Aheborö 9 - Mbëtï Ndjapä: TÄFO MADƗ̈

Köbo kə̂ voga Ndjapä

¹ Dokʉ̈ Madɨ̈ wä alême la angâ andïɛ̈ ndə̂ ânyîsə̂ köbo ndə̂kə̂ voga Ndjapä, kə̈ wâ ndjë la ngâ nda kə̂ voga Ndjapä pâ cho âtə.

² Bëte a nyïkrə ngâ ndokʉ̈ ndə̂ a takpa la Ndjapä lə̂nə̈. Dokʉ̈ tchô lə̂ ndokʉ̈ nə̈, a ë rə̂ tâ päkëdə̂: Tchô ndə̂ âwâ ngbî ânyë kə̈ dâka gbɛ̂ bëte Ndjapä, ndə̂ da alâmba, la gbalâka kɨ̈zɨ̂, la amâpa ndə̂ a kʉ rə̂ sə̈ Ndjapä wâ bhâlə̂ nə̈.

³ Dəngbâ bïchuû lə̂ba nə̈, ngâ tchô kä tâ ndə̂ a ê rə̂ tâ päkëdə̂: «Tchô ndə̂ âwâ ngbî ânyë kə̈ dâka kə̈ rô adɨ̂ nə̈ gbɛ̂ bëte Ndjapä».

⁴ Lə̂ tchô nə̈ lâme, a gbö ndjë gbalâka ndə̂ lôlo ndə̂ a cho yömbö pânə̈, la sandûgu-madɨ̈ ndə̂ kʉ̂tê nə̈ gbɛ̂ wâ la lôlo. Lə̂ sandûgu-madɨ̈ nə̈, lüsû ndə̂ lôlo kä bhâlə̂ nə̈. Lə̂ lüsû nə̈, a gbö mâne lə̂nə̈, la tchongbôlô ndə̂ Arön ndə̂ kʉ̈kʉ̂ nə̈ tâ tâ, la akalakpa täme ndə̂ a mbô andïɛ̈ ndə̂ madɨ̈ pânə̈.

⁵ Pâ sandûgu nə̈, anyîsɨ̂ acherubɛ̈n ndə̂ tchêlafô kä tâ ndə̂ ânyîsə̂ nə̈ pä Ndjapä kä lə̂ tchô nə̈ lâme. Acherubɛ̈n gbrä tchə̂lə̂ kämbrö andjê ndə̂kə̂ gʉa kʉ̂ma sandûgu nə̈ sə̂nə̈ ndə̂ a wa ngela bëte kə̂ djutu ngbongbo rə ndə̂ azü. Praâbalë lö kə̂ nyisə̂ pö pânə̈ sə̈ nyê balë balë də̂âbo rə̂ âtə-a.

⁶ Ndə̂ a nyîkrə arə nə̈ gbɛ̂ käko, a-earə̂ kə̂ wa ngela sə̈ Ndjapä lï logbɛ̂ lə̂ dokʉ̈ ndokʉ̈ ndə̂kə̂ mbo kua ndə̂ andjê.

⁷ Praâbalë lə̂ bïchuû ndokʉ̈ nə̈, kütû gbölö earə̂ kə̂ wa ngela sə̈ Ndjapä balë kä âli sûsunə̈ balë lə̂ ngû balë. Tchetchë kä ndə̂ âli la jï gia lə̂ tchô nə̈ lâme, ndə̂kə̂ kʉ rə̂ la ngela sə̈ Ndjapä bëte arə ndə̂ tchetchë la tə̂ yê mbôâbô rə̂ mbô la köbo nə̈ la andə̂ azü gö nə̈.

⁸ Kpɨ̂ki Yingö nyïndə̂ kə̂ nyïsə̂ nə̈ käko päkëdə̂: Ndə̂ gbô dokʉ̈ ndokʉ̈ ndə̂ a takpa la Ndjapä lə̂nə̈ wâ tâ lâme, köbo ndə̂kə̂ e atə̂lə̂ tchô ndə̂ âwâ ngbî ânyë kə̈ dâka gbɛ̂ bëte Ndjapä kə̈ rô adɨ̂ nə̈ gbɛ̂ lâme jîâbo dämba-a.

⁹ Arə lâme nyïndə̂ kə̂ nyisə̂ pö pâ alö ndə̂ tchô angêta. Änyïsə̂ nə̈ pä arə ndə̂ a kʉ rə̂ sə̈ Ndjapä la agia ndə̂ a kʉ rə̂ la ngela sə̈ Ndjapä mbôâbo rə̂ pä kə̂ rɨ tchə̂lə̂ su akrə daka gbɛ̂-a, ndə̂ ânyîndə̂ kə̂ to rə̂ pä akrə ndə̂ tche voga Ndjapä.

¹⁰ Apö ndə̂kə̂ zɨ rə, kə̂ ndjo pî la pö ndə̂kə̂ djutu angbongbo rə ngbî ngbî lâme gbɛ̂ də̈ kütû ambämbä andïɛ̈ ndə̂ azü. Andïɛ̈ nə̈ lâme wä la gbôgbô ndjoa ëtə̂ lo nə̈ ndə̂ Ndjapä ka mbo rə̂ ndə̂kə̂ pa arə balë balë gbɛ̂ kä watə̂ täfo nə̈.

¹¹ Praâbalë Krîsiti nə̈ batə̂ gbölö earə̂ kə̂ wa ngela sə̈ Ndjapä ndə̂ atchôtchô arə ndə̂ âwâ tâ nə̂. Tche lï lə̂ gbölö ndokʉ̈ ndə̂ âdâka gbɛ̂. Âdə̂âbo azü kä ndə̂ âmbô rə̂ la könô andjê-a, ndə̂ ânyîndə̂ kə̂ to rə̂ pä âdə̂âbo rə pâ cho âtə kä-a.

¹² Ndə̂ Krîsiti lî sûsunə̈ balë tratralë bhâlə̂ nda ndə̂ a mbô rə̂ la lə̂ba ndə̂ âwâ ngbî ânyë kə̈ dâka gbɛ̂ bëte Ndjapä, tche zâbo jï akökö aɛ̈bro la angbavö abâgala-a, tche zä jï yê la tə̂ yê la ngela ndə̂kə̂ ji azə̂ tratralë lə̂ angbongbo rə ndə̂ azə̂.

¹³ Dokʉ̈tchê alême, azü zä jï akökö aɛ̈bro la andə̂ akökö abâgala la vörə ayûyû abâgala ndə̂ a chô rə̂, ânyë kə̂ mu rə̂ tə̂ azü ndə̂ andjë wâ la kâkpö. Pânə̈, lə̂ köbosə̂ ndïɛ̈, rə lâme djutu kâkpö tə̂ andjê də sûwu.

¹⁴ Âdə rə nə̈ âwa käko, jï Krîsiti âwa la gbôgbô tə̂ gbölösə̂nə̈ ndə̂kə̂ mbo kua kə̂ ro adɨ̂ arə lâme gbɛ̂! Lə̂ köbosə̂ Kpɨ̂ki Yingö ndə̂ âwâ logbɛ̂ logbɛ̂, Krîsiti zâtə̂ yê batə̂ ngela ndə̂ âdâka gbɛ̂. Jï yê djutuadje kə̂ rɨ tchə̂lə̂ su azə̂ ndə̂ âwâ la kâkpö ânyë kə̂ ka la azə̂ pu kuzü lâme. Käko azə̂ mboadje rə̂ la Ndjapä ndə̂ tche wâ la tʉ̈rʉ̂ la yê.

¹⁵ Bëte rə̂ kä ndə̂, Krîsiti, lə̂ köbosə̂ ngâ Täfo Madɨ̈, tche də̈ earə̂ kə̂ nyikrə tchôtchô kə̂ sə lə̂ gbâtə̂ Ndjapä la azü. Käko azü ndə̂ Ndjapä ê andjê gbö atchôtchô arə ndə̂ âwâ logbɛ̂ logbɛ̂, ndə̂ tche zâ bâlâ nə̈ tə̂ azü ndə̂ yê. Andjë wä ndə̂kə̂ gbo rə̂ bëte kuzü ndə̂ tche tchû rə̂, bëte rə̂ kä ndə̂ a jî azü lə̂ angbongbo arə ndə̂ andjë mbô rə̂ tchâtchâ Dokʉ̈ Madɨ̈.

¹⁶ Bëte sə̂nə̈ ndə̂ ngâ testamä wâ tâ, äwäpä akrə ndə̂ tche mbô testamä nə̈ tchu ânyë.

¹⁷ Bëte testamä wâbo la gbôgbô ndə̂ gbô akrə nə̈ wâ la tʉ̈rʉ̂ la yê-a, pö lə̂ mbëtï nə̈ wä kütû la gbôgbô la tchêngbâ kuzü akrə nə̈.

¹⁸ Bëte rə̂ kä Dokʉ̈ Madɨ̈ nə̈ la tə̂ yê wâ kütû la gbôgbô sə̂nə̈ ndə̂ jï gia tû.

¹⁹ Möyîze mû pö ndə̂ kümändëmä balë balë gbɛ̂ gundə̂sə̂ ndïɛ̈ sə̈ azü gö gbɛ̂ ndə̂ Isarayële. Tche zâ ngbɨ̈ngbɨ̈ da yö ndə̂ a ê rə̂ tâ pä ïzôpe la ngâ ngbêngbê su kʉ̂tê ɛ̈bro-ngbaga kə̈ yî rə̂ lə̂ jï angbavö abâgala la akökö aɛ̈bro, la ngû, kə̈ mû rə̂ pâ Mbëtï-ndïɛ̈, kə̂ mû ndjë rə̂ tə̂ azü gö nə̈ gbɛ̂.

²⁰ Tche tö rə̂ päkëdə̂: «Rə âtə wätə̂ jï madɨ̈ ndə̂ Ndjapä zâma tə̂ pö ndə̂nə̈ sə̂ nyê ndə̂kə̂ pa nyë kpe wa nə̈.»

²¹ Pânə̈ Möyîze zâ jï nə̈, kə̈ mû ndjë rə̂ tə̂ kʉ̂tê ndokʉ̈ ndə̂ a takpa la Ndjapä lə̂nə̈ lâme ndjë la arə gbɛ̂ ndə̂ andjê mbo rə̂ la kua ndə̂ Ndjapä.

²² Lə̂ köbosə̂ jï kä ndə̂ a djutu gbogbôsə̂ angbongbo rə gbɛ̂, batə̂ rə̂ ndə̂ ndïɛ̈ tô pö ndə̂nə̈. Âdə jï âtuabô tû-ê, a djutuabô angbongbo rə ndə̂ azü tee-a.

Jï Krîsiti kö pö lə̂ küma azü

²³ Äwä ndə̂kə̂ pa arə balë balë gbɛ̂ ndə̂ âkʉ̂tə̂ yê la arə ndə̂ âwâ bhâ lafô, a djutu rə̂ lə̂ köbosə̂ andïɛ̈ nə̈ lâme käko, ânyë arə ndə̂ âwâ bhâ lafô nə̈ lâme la tə̂ andjê, äwä ndə̂kə̂ pa a djutu rə̂ lə̂ köbosə̂ angela ndə̂ âdâka kə̈ rô adɨ̂ nə̈ gbɛ̂.

²⁴ Bëte Krîsiti lîâbo bhâlə̂ ngâ nda Ndjapä ndə̂ könô akrə mbô rə̂-a, ndə̂ âwâtə̂ nyîsɨ̂ lëge tchô-a. Tchetchë la tə̂ yê, tche lï bhâ lafô sə̂ tchô ndə̂ tche krʉ̂ tâ angaâtə tchâtchu Ndjapä bëte azə̂.

²⁵ Gbölö earə̂ kə̂ wa ngela sə̈ Ndjapä ndə̂ azü gö ndə̂ ajuîfu lï lə̂ nda Ndjapä lə̂ ngû balë balë la jï agia. Praâbalë Krîsiti lîâbo bhâ lafô ndə̂kə̂ zatə̂ yê la tə̂ yê la ngela ëngbâ ngânə̈ ëngbâ ngânə̈-a.

²⁶ Âdə Krîsiti âli bhâ lafô ndə̂kə̂ zatə̂ yê la tə̂ yê la ngela ëngbâ ngânə̈ ëngbâ ngânə̈, dëkë Krîsiti âwun yûkü tə̂ gbölösə̂nə̈ ëngbâ ngânə̈ ëngbâ ngânə̈, gasa alême ndə̂ a mbô tchîsûwu. Käko tche lï angaâtə sûsunə̈ balë tratralë, ndə̂kə̂ djutu ngbongbo rə lə̂ köbosə̂ kə̂ zatə̂ yê la tə̂ yê la ngela.

²⁷ Bëte a dɨ̈ rə̂ sə̈ azü gbɛ̂ ndə̂kə̂ tchu sûsunə̈ balë, pânə̈, kə̂ wa ngbanga kä tâ.

²⁸ Batə̂ rə̂ ndə̂, Krîsiti zâtə̂ yê la ngela sûsunə̈ balë ndə̂kə̂ djutu angbongbo rə ndə̂ angbängbä azü, tchê kadje ngbâ yê tə̂ bïchuû nə̈ ndə̂kə̂ tcha azü ndə̂ andjë krʉ̂ bëte tchë, âdə bata ndə̂kə̂ djutu ngbongbo rə ndə̂ andjê-a.