Aheborö 6 - Mbëtï Ndjapä: TÄFO MADƗ̈

¹ Käko äwäpä azə̈ dje tchêngbâ azə̂ tə̂ adokʉ̈ apö ndə̂ azə̈ mânda rə̂ alême pâ Krîsiti, kə̂ manda pö ndə̂ âwâ bëte anênegbe azü. Azə̈ kä kâbô kâ pâ dokʉ̈ kə̂ nyisə̂ rə ndə̂ âtô pö ndə̂kə̂ gbotə̂ bəndɨ kə̂ mbo rə ndə̂ âe la azə̂ pu kuzü, la pö ndə̂kə̂ za su sə̈ Ndjapä,

² lakə̂ nyisə̂ rə pâ pö ndə̂ abatɛ̂me la pö ndə̂kə̂ to könô lə̂ küma azü, la pö ndə̂kə̂ jo ndə̂ akuzü la pö ndə̂kə̂ wa ngbanga lə̂ küma azü tratralë.

³ Âdə Ndjapä ânyində̂ nə̈, rə ndə̂ azə̈ wâ ndə̂kə̂ mbo rə̂ kä lâme.

⁴ Käko, pö ndə̂ azü ndə̂ andjë dôtə̂ andjê lə̂ bəndɨ tchîsûwu ndə̂ andjê lâme âwa atöko? Andjë gbö ngbänga ndə̂ Ndjapä sûsunə̈ balë, andjë djë tchö tchôtchô rə ndə̂ tchêlafô, andjë gbö Kpɨ̂ki Yingö,

⁵ andjë wûnsə̂ nə̈ nə̂ pä pö Ndjapä wätə̂ tchôtchô rə, kə̂ wûnsə̂ agbôgbô ndə̂ tchîsûwu ndə̂ ânə.

⁶ Praâbalë andjë dôtə̂ andjê lə̂ bəndɨ kə̂ mbo rə ndə̂ andjê, köbo ndə̂kə̂ pa a ka la andjê, ânyë andjë ka gbotə̂ bəndɨ kə̂ mbo rə ndə̂ andjê tə̂ bïchuû nə̈ wâbo balë-a. Bëte andjë kä bhî Modô ndə̂ Ndjapä pâ yö ndə̂ gba, kə̈ mâ tchë kraâ ndə̂kə̂ pa azü dro tchë.

⁷ Âdə nyïvrö ânyi töngê töngê pâ cho, âmbo rə̂ ndə̂kə̂ pa atchôtchô abë-kɨ̈ndɨ̈ wutu bëte azü ndə̂ andjë lu rə tâ, dëkë Ndjapä ê tchôtchô pö pâ cho nə̈ nə̂.

⁸ Praâbalë âdə cho nə̈ âmbo rə̂ pä achi la ayö-chi wutu, dëkë cho nə̈ wätə̂ ngbongbo cho. Ndjapä âdradje ndə̂nə̈, ânyë la tchêngbâ nə̈ a âchoadje rə̂ la wo.

⁹ Âdə andə̂ nye nə̈, arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, âdə ârâ âto pö käko, bëte ârâ wünsə̂ nə̈ pä tchôtchô rə kä bëte nyê, ndə̂ âdə̂ kə̂ tcha lə̂ kuzü.

¹⁰ Bëte Ndjapä wä djîrə̂: Käko kua ndə̂ nyë mbô rə̂, âdəndjë kə̂ nyində̂ ngâ ndə̂ nyë nyîsə̂ nə̈ tə̂ azü ndə̂ Krîsiti alême, ndjë la andjanə̈ ndə̂ tchô angêta, sə̂nə̈ yûâbo tə̂ yê-a.

¹¹ Praâbalë ârâ nyïndə̂ nə̈ pä akrə balë balë gbɛ̂ mbo kütû rə batə̂ anə̈ dokʉ̈tchê lâme ndjoa ëtə̂ manə̈, ânyë nyê gbo arə ndə̂ su nyê krʉ̂ bëte rə̂.

¹² Âwâbo pä nyë watə̂ a-earə̂ dö-a, praâbalë nyë mbö rə batə̂ azü ndə̂ andjë zâ su andjê sə̈ Ndjapä lakə̂ rʉatə̂ su andjê, ânyë kə̈ gbô rə ndə̂ Ndjapä zâ bâlâ nə̈ lâme.

Ndjapä krʉ̈ pâ bâlâ ndə̂ yê

¹³ Ndə̂ Ndjapä zâ bâlâ tə̂ Abrahâmo, tche mbö rə̂ lakə̂ deba la rə̈ yê la tə̂ yê, bëte ngâ akrə ndə̂ tche wâ gbölö kə̈ rô tchë ndə̂kə̂ mbo rə̂ wâbo-a.

¹⁴ Ndjapä tö rə̂ päkëdə̂: «Më dëba pâ zə̈ päkëdə̂: Mê eadje tchôtchô pö pâ zə̈ tə̂ gbölösə̂nə̈, kə̂ mbo rə̂ pä azü pâ mawo ndə̂ zə̈ ngba tə̂ gbölösə̂nə̈.»

¹⁵ Abrahâmo rʉ̈ätə̂ su yê ânyë rə ndə̂ Ndjapä zâ bâlâ nə̈ tə̂ yê, tche gbô rə̂.

¹⁶ Âdə azü âsə lakə̂ deba la rə̈ ngâ akrə ndə̂ tche wâ gbölö kə̈ rô andjê, bä nə̈ lâme âmbo rə̂ pä andjë krʉ pâ ngâ pö ndə̂ âwâ djîrə̂, ânyë kə̂ gama andjê nə̈ ka-ê.

¹⁷ Käko ndjë, Ndjapä nyïndə̂ kə̂ nyisə̂ nə̈ kraâ sə̈ azü ndə̂ andjë wâ ndə̂kə̂ gbo arə ndə̂ tche zâ bâlâ tə̂ pö ndə̂nə̈ lâme pä, bâlâ nə̈ lâme tchə̂lə̂ nə̈ wâbo ndə̂kə̂ zu balë-a. Bëte rə̂ kä ndə̂ tche dêba pânə̈.

¹⁸ Käko kə̂ za bâlâ lakə̂ deba, arə bïchuû lâme tchə̂lə̂ nə̈ wâbo ndə̂kə̂ zu-a, ânyë lə̂ köbosə̂ nə̈ Ndjapä môâbo ndjë yepa-a. Käko azə̂ ndə̂ azə̈ gbôtə̂ arə gbɛ̂ ndə̂kə̂ krʉ bëte arə ndə̂ Ndjapä nyïkrə rə̂ ânyë su azə̂ wâ pânə̈, azə̈ gbö gbôgbô tə̂ su azə̂ tə̂ gbölösə̂nə̈ lə̂ köbosə̂ nə̈.

¹⁹ Âdə andə̂ azə̈ nə̈, äwäpä azə̈ kpokpo tə̂ azə̂ batə̂ wɛ̂n pâ rə ndə̂ su azə̂ wâ pânə̈ lâme lə̂ la Ndjapä. Rə nə̈ ndə̂ su azə̂ wâ pânə̈ lâme wätə̂ rə ndə̂ âkpôkpo tə̂ yê, ânyë kə̈ rô lə̂ lə̂ba ndə̂ a wâ tchə̂lə̂ gbölö nda Ndjapä la rə̂ ndə̂ âwâ bhâ lafô.

²⁰ Bhâye kä ndə̂ Jezü lî dokʉ̈tchê tə̂ azə̂ ndjë bëte azə̂. Bëte tche dötə̂ yê tə̂ gbölö earə̂ kə̂ wa ngela pïï etə̂ batə̂ känyï ndə̂ Mëlëkïsëdêke.