Aheborö 8 - Mbëtï Ndjapä: TÄFO MADƗ̈

Jezü də̈ gbölö earə̂ kə̂ wa ngela

¹ Gbölö pö ndə̂ azə̈ krʉ̂ pânə̈ wä kâkë: Azə̈ wä la ngâ gbölö earə̂ kə̂ wa ngela sə̈ Ndjapä ndə̂ tche sə̂ bhâ lafô də ndôkö ngendë-gbïɛ̈ ndə̂ Ndjapä ndə̂ gbôgbô ndə̂ yê rô agbôgbô gbɛ̂.

² Tche mbö kua ndə̂ gbölö earə̂ kə̂ wa ngela sə̈ Ndjapä nə̈ lə̂ tchô ndə̂ âwâ ngbî ânyë kə̂ dâka gbɛ̂, änyïndə̂ kə̂ to rə̂ pä, lə̂ lëge ndokʉ̈ ndə̂ Gbölö Gbïɛ̈ mbô rə̂, âdə̂âbo akrə kä ndə̂ âmbô rə̂-a.

³ Agbölö earə̂ kə̂ wa ngela sə̈ Ndjapä gbɛ̂, a zä rə̂ sə̈ andjê ndə̂kə̂ wa ngela sə̈ Ndjapä la arə gbɛ̂ ndə̂ a kʉ̂ rə̂ sə̈ andjê. Ârə̂ kä, äwäpä tchandə̂ azə̂ gbölö earə̂ kə̂ wa ngela sə̈ Ndjapä nə̈ wa ndjë la ngâ rə ndə̂kə̂ wa rə̂ la ngela.

⁴ Âdə Krîsiti âsə̂ alême bêche atə̂, dëkë tchê wabô tə̂ earə̂ kə̂ wa ngela sə̈ Ndjapä balë tee-a, bëte a-earə̂ kə̂ wa ngela sə̈ Ndjapä kä tâ dokʉ̈tchê ndə̂ andjë wa ngela gundə̂sə̂ ndïɛ̈ ndə̂ Möyîze.

⁵ Praâbalë kua ndə̂ andjë mbo rə̂ kʉ̈tə̂ yê la arə ndə̂ âwâ bhâ lafô. Äwä batə̂ rə ndə̂ âgbô Möyîze alême sə̂nə̈ ndə̂ tche wâ ndə̂kə̂ mbo ndokʉ̈ ndə̂ a takpa la Ndjapä lə̂nə̈, ndə̂ âwâ ngbî bëte Ndjapä. Ndjapä krä tü yê päkëdə̂: «Äwäpä mo mbo kua ndə̂ zə̈ nə̈ gbɛ̂ gundə̂sə̂ anə̈ ndə̂ më nyîsə̂ nə̈ sə̈ mö bhâlə̂ küma aga.»

⁶ Tə̂ lëge nə̈ Ndjapä zä kua sə̈ Jezü, ârô andə̂ a-earə̂ kə̂ wa ngela sə̈ Ndjapä gbɛ̂. Bëte tche də̈ earə̂ kə̂ nyikrə tchôtchô kə̂ sə lə̂ gbâtə̂ azü la Ndjapä lə̂ köbosə̂ tchôtchô madɨ̈. Tchôtchô madɨ̈ nə̈ lâme krʉ̈ pâ atchôtchô arə ndə̂ Ndjapä zâ bâlâ tə̂ pö ndə̂nə̈.

⁷ Âdə ngbongbo rə balë âwabô wâ lə̂ Dokʉ̈ Madɨ̈ nə̈, dëkë köbo ndə̂kə̂ mbo ngâ madɨ̈ ngbî wâbo-a.

⁸ Praâbalë ngbongbo rə kä ndə̂ Ndjapä hrô la azü ndə̂ yê bëte rə̂: «Gbölö Gbïɛ̈ tö rə̂ päkëdə̂: Angâ alö âwutuadje ndə̂ mê mboadje Täfo Madɨ̈ la azü gö ndə̂ Isarayële la azü gö ndə̂ Judäa.

⁹ Madɨ̈ nə̈ wä ngbî tə̂ anə̈ ndə̂ më drô rə̂ la araâta nyê, ârâ drö rə̂ tə̂ lo nə̈ ndə̂ më zâ könô andjê ndə̂kə̂ wutu la andjê bhâchï lə̂ gö ndə̂ Ejîpiti. Bëte andjë kpôkpoabô tə̂ andjê lə̂ madɨ̈ nə̈-a. Gbölö Gbïɛ̈ tö rə̂ päkëdə̂: bëte rə̂ kä ndə̂, mëmê ndjë gbɛ̂ më gbôtə̂ araâta nyê.

¹⁰ Gbölö Gbïɛ̈ tö rə̂ päkëdə̂: Madɨ̈ ndə̂ mëmê la azü gö ndə̂ Isarayële drô rə̂ la tchêngbâ alö nə̈ lâme kä âtə: Mê mboadje andïɛ̈ ndə̂ mê bhâlə̂ kə̂ za küma andjê, ânyë kə̂ mboadje rə̂ bhâlə̂ su andjê. Mê wadje tə̂ Ndjapä ndə̂ andjê, ânyë andjê wadje tə̂ azü gö ndə̂ mê.

¹¹ Ngâ akrə kä nyiabô sə̂kə̂ wunsə̂ rə sə̈ ngâ akrə gö ndə̂ yê âdəndjë ngâ yê balë tee-a, bëte azü gbɛ̂ wun-adje sə̂ mê, ätö tə̂ abechë ndjoa ëtə̂ anênegbe azü.

¹² Bëte mê djutuadje kə̂ kosə̂ pö ndə̂ andjê, sə̂ ngbongbo rə ndə̂ andjê kä teabô lə̂ mê tee-a.»

¹³ Ndə̂ Ndjapä tô pö ndə̂ Täfo Madɨ̈ lâme, tchë mbö rə̂ pä bəndɨ nə̈ watə̂ dokʉ̈ nə̈, dëkë rə ndə̂ âwâtə̂ bəndɨ nə̈ ânyë kə̈ ndɨ̂ wä tchêtchêtchê ndə̂kə̂ rôrö.