Apökälîbïchi 12 - Mbëtï Ndjapä: TÄFO MADƗ̈

Pö ndə̂ ɛ̈chë la gia ndə̂ tche wâ batə̂ mbölëngä

¹ Ngâ gbölö nyîsɨ̂ rə wütu bhâ lafô, ngâ ɛ̈chë yü lo batə̂ lə̂ba, nyîpï kä tchâtchâ da yê, kə̈ yû kurône ëtə̂ küma yê ndə̂ akêkêrə̂ lə̂ könô gbɛ̂ tchêpâ nə̈ bïchuû wâ tâ.

² Tche wä la güzu kə̈ wâ ndə̂kə̂ zɨ bechë ânyë kä tchə̂lə̂ nə̈ mbô rə̂ ânyë tche sə̂ lakə̂ ta wârə̂ la kɨ̈.

³ Käko ngâ nyîsɨ̂ rə ngbî kâ wûtu bhâ lafô, ngâ gbölö ngbêngbê gia ndə̂ tche wâ batə̂ mbölëngä, tche wä la aküma mïndûu manə̈ bïchuû la adudu yê lə̂ könô gbɛ̂, ânyë pâ aküma nə̈ balë balë gbɛ̂ kurône kä pânə̈ balë balë gbɛ̂.

⁴ Lə̂ akpûlû akêkêrə̂ vötaâ ndə̂ tchêlafô, tche bhî ngâ kpûlû akêkêrə̂ nə̈ balë la dambâ yê, kə̈ yî andjê atə̂ bêche. Tche krʉ̂ ëtchâtchu ɛ̈chë ndə̂ tche wâ ndə̂kə̂ zɨ lâme ndə̂kə̂ pa, gbô rə̂ ndə̂ bechë nə̈ âsə̈ wutu, tche zɨ tchë-ê.

⁵ Ɛ̈chë nə̈ zɨ̂ tə̂ köchë, bechë nə̈ kä ndə̂ ânyiadje sə̂ köbo sə̈ azü pâ cho gbɛ̂ la gbôgbô kümändëmä. A kênga la bechë ndə̂ yê nə̈ bhâ ndrotə̂ Ndjapä la ngendë-gbïɛ̈ ndə̂ yê.

⁶ Âdə andə̂ ɛ̈chë nə̈, tche kpê atə̂lə̂ kpaɛ̈gâ, ânyë Ndjapä nyîkrə ngâ tchô bhâye bëte tchë ndə̂kə̂ pa a kʉ kɨ̈zɨ̂ sə̈ tchë lə̂ lö sâke balë la tchêpâ nə̈ ngbangbo bïchuû la tə̂ azü vötaâ (1 260).

⁷ Käko ngâ kʉ̈ʉ̈ âlafô bhâ lafô. Mïchêle la aânje ndə̂ yê mbô kʉ̈ʉ̈ la gia ndə̂ tche wâ batə̂ mbölëngä lâme ânyë tchanə̈ lâme mbô ndjë kʉ̈ʉ̈ la Mïchêle la aânje ndə̂ yê.

⁸ Praâbalë Mïchêle la aânje ndə̂ yê rôpâ gia ndə̂ tche wâ batə̂ mbölëngä lâme-ê, ânyë ngâ tchô bëte tchë la aânje ndə̂ yê kâ wâbo bhâ lafô-a.

⁹ A yî gbölö gia ndə̂ tche wâ batə̂ mbölëngä lâme atə̂ bêche. Tchetchë kä ndə̂ âwâtə̂ bəndɨ ɛ̈krʉ̂ ndə̂ a ê rə̂ tə̂ yê pä Jâbolo, Satäa earə̂ kə̂ bolo azü pâ cho gbɛ̂. A yî tchë atə̂ bêche, tchetchë la aânje ndə̂ yê.

¹⁰ Pânə̈ më djê ngâ wârə̂ bhâ lafô päkëdə̂: «Angaâtə lö ndə̂kə̂ tcha azü wûtu nə̂! Angaâtə Ndjapä ndə̂ azə̂ nyîsə̂ gbôgbô lakə̂ mbo kümändëmä ndə̂ yê nə̂! Angaâtə kümändëmä kä tchânə̂ Krîsiti ndə̂ yê. Bëte a yî earə̂ kə̂ za pö lə̂ küma angâ azə̂ bhâ lafô nə̂ bhâchï, tchanə̈ ndə̂ tche yi pö lə̂ küma andjê dalobiî tchâtchu Ndjapä ndə̂ azə̂.

¹¹ Praâbalë arə̂mâ ndə̂ azə̂ röpâ yê lə̂ köbosə̂ jï Ngbavö Ɛ̈bro-ngbaga, ndjë lə̂ köbosə̂ pö ndə̂ andjë wûnsə̂ nə̈ ânyë kə̈ mû rə̂, andjë wûn tchîsûwu ndə̂ andjê tə̂ mbämbä rə, kə̈ wâ tchêtchêtchê ndə̂kə̂ tchu.

¹² Käko nyë wä la mômô atchêlafô la azü ndə̂ nyë sə̂ lə̂nə̈! Praâbalë nyonyo kä tə̂ nyê, tchêbêche la gbölö ngû ngbro! Jâbolo jrë pu nyê la mêrâ, bëte tche wûnsə̂ nə̈ nə̂ pä adɨ̂ alö anyê kä ngbâ bata-a.»

¹³ Ndə̂ gia ndə̂ tche wâ batə̂ mbölëngä lâme wûnsə̂ nə̈ pä a yî anyê atə̂ bêche nə̂, tche sə̂ lakə̂ gro tchêngbâ ɛ̈chë ndə̂ tche zɨ̂ modô nə̈ lâme.

¹⁴ Praâbalë a kʉ̂ mbrö gbölö kânda bïchuû sə̈ ɛ̈chë nə̈ ndə̂kə̂ wrʉ la rə̂ atə̂lə̂ kpaɛ̈gâ ndjoa bhâsə̂ tchô ndə̂ a nyîkrə rə̂ ndə̂kə̂ pa a kʉ kɨ̈zɨ̂ sə̈ tchë tâ, lə̂ ngû vötaâ la nyîpï mïndûu manə̈ balë, ngrɨ̈ tə̂ ɛ̈krʉ̂ nə̈.

¹⁵ Käko ɛ̈krʉ̂ nə̈ brô ngû tchə̂lə̂ ma yê batə̂ gbölö ngû la tchêngbâ ɛ̈chë nə̈ ndə̂kə̂ pa akʉ̈la ngû nə̈ ro la tchë-ê.

¹⁶ Praâbalë cho zâ könô sə̈ ɛ̈chë nə̈, kə̈ ôn tchə̂lə̂ ma yê kə̈ djô ngû nə̈ vêrə̂, ndə̂ gia ndə̂ tche wâ batə̂ mbölëngä lâme brô rə̂ ngbâ ɛ̈chë nə̈ lâme.

¹⁷ Gbölö mêrâ mbô gia ndə̂ tche wâ batə̂ mbölëngä lâme tə̂ ɛ̈chë nə̈, ânyë tche ê ndə̂kə̂ mbo kʉ̈ʉ̈ la adɨ̂ azü pâ mawo ndə̂ yê, andjanə̈ ndə̂ andjë kpê wa andïɛ̈ ndə̂ Ndjapä, ânyë kə̈ wâtə̂ azü ndə̂ andjë wûnsə̂ pö pâ Jezü, ânyë kə̈ mû rə̂.

¹⁸ Pânə̈ gia ndə̂ tche wâ batə̂ mbölëngä lâme ê kə̈ krʉ̂ tə̂ maga gbölö ngû ngbro.