Biblia Todo Logo
Bìoball air-loidhne

- Sanasan -

Apökälîbïchi 10 - Mbëtï Ndjapä: TÄFO MADƗ̈


Ânje la yɛ̈yɛ̈ mbëtï

1 Më kä wûn ngâ gbôgbô ânje ndə̂ tche tô bhâ lafô ânyë kə̈ sə̂ lakə̂ jre atə̂ bêche. Ngâ ndrö gʉ̂â tchë gbɛ̂ batə̂ lə̂ba, ânyë yîngi djîpi tə̂ küma yê. Tchâtchu yê wä batə̂ lo, ânyë ada yê wâ batə̂ agbölö tïmï wo.

2 Tche zä ngâ yɛ̈yɛ̈ mbëtï ndə̂ a vrô tchêla nə̈ ëtchânə̂ yê. Tche zä da yê də ndôkö ëla gbölö ngû ngbro, ânyë kə̈ zâ da yê də gele ëpâ cho.

3 Tche tâ wârə̂ ngbôô batə̂ rə̂ ndə̂ bämalä ngrɨ. Ndə̂ tche tâ wârə̂ käko, anyïvrö mïndûu manə̈ bïchuû sôâ.

4 Ndə̂ anyïvrö mïndûu manə̈ bïchuû sôâ lâme, më nyîndə̂ kə̂ mbo pö nə̈ ëlə̂ mbëtï, praâbalë më djê tchə̂lə̂ ngâ gɨ̈ bhâ lafô ndə̂ âtô rə̂ päkëdə̂: «Amö mboabô apö ndə̂ âwâ lə̂ anyïvrö mïndûu manə̈ bïchuû ndə̂ âsôâ lâme mbô-ê, amö bata rə̂ lə̂ küwû nə̈.»

5 Käko ânje ndə̂ më wûn tchë ndə̂ tche krʉ̂ lafô la gbölö ngû ndjë pâ cho âme kênga könô yê də ndôkö atə̂ lafô,

6 kə̈ dêbä la rə̈ Ndjapä ndə̂ tche wâ pïï etə̂, ndə̂ tche mbô tchêlafô la arə ndə̂ âwâ lə̂nə̈, tchêbêche la arə ndə̂ âwâ pânə̈, gbölö ngû ngbro la rə ndə̂ âwâ lə̂nə̈. Ânje nə̈ tô rə̂ päkëdə̂: «Ngâ lo kä wa bata pânə̈ tee-a!

7 Praâbalë lə̂ alö ndə̂ mïndûu manə̈ bïchuû ânje nə̈ hrʉadje tätälîtä ndə̂ yê, tchâme Ndjapä âmboadje arə ndə̂ tche nyîkrə rə̂ ndə̂ gbô rə̂ wâ lə̂ küwû nə̈. Tche âmbo rə̂ gundə̂sə̂ nə̈ ndə̂ tche tô rə̂ alême sə̈ a-earə̂ ndə̂ma Ndjapä ndə̂ andjë wâtə̂ a-earə̂ kua ndə̂ yê.»

8 Tchə̂lə̂ gɨ̈ ndə̂ âtô bhâ lafô ndə̂ më djê rə̂ lâme kâ tô rə̂ sə̈ mê päkëdə̂: «Amö êë kə̂ za yɛ̈yɛ̈ mbëtï ndə̂ a vrô tchêla nə̈, ndə̂ âwâ tchânə̂ ânje ndə̂ tche krʉ̂ lafô pâ gbölö ngû ngbro, ndjë pâ cho lâme.»

9 Më gîtə̂ mê pu ânje nə̈ ânyë kə̂ yû tchë ndə̂kə̂ za yɛ̈yɛ̈ mbëtï nə̈ sə̈ mê. Tche tô rə̂ sə̈ mê päkëdə̂: «Amö za rə̂ kə̈ zɨ̂ rə̂: Ârə̂ âchu me chü bhâlə̂ zə̈, praâbalë ârə̂ âtcho me tchö batə̂ jrôâ awrʉ̂âtro lə̂ ma zə̈.»

10 Më zâ yɛ̈yɛ̈ mbëtï nə̈ tchânə̂ ânje nə̈ kə̈ zɨ̂ rə̂. Lə̂ ma mê, âtchô batə̂ jrôâ awrʉ̂âtro, praâbalë pânə̈ ndə̂ më mêra rə̂, âchû bhâlə̂ mê.

11 La tchêngbâ nə̈ a tô rə̂ sə̈ mê päkëdə̂: «Äwäpä mo ka tô ndə̂ma Ndjapä tə̂ gbölösə̂nə̈ pâ azü gö la azü ndə̂ agö ngbî la ama gö la agbïɛ̈.»

© Wycliffe Bible Translators, Inc.

Wycliffe Bible Translators, Inc.
Lean sinn:



Sanasan