Apökälîbïchi 1 - Mbëtï Ndjapä: TÄFO MADƗ̈

Dokʉ̈ pö

¹ Mbëtï âtə tö pö ndə̂ arə ndə̂ âwâ lə̂ küwû nə̈, ânyë Ndjapä zâ rə̂ sə̈ Jezü Krîsiti ndə̂kə̂ nyîsə̂ nə̈ kraâ sə̈ a-earə̂ kua ndə̂ yê. Ndjapä zä rə̂ sə̈ Jezü ndə̂kə̂ nyisə̂ nə̈ sə̈ andjê, arə ndə̂ âwâ ndə̂kə̂ wutu angaâtə. Jezü nyïsə̂ nə̈ lə̂ köbosə̂ ânje ndə̂ yê, ndə̂ tche wân tchë ndə̂kə̂ nyisə̂ nə̈ sə̈ earə̂ kua ndə̂ yê Jâan.

² Ädə̈ käko ânyë rə gbɛ̂ ndə̂ Jâan wûn rə̂ ânyë kə̈ djê rə̂, tche tö pö ndə̂nə̈ pä, tə̂ lëge nə̈ pö nə̈ wätə̂ pö ndə̂ Ndjapä, ânyë kə̈ wâ ndjë tə̂ lëge apö ndə̂ Jezü Krîsiti tô rə̂.

³ Mômô kä tə̂ akrə ndə̂ tche dɨ mbëtï âtə, mômô kä tə̂ azü ndə̂ andjë dje apö âtə ndə̂ âwâtə̂ ndə̂ma Ndjapä, ânyë kə̈ mbô rə gundə̂sə̂ apö ndə̂ a mbô rə̂ lə̂ mbëtï âtə! Bëte lo arə nə̈ wâ nə̂ tchêtchêtchê ndə̂kə̂ wutu.

Jâan pö ndə̂ a-Egilîze mïndûu manə̈ bïchuû

⁴ Mëmê Jâan kä ndə̂ âmbô mbëtï âtə sə̈ a-Egilîze mïndûu manə̈ bïchuû ndə̂ âwâ pâ cho ndə̂ Azï. Äfü pä Ndjapä ndə̂ tche wâ angêta, ânyë kə̈ wâ alême, ânyë kə̂ nəadje, mbo tchôtchô su tə̂ nyê kə̂ za zɨtɨ su sə̈ nyê. Äfü pä ayingö mïndûu manə̈ bïchuû ndə̂ andjë krʉ̂ tchâtchu ngendë-gbïɛ̈ ndə̂ Ndjapä, kʉ arə lâme sə̈ nyê.

⁵ Äfü pä Jezü Krîsiti kʉ arə lâme sə̈ nyê, tchetchë ndə̂ tche to tchêngbâ apö djîrə̂, tche wätə̂ dokʉ̈ Modô, kə̈ wâtə̂ dokʉ̈ akrə ndə̂ tche jô lə̂ gûtə̂ akuzü. Tche wätə̂ makündji ndə̂ agbïɛ̈ ndə̂ tchêbêche! Krîsiti nyïndə̂ azə̂, ânyë kə̈ jî azə̂ lə̂ ngbongbo rə ndə̂ azə̂ lə̂ köbosə̂ jï yê,

⁶ kə̈ mbô rə̂ pä azə̈ watə̂ azü ndə̂ Gbölö gö-gbïɛ̈ ndə̂ Ndjapä, a-earə̂ kə̂ wa ngela sə̈ Ndjapä ndə̂kə̂ mbo kua ndə̂ Bha nə̈ Ndjapä. Voga la gbôgbô wätə̂ andə̂ ye nə̈ ndə̂ logbɛ̂ logbɛ̂! Amin!

⁷ Nyë wünsaâ, tche kä lakə̂ nə lə̂ gûtə̂ ndrö! Ânyë la azü gbɛ̂ wun-adje tchë ndjë la azü ndə̂ andjë sû tchë alême. Azü gö pâ cho gbɛ̂ dɨadje tchə̂lə̂ ma andjê tə̂ pö ndə̂ yê. Tə̂ lëge nə̈! Amin.

⁸ Gbölö Gbïɛ̈ Ndjapä tö rə̂ päkëdə̂: «Më wä dokʉ̈tchê tə̂ arə gbɛ̂», kə̈ wâtə̂ adɨ̂ arə gbɛ̂. Më kä tâ, kə̈ wâ alême tâ, mê nəadje. Më wä la gbôgbô gbɛ̂.

Jâan wün Krîsiti lə̂ lü

⁹ Mëmê Jâan, ngâ nyê, mëmê la nyê gbɛ̂ azə̈ kä lə̂ yûkü. Azə̈ rʉ̈ätə̂ su azə̂ lə̂ köbosə̂ nə̈ ndə̂ azə̈ wâ balë la Krîsiti bëte azə̈ wätə̂ azü ndə̂ Gbölö gö-gbïɛ̈ ndə̂ Ndjapä. A ë la mê atə̂lə̂ dälä ndə̂ Pätömôse bëte pö gbɛ̂ ndə̂ Ndjapä ndə̂ më djê rə̂, ânyë kə̈ mû rə̂, ndjë bëte alëge apö ndə̂ Jezü Krîsiti tô rə̂.

¹⁰ Tə̂ lö Gbölö Gbïɛ̈, Kpɨ̂ki Yingö tchü mê kproô, ânyë më djê tchə̂lə̂ ngâ gɨ̈ dəngbâ mê ndə̂ âôn ngbôô batə̂ tchə̂lə̂ gɨ̈ tätälîtä.

¹¹ Tchə̂lə̂ gɨ̈ ôn nə̈ tö rə̂ päkëdə̂: «Rə ndə̂ mo wun rə̂ âtə, amö mbo rə̂ lə̂ mbëtï, kə̈ wân rə̂ sə̈ a-Egilîze mïndûu manə̈ bïchuû batə̂: Egilîze ndə̂ Ëfêze la Sïmîrine la andə̂ Pêregâme la andə̂ Tïyätîre la andə̂ Sârede la andə̂ Filadelefï la andə̂ Laodisë.»

¹² Më djêtə̂ mê ndə̂kə̂ wun akrə ndə̂ tche sə̂ lakə̂ to pö sə̈ mê lâme, ânyë kə̈ wûn ada-lâmba mïndûu manə̈ bïchuû ndə̂ a mbô rə̂ la lôlo.

¹³ Lê gûtə̂ ada-lâmba lâme, më wûn ngâ akrə ndə̂ tche kʉ̂tə̂ yê la modô ndə̂ akrə. Tche yü ngâ ngrɨ̈ngrɨ̈ lə̂ba ëtə̂ yê, ânyë kə̈ î tchə̂lə̂ krʉ yê la wû tchêpâ lə̂ba ndə̂ a mbô rə̂ la lôlo.

¹⁴ Küma yê la su küma yê grö vuu batə̂ grôgrô su kʉ̂tə̂ ɛ̈bro-ngbaga ndə̂ âgrô batə̂ kpâke. La yê tchö batə̂ gbölö tïmï wo.

¹⁵ Ada yê kʉ̈tə̂ yê la ngâ gbôgbô wɛ̂n ndə̂ a zâ rə̂ lə̂ wo ânyë kâkpö kʉ̂tê nə̈ gbɛ̂ rô-ê. Tchə̂lə̂ gɨ̈ yê wä batə̂ tchə̂lə̂ gɨ̈ gbölö abâdjuru-ngû.

¹⁶ Tche kʉ̈ akêkêrə̂ mïndûu manə̈ bïchuû ëtchânə̂ yê də ndôkö, ânyë ngâ besala ndə̂ manə̈ kî dəkalâ dəkalâ sə̂ lakə̂ wutu lə̂ ma yê. Tchâtchu yê tchö batə̂ ngbɛ̂ngbɛ̂ lo.

¹⁷ Ndə̂ më âsə̈ wun tchë, kə̈ tê tchâtchâ yê batə̂ akrə ndə̂ tche tchû, praâbalë tche tô könô yê də ndôkö ëpâ mê ânyë kə̈ tô rə̂ päkëdə̂: «Amö mboabô wa mbô-ê! Më wä dokʉ̈tchê tə̂ arə gbɛ̂, kə̈ wâtə̂ kə̂ ka ndə̂ arə gbɛ̂,

¹⁸ më kä la tʉ̈rʉ̂ la mê. Më tchû alême nə̂, praâbalë angaâtə më kä la tʉ̈rʉ̂ la mê ndə̂ logbɛ̂ logbɛ̂. Më kä la gbôgbô pâ kuzü, ndjë pâ tchô ndə̂ akuzü.

¹⁹ Amö mbo rə ndə̂ mo wûn rə̂ âtə lə̂ mbëtï, rə ndə̂ tchô angaâtə, la rə ndə̂ âwutuadje pâ anə̈ âtə.

²⁰ Apö lə̂ küwû ndə̂ akêkêrə̂ mïndûu manə̈ bïchuû ndə̂ mo wûn rə̂ tchânə̂ mê də ndôkö lâme la ada-lâmba mïndûu manə̈ bïchuû ndə̂ a mbô rə̂ la lôlo lâme, dju nə̈ wä kâkë: Akêkêrə̂ mïndûu manə̈ bïchuû lâme də̈ aânje ndə̂ a-Egilîze mïndûu manə̈ bïchuû, ânyë ada-lâmba mïndûu manə̈ bïchuû lâme, də̈ a-Egilîze mïndûu manə̈ bïchuû.»