Apökälîbïchi 11 - Mbëtï Ndjapä: TÄFO MADƗ̈

Azü bïchuû ndə̂ andjë wûnsə̂ pö pâ Ndjapä

¹ Käko a zâ ngâ wärə̈ sə̈ mê ndə̂ âkʉ̂tə̂ yê la yö ndə̂ a gbɨ wû tə̂ rə la rə̂, ânyë kə̈ tô rə̂ sə̈ mê päkëdə̂: «Alafô kə̈ gbɨ̂ wû tə̂ gbölö nda Ndjapä la gbalâka-ngela, kə̂ dɨ ndjë kə̂ ngba ndə̂ azü ndə̂ andjë voga Ndjapä lə̂nə̈.

² Praâbalë amö gbotə̂ tchô də sûwu ndə̂ gbölö nda Ndjapä nə̈ gii-ï, amö gbɨabô wû gbɨ̂ tâ-ê, bëte a gbôtâ nə̂ ëtchânə̂ azü ndə̂ andjë wûn-âbô sə̂ Ndjapä wûn-î ndə̂kə̂ pa gö ndə̂ âwâ ngbî bëte Ndjapä lâme, andjë dada rə̂ la da andjê lə̂ nyîpï tə̂ azü bïchuû tchêpâ nə̈ bïchuû.

³ Angâ azü ndə̂ mê bïchuû ndə̂ andjë wûnsə̂ pö pâ mê, ndə̂ andjë yû lə̂ba müä, mê wan-adje andjê ndə̂kə̂ to ndə̂ma mê sə̈ azü lə̂ lö sâke balë la ngbangbo bïchuû tchêpâ nə̈ tə̂ azü vötaâ (1 260).»

⁴ Azü bïchuû ndə̂ andjë wûnsə̂ pö pâ mê lâme də̈ ayö bïchuû ndə̂ olivï, la ada-lâmba bïchuû ndə̂ âkrʉ̂ tchâtchu Gbölö gbïɛ̈ ndə̂ tchêbêche.

⁵ Âdə ngâ akrə ânyində̂ kə̂ mbo ngbongbo rə tə̂ andjê, ngâ wo âwutu lə̂ ma andjê kə̂ won a-earə̂ kə̂ kosə̂ andjê. Tə̂ lëge nə̈, âdə ngâ akrə ânyində̂ kə̂ mbo ngbongbo rə tə̂ andjê, käko kä ndə̂ tche tchu.

⁶ Andjë kä la gbôgbô ndə̂kə̂ i tchêlafô, ânyë nyïvrö nyiabô nyî tə̂ lo nə̈ ndə̂ andjë sə lakə̂ to ndə̂ma Ndjapä. Andjë kä la gbôgbô ndə̂kə̂ do ngû tə̂ jï. Andjë kä ndjë la gbôgbô ndə̂kə̂ mbo agbölö arə nyonyo ngbî ngbî pâ cho ëpânə̈ ëpânə̈ batə̂ rə̂ ndə̂ su andjê nyîndə̂ nə̈.

⁷ Âdə andjê âto ndə̂ma Ndjapä nə̈ gbɛ̂ nə̂, gia ndə̂ tche tô bhâlə̂ gbölö kudû ndə̂ tchə̂lə̂ nə̈ bû biî lâme, tchê wutuadje ndə̂kə̂ mbo kʉ̈ʉ̈ la andjê kə̂ roadje pâ andjê, ânyë kə̂ won-adje andjê.

⁸ Krʉkrʉ andjê âsə po pâ gbölö chênga ndə̂ gbölö gö nə̈, kpôsə̂nə̈ ndə̂ a wôn Gbölö Gbïɛ̈ ndə̂ andjê pâ yö ndə̂ gba tâ lâme. A ë rə̂ tə̂ gbölö gö nə̈ lâme lə̂ köbosə̂ ndoka päkëdə̂: Sodômo la Ejîpiti.

⁹ Azü gö, la azü pâ amawo ngbî ngbî, la azü ndə̂ ama gö ngbî ngbî la azü ndə̂ angâ agö ngbî ngbî nəadje ndə̂kə̂ wun krʉkrʉ andjê lə̂ lö vötaâ la dalo lə̂ könô gbɛ̂ tchêpâ nə̈ bïchuû. A nyîâbo ndə̂nə̈ pä a chi krʉkrʉ andjê-a.

¹⁰ Azü pâ cho âsə me la mômô tə̂ pö ndə̂ kuzü azü bïchuû lâme. Andjê mboadje kpülü, kə̂ səadje lakə̂ kʉ tchôtchô rə sə̈ angâ andjê, bëte a-earə̂ ndə̂ma Ndjapä bïchuû lâme yüku andjê tə̂ gêgêe nə̈.

¹¹ Praâbalë la tchêngbâ lö vötaâ la dalo lə̂ könô gbɛ̂ tchêpâ nə̈ bïchuû nə̈ lâme, ngâ yi ndə̂ âza tchîsûwu sə̈ azü tô bhândə̂ Ndjapä, kə̈ nə̂ kə̈ lî lə̂ andjê, ânyë andjë âlafô kə̈ krʉ̂ lafô pâ da andjê. Käko ngâ gbölö wa mbô azü gbɛ̂ ndə̂ andjë sə̂ lakə̂ wun andjê.

¹² A-earə̂ ndə̂ma Ndjapä bïchuû lâme djê tchə̂lə̂ ngâ gɨ̈ ngbôô bhâ lafô ndə̂ âtô rə̂ sə̈ andjê päkëdə̂: «Nyë kënga atâ!» Andjë kênga atə̂ lafô lə̂ ndrö kpôlə̂ la a-earə̂ kə̂ kosə̂ andjê.

¹³ Kpôtə̂ dalo nə̈ lâme, cho trô tə̂ gbölösə̂nə̈. Ngâ tchâkalâ gö nə̈ balë lə̂ gbâtə̂ atchâkalâ gö lə̂ könô gbɛ̂ tû gbɛ̂ ëbêche, ânyë azü sâke mïndûu manə̈ bïchuû (7 000) tchû lə̂ köbosə̂ cho ndə̂ âtrô lâme. Wawa rôpâ andjanə̈ ndə̂ andjë sə̂ ngbânə̈ lâme ânyë andjë sə̂ lakə̂ voga Ndjapä ndə̂ tchêlafô.

¹⁴ Bïchuû rə nyonyo nə̈ rô nə̂, ânyë vötaâ rə nyonyo nə̈ ndô tə̂kə̂ wutu nə̂.

Mïndûu manə̈ bïchuû tätälîtä nə̈

¹⁵ Mïndûu manə̈ bïchuû ânje nə̈ hrʉ̂ tätälîtä ndə̂ yê. Më djê sɨ̈kɨ̈ tchə̂lə̂ agbölö gɨ̈ bhâ lafô ndə̂ âtô rə̂ päkëdə̂: «Angaâtə, kə̂ mbo kümändëmä pâ cho wâ nə̂ tə̂ andə̂ Gbölö Gbïɛ̈ ndə̂ azə̂ la Krîsiti ndə̂ yê. Tche âmbo kümändëmä pïï etə̂!»

¹⁶ Akpôkpô azü tə̂ akrə gbɛ̂ tchêpâ nə̈ voanə̈ ndə̂ andjë sə̂ lə̂ ngendë-gbïɛ̈ ndə̂ andjê tchâtchu Ndjapä tû gbɛ̂ bêche kə̈ chî küma andjê tə̂ cho. Andjë sə̂ lakə̂ voga Ndjapä

¹⁷ lakə̂ to rə̂ päkëdə̂: «Gbölö Gbïɛ̈ Ndjapä ndə̂ mo wâ la gbôgbô gbɛ̂, momö ndə̂ mo wâ tâ, ndə̂ mo wâ alême, ârâ zä ayîabâ sə̈ mö, bëte gbôgbô ndə̂ zə̈ ndə̂ mo nyîsə̂ nə̈ lakə̂ mbo kümändëmä ndə̂ zə̈.

¹⁸ Azü ndə̂ agö ngbî âlafô la mêrâ, praâbalë mêrâ ndə̂ zə̈ kä ndə̂ âwûtu lâme. Lo kə̂ wa ngbanga ndə̂ akuzü wûtu nə̂. Lo ndə̂kə̂ kʉ rə sə̈ a-earə̂ kua ndə̂ zə̈ a-earə̂ ndə̂ma Ndjapä, la azü ndə̂ zə̈ gbɛ̂ ndə̂ andjë kpê wa zə̈, akpîɛ̂kpîɛ̂ azü la agbölö azü. Lo ndə̂kə̂ ndɨ azü ndə̂ andjë ndɨ tchêbêche kä!»

¹⁹ Gbölö nda Ndjapä ndə̂ âwâ bhâ lafô manda nə̈ krô-ê, ânyë akrə wä ndə̂kə̂ wun sandûgu-madɨ̈ bhâlə̂ gbölö nda Ndjapä lâme ämbänə̈. Käko nyïvrö srô, a djê tchə̂lə̂ gɨ̈ azü, nyïvrö sôâ, cho trô ânyë adjâdjagba avotäme tû.