Aheborö 5 - Mbëtï Ndjapä: TÄFO MADƗ̈

¹ Bëte agbölö earə̂ kə̂ wa ngela sə̈ Ndjapä gbɛ̂ ndə̂ a ê andjê lə̂ gbâtə̂ azü, a kʉ̈ andjê ndə̂kə̂ pa andjë mbo kua ndə̂ Ndjapä tə̂ pö ndə̂ azü nə̈. Kua ndə̂ andjê wä ndə̂kə̂ kʉ arə ndə̂ azü nə la rə̂ sə̈ Ndjapä, ndjë kə̂ wa ngela sə̈ Ndjapä bëte ngbongbo rə ndə̂ andjê.

² Angâ arə kä ndjë tâ ndə̂ âropâ a-earə̂ kə̂ wa ngela sə̈ Ndjapä. Tə̂ pö ndə̂nə̈ kä ndə̂ andjë wâ ndjë ndə̂kə̂ wun nyonyo azü ndə̂ andjë wûn-âbô sə̂ rə wûn la andjanə̈ ndə̂ andjë tchâ köbo.

³ Batə̂ rə̂ ndə̂ angâ arə rôpâ andjê lâme, andjë wâbo ndə̂kə̂ wa ngela sə̈ Ndjapä kütû bëte azü gö nə̈-a, praâbalë andjë wä ndjë ngela bëte ngbongbo rə ndə̂ andjê la tə̂ andjê.

⁴ Akrə zâbo tə̂ yê la tə̂ yê ndə̂kə̂ wa gbölö-a. Praâbalë Ndjapä kä ndə̂ âe tchë batə̂ rə̂ ndə̂ tche mbô rə̂ tə̂ Arön.

⁵ Andə̂ Krîsiti wä ndjë käko: Tche zâbo tə̂ yê la tə̂ yê ndə̂kə̂ gbo gbölö tchô ndə̂ gbölö earə̂ kə̂ wa ngela sə̈ Ndjapä lâme-a, tche gbö rə̂ dəndə̂ Ndjapä ndə̂ tche tô rə̂ päkëdə̂: «Mo də̈ Modô ndə̂ mê, angêta më wâ nə̂ tə̂ Bha zə̈.»

⁶ Ndjapä kä tô ndjë rə̂ päkëdə̂: «Mô wadje tə̂ earə̂ kə̂ wa ngela pïï etə̂, batə̂ känyï ndə̂ Mëlëkïsëdêke.»

⁷ Ndə̂ Jezü sə̂ alême bêche âtə, tche tö pö lakə̂ dɨ tchə̂lə̂ ma, la gbölö ôn la ngûla sə̈ Ndjapä ndə̂ tche wâ ndə̂kə̂ tcha azü lə̂ kuzü. Ndjapä djë tchë lə̂ köbo kə̂ mbotə̂ yê kpîɛ̂kpîɛ̂ rə̂.

⁸ Tə̂ lëge nə̈ Krîsiti wätə̂ Modô ndə̂ Ndjapä, praâbalë tche mända ndə̂kə̂ dje ma Ndjapä lə̂ arə yûkü gbɛ̂.

⁹ Ndə̂ Jezü kâ akua ndə̂ yê gbɛ̂, tche mbôtə̂ yê tə̂ akrə ndə̂ tche za kə̂ tcha lə̂ kuzü ndə̂ logbɛ̂ sə̈ azü gbɛ̂ ndə̂ andjë djê ma yê.

¹⁰ Ndjapä ê tchë tə̂ gbölö earə̂ kə̂ wa ngela batə̂ känyï ndə̂ Mëlëkïsëdêke.

Nyê gböäbô gbôtə̂ köbo kə̂ za su sə̈ Ndjapä-ê

¹¹ Pâ pö lâme, ârâ wä la apö tə̂ gbölösə̂nə̈ ndə̂kə̂ to rə̂ sə̈ nyê, praâbalë sə̂nə̈ kâkä ndə̂kə̂ kra tchêla pö sə̈ nyê, bëte nyë kä mbôtə̂ nyê batə̂ azü ndə̂ andjë djêâbô tchə̂lə̂ pö djê gagasa-ê.

¹² Ndə̂nə̈ gû alême nə̂ ndə̂kə̂ pa nyë watə̂ a-earə̂ kə̂ nyisə̂ rə! Praâbalë nyë kä wâ ndə̂kə̂ pa a ka nyîsə̂ adokʉ̈ apö Ndjapä sə̈ nyê. Nyë wä âme ndə̂kə̂ zɨ kɨ̈zɨ̂ ndə̂ âkpôkpö, praâbalë nyë kä wâtə̂ azü ndə̂ andjë ndjo ngû ngo.

¹³ Akrə ndə̂ gbô tchë sə̂ lakə̂ ndjo ngû ngo, gbô tchë kä tə̂ ngbelɛ̂ bechë. Tche wâbo ndə̂kə̂ dje tchə̂lə̂ pö pâ rə ndə̂ âwâtə̂ djîrə̂ rə-a.

¹⁴ Kɨ̈zɨ̂ ndə̂ âkpôkpö wä bëte anênegbe azü, bëte lə̂ köbosə̂ kə̂ mbo arə ndə̂ andjê, tchə̂lə̂ la andjê krä ndə̂kə̂ wunsə̂ kə̂ krʉ tchə̂lə̂ tchôtchô rə la ngbongbo rə.