Aheborö 4 - Mbëtï Ndjapä: TÄFO MADƗ̈

¹ Ndjapä zä bâlâ tə̂ azə̂ pä, azə̈ wä ndə̂kə̂ li sə̂ tchô ndə̂ tche nyïkrə rə̂ ndə̂kə̂ pa azə̈ yatə̂ azə̂ tâ. Gbô pö ndə̂kə̂ mbo rə nə̈ lâme kä po la tchô angêta, käko la azə̂ gbö-ê, ânyë köbo ndə̂kə̂ li sə̂ tchô ndə̂kə̂ yatə̂ nə̈ lâme yuabô yû tə̂ ngâ akrə lə̂ gbâtə̂ nyê-ê.

² Bëte azə̈ djë Tchôtchô Pö batə̂ rə̂ ndə̂ araâta azə̂ djê rə̂ alême. Praâbalë pö nə̈ mbôâbo ngâ rə tə̂ andjê balë-a, bëte azü ndə̂ andjë djê pö nə̈, andjë gâmbabô rə̂-a.

³ Azə̂ ndə̂ azə̈ zâ su azə̂ sə̈ Ndjapä, azə̈ wä ndə̂kə̂ li sə̈ tchô ndə̂kə̂ yatə̂ nə̈ ndə̂ a tô pö ndə̂nə̈ lâme. Ndjapä tö rə̂ päkëdə̂: «Lə̂ mêrâ ndə̂ mê, më drä ndə̂ andjê päkëdə̂: Gö də̂ më nyîkrə rə̂ ndə̂kə̂ pa andjë yatə̂ andjê tâ lâme, andjê liabô lə̂nə̈ balë tee-a!» Dëkë, Ndjapä tö pö nə̈ lâme la tchêngbâ nə̈ ndə̂ tche kâ kua ndə̂ yê alême gbɛ̂ sə̂nə̈ ndə̂ tche mbô tchîsûwu.

⁴ Bëte Mbëtï Ndjapä tö pö pâ lö mïndûu manə̈ bïchuû päkëdə̂: «Ndjapä yatə̂ yê lə̂ lö mïndûu manə̈ bïchuû la tchêngbâ kə̂ ka kua ndə̂ yê gbɛ̂.»

⁵ Ndjapä kä tô pö ndə̂ tche tô rə̂ lə̂ mbëtï tə̂ küma nə̈ lâme päkëdə̂: «Gö ndə̂ më nyïkrə rə̂ ndə̂kə̂ pa andjë yatə̂ andjê tâ lâme, andjê liabô lə̂nə̈ balë tee-a.»

⁶ Adokʉ̈ azü ndə̂ andjë djê Tchôtchô Pö nə̈, andjë lîabo sə̈ tchô ndə̂kə̂ yatə̂ nə̈ lâme-a, bëte andjë kösə̂ kə̂ gamba pö nə̈. Praâbalë gbô köbo kä tâ ndə̂kə̂ pa angâ azü li atə̂sə̂ tchô nə̈ lâme.

⁷ Bëte rə̂ kä, Ndjapä nyïkrə ngâ täfo lö ndə̂ rə̈ nə̈ wû päkëdə̂: «Angêta». La tchêngbâ angbängbä ngû ndə̂ ârô, Ndjapä zâ pö nə̈ lə̂ ma Davîdi ndə̂ a tô pö ndə̂nə̈ âme nə̂ päkëdə̂: «Angêta, âdə nyê âdje tchə̂lə̂ gɨ̈ Ndjapä, su nyê kpöäbô kpô-ê.»

⁸ Âdə Jozuwë âwûtu la abechë ndə̂ Isarayële alême bhâ sə̈ tchô ndə̂kə̂ yatə̂ nə̈ lâme, dëkë Ndjapä kä toabô ngâ pö ndə̂ ngâ lö ngbî tee-a.

⁹ Käko a bâta ngâ lö ndə̂kə̂ yatə̂ bëte azü ndə̂ Ndjapä nə̂, ndə̂ âwâ batə̂ lö mïndûu manə̈ bïchuû.

¹⁰ Bëte akrə ndə̂ tche li bhâsə̂ tchô ndə̂kə̂ yatə̂ ndə̂ Ndjapä nyîkrə rə̂ lâme, tchê yadje tə̂ yê ngbâ kua ndə̂ tche mbô rə̂ batə̂ rə̂ ndə̂ Ndjapä yatə̂ yê ngbâ andə̂ ye nə̈.

¹¹ Bëte rə̂ kä, äwäpä azə̈ pu köbo gbɛ̂ ndə̂kə̂ li bhâsə̂ tchô ndə̂kə̂ yatə̂ nə̈ lâme, kə̂ mbo rə̂ pä ngâ akrə balë lə̂ gbâtə̂ azə̂ teabô tê-ê lakə̂ kosə̂ pö batə̂ araâta azə̂ lâme-ê.

¹² Bëte Pö Ndjapä wä la tchîsûwu, kə̈ wâ la gbôgbô. Pö Ndjapä wä batə̂ besala ndə̂ manə̈ kî dəkalâ dəkalâ. Pö Ndjapä nə̈ lï zoo kə̈ krʉ̂ tchə̂lə̂ vrö la yingö, kə̈ krʉ̂ ndjë tchə̂lə̂ abülüngbɨ̈ la awole. Pö Ndjapä wä ngbanga pâ agʉ arə ndjë lakə̂ rɨ tchə̂lə̂ su akrə.

¹³ Ngâ rə balë ndə̂ Ndjapä mbô rə̂ ndə̂ âwâ wü tchâtchu yê wâbo-a. Lə̂ la Ndjapä arə gbɛ̂ wä kpändëwä, tche wün tchô pâ arə gbɛ̂, azəzə̂ kä ndə̂ âtosə̂ tchêngbâ arə ndə̂ azə̈ mbô rə̂ sə̈ tchë.

Jezü də̈ gbölö earə̂ kə̂ wa ngela

¹⁴ Äwäpä azə̈ kpokpo tə̂ azə̂ pâ su azə̂ ndə̂ azə̈ zâ rə̂ sə̈ Ndjapä, ndə̂ azə̈ mu pö ndə̂nə̈, bëte azə̈ kä la gbölö earə̂ kə̂ wa ngela ndə̂ tche rô adɨ̂ nə̈ gbɛ̂, tche ë ndjoa bhâ tchâtchu Ndjapä, Jezü Modô ndə̂ Ndjapä kä.

¹⁵ Azə̈ kä la gbölö earə̂ kə̂ wa ngela ndə̂ tche wâ ndə̂kə̂ wun nyonyo azə̂ sə̂nə̈ ndə̂ angâ arə rôpâ azə̂. Arə ndə̂ âvu azü gbɛ̂ gbö ndjë tchë batə̂ rə̂ ndə̂ âvu azü, praâbalë tche mbôâbo ngbongbo rə-a.

¹⁶ Azə̈ gïtə̂ azə̂ la su azə̂ gbɛ̂ pu ngendë-gbïɛ̈ ndə̂ Ndjapä ndə̂ tche wâ la tchôtchô su. Käko ânyë tche wun nyonyo azə̂, ânyë azə̈ gbo tchôtchô su ndə̂ yê, ndə̂kə̂ pa tche za könô sə̈ azə̂ tə̂ lö nə̈ ndə̂ tche nyîndə̂ nə̈.