümändëmä alême sə̈ gia nə̈, ânyë azü gbɛ̂ sə̂ lakə̂ voga gia nə̈ lakə̂ to rə̂ päkëdə̂: «Tchabâ kä ndə̂ âwâ batə̂ gia nə̈? Tchabâ kä ndə̂ âkʉ̂sə̂ kə̂ mbo kʉ̈ʉ̈ la tchë?»

⁵ A zä köbo sə̈ tchë ndə̂kə̂ to apö ndə̂kə̂ bhi gogo, ndjë la apö ndə̂kə̂ dro Ndjapä, kə̈ zâ gbôgbô sə̈ tchë ndə̂kə̂ mbo kümändëmä lə̂ nyîpï tə̂ azü bïchuû la tchêpâ nə̈ bïchuû.

⁶ Tche jêtə̂ kə̂ to ngbongbo pö la rə̈ Ndjapä, lakə̂ dro rə̈ yê, la tchô ndə̂ tche sə̂ tâ, ndjë la azü gö bhâ lafô.

⁷ A zä köbo sə̈ tchë ndə̂kə̂ mbo kʉ̈ʉ̈ la azü ndə̂ Ndjapä ndjë ndə̂kə̂ ropâ andjê la kʉ̈ʉ̈. A zä kümändëmä sə̈ tchë pâ amawo gbɛ̂ la azü gö gbɛ̂ la ama gö gbɛ̂ ndjë pâ cho gbɛ̂.

⁸ Azü gbɛ̂ ndə̂ andjë sə̂ pâ cho vogadje tchë. Azü ndə̂ andjë voga tchë də̈ azü ndə̂ rə̈ andjê wâbô wâ lə̂ mbëtï ndə̂ tchîsûwu ndə̂ Ngbavö Ɛ̈bro-ngbaga, sə̂nə̈ ndə̂ a mbô tchîsûwu. Mbëtï nə̈ də̈ andə̂ Ngbavö Ɛ̈bro-ngbaga ndə̂ a wôn tchë.

⁹ «Akrə ndə̂ tche wâ la tü, äwäpä tche dje pö âtə!

¹⁰ Âdə a âdɨ ngâ akrə ndə̂kə̂ e bëte kua ngbâa, tchê eadje ndə̂ kua ngbâa. Akrə ndə̂ a dɨ̂ tchë ndə̂kə̂ tchu kuzü besala, tchê tchuadje lə̂ köbosə̂ besala. Tchâme kä ndə̂ azü ndə̂ Ndjapä rʉatə̂ su andjê lə̂ su andjê ndə̂ andjë zâ rə̂ sə̈ Krîsiti.»

¹¹ Pânə̈ më wûn ngâ gia ngbî ndə̂ tche wûtu lə̂ cho. Tche wä la adudu yê bïchuû âkʉ̂ andə̂ ngâ ngbavö ɛ̈bro-ngbaga ânyë kə̈ tô pö batə̂ gia ndə̂ tche wâ batə̂ mbölëngä lâme.

¹² Tche mbö kua gbɛ̂ la kümändëmä tchâtchu dokʉ̈ gia nə̈. Tche kʉ̈ azü tchêbêche la azü ndə̂ andjë sə̂ lə̂nə̈ la gbôgbô ndə̂kə̂ voga dokʉ̈ gia nə̈, ndə̂ ku ndə̂ âwâ ndə̂kə̂ won tchë nyû lâme.

¹³ Tche mbö agbölö akpɨ̈ngbɨ̈ rə, zoo kə̈ mbô rə̂ pä wo to bhâ lafô kə̈ jrê atə̂ bêche lə̂ la azü gbɛ̂.

¹⁴ Tche mbö rə̂ pä köbo azü yu la akpɨ̈ngbɨ̈ rə ndə̂ a zâ köbo sə̈ tchë ndə̂kə̂ mbo rə̂ tchâtchu gia nə̈. Tche tö rə̂ sə̈ azü tchêbêche ndə̂kə̂ mbo nyîsɨ̂ gia nə̈ ndə̂ a tû ku tə̂ yê la besala ânyë gbô tchë wâ la tʉ̈rʉ̂ la yê lâme.

¹⁵ A zâ köbo sə̈ bïchuû gia nə̈ ndə̂kə̂ hrʉ yi lə̂ nyîsɨ̂ dokʉ̈ gia nə̈ ânyë nyîsɨ̂ dokʉ̈ gia nə̈ lâme to pö, ndə̂kə̂ won azü gbɛ̂ ndə̂ andjë vôgabô tchë vôga-ê.

¹⁶ Gia nə̈ kʉ̂ azü gbɛ̂ la gbôgbô, akpîɛ̂kpîɛ̂ azü la agbölö azü la a-earə̂ rə la a-earə̂ yûkü la angbâa la azü ndə̂ andjë sə̂âbô sə̂ tchâtchâ ngbâa, ndə̂kə̂ pa a mbo sɨ̂nyî pâ könô andjê də ndôkö âdəndjë pâ la andjê.

¹⁷ Akrə balë wâbo ndə̂kə̂ yo rə âdəndjë ndə̂kə̂ ka rə ndə̂ tche wâbô wâ la sɨ̂nyî nə̈ tə̂ yê-a. Sɨ̂nyî nə̈ də̈ rə̈ gia nə̈ lakə̂ ngba ndə̂ rə̈ yê.

¹⁸ Sə̂nə̈ ndə̂kə̂ pa küma wa lanə̈ kä. Akrə ndə̂ tche wûnsə̂ rə, äwäpä tche dɨ kə̂ ngba ndə̂ gia nə̈, bëte kə̂ ngba ndə̂ gia lâme wä batə̂ rə̈ ngâ akrə, ânyë kə̂ ngba ndə̂nə̈ wä ngbangbo mïndûu manə̈ balë la tə̂ azü vötaâ tchêpâ nə̈ mïndûu manə̈ balë (666).