Aheborö 3 - Mbëtï Ndjapä: TÄFO MADƗ̈

Jezü wä gbölö kə̈ rô Möyîze

¹ Arə̂mâ ndə̂ mê, nyë wätə̂ azü ndə̂ Ndjapä ê nyê ndə̂kə̂ watə̂ azü ndə̂ yê, käko äwäpä nyë lusə̂ Jezü, tchanə̈ ndə̂ Ndjapä wân tchë ndə̂kə̂ watə̂ gbölö earə̂ kə̂ wa ngela ndə̂ su azə̂ ndə̂ azə̈ zâ rə̂ sə̈ tchë, ânyë kə̂ mu pö ndə̂nə̈.

² Bëte Ndjapä dɨ̈ tchë alême bëte kua nə̈ lâme, ânyë tche mbô rə gundə̂sə̂ pö ma Ndjapä, Ndjapä ê tchë ndə̂kə̂ watə̂ djîrə̂ akrə batə̂ Möyîze, ndə̂ a tô pö ndə̂ yê lə̂ mbëtï päkëdə̂: «Tche mbö kua lə̂ köbo nə̈ gbɛ̂ lə̂ nda Ndjapä.»

³ Tə̂ lëge nə̈, akrə ndə̂ tche mbô nda, azü âlusə̂ yê kə̂ ro nda nə̈, ârə̂ kä, äwäpä azü lusə̂ Jezü âro masə̂nə̈ tə̂ anə̈ ndə̂ andjë lûsə̂ Möyîze lâme.

⁴ Nda gbɛ̂, akrə kä ndə̂ âmbo rə̂, praâbalë, akrə ndə̂ tche mbô arə gbɛ̂ də̈ Ndjapä.

⁵ Dëkë, Möyîze mbö djîrə̂ kua alême lə̂ nda Ndjapä gbɛ̂. Tche wä batə̂ earə̂ kua ndə̂kə̂ to pö ndə̂ rə ndə̂ Ndjapä toadje pö ndə̂nə̈ alême sə̈ azü.

⁶ Praâbalë Krîsiti mbö kua nə̈ lə̂ köbo nə̈ batə̂ Modô ndə̂ a zâ tchë tə̂ küma nda Ndjapä nə̈. Azə̈ kä ndə̂ âwâtə̂ nda nə̈, âdə azə̂ âbata su azə̂ gbɛ̂ pâ rə ndə̂ su azə̈ krʉ̂ bëte rə̂ la mômô.

Pö ndə̂ lö kə̂ yatə̂ bëte azü ndə̂ Ndjapä

⁷ Bëte rə̂ kä ndə̂ Kpɨ̂ki Yingö tô rə̂ päkëdə̂: «Angêta, âdə nyê âdje tchə̂lə̂ gɨ̈ Ndjapä,

⁸ su nyê kpöäbô kpô batə̂ rə̂ ndə̂ araâta nyê âlafô la pö tə̂ yê alême.

⁹ Ndjapä tö rə̂ päkëdə̂: Bhâye kä ndə̂ araâta nyê pû tchâma mê, lakə̂ yu tchə̂lə̂ mê ndə̂kə̂ wun arə ndə̂ mê mboadje rə̂, dëkë andjë wûn arə ndə̂ më mbô rə̂ nə̂ gbɛ̂,

¹⁰ lə̂ ngû tə̂ azü bïchuû. Bëte rə̂ kä ndə̂ mêrâ ndə̂ mê âlafô tə̂ andjê ânyë më tô rə̂ päkëdə̂: ‹Kə̂ rɨ tchə̂lə̂ andjê wätə̂ mê bhâchï logbɛ̂, andjë djêâbo tchə̂lə̂ rə ndə̂ më krʉ̂ bëte rə̂ dəndə̂ andjê-a.›

¹¹ Lə̂ mêrâ ndə̂ mê, më drä ndə̂ andjê päkëdə̂: Gö ndə̂ më nyîkrə rə̂ ndə̂kə̂ pa andjë yatə̂ andjê tâ lâme, andjê liabô lə̂nə̈ balë tee-a!»

¹² Arə̂mä, la nyê gbö-ê! Âwâbo pä ngâ akrə balë lə̂ gbâtə̂ nyê wa la ngbongbo su-a, kə̂ kosə̂ kə̂ za su yê sə̈ Ndjapä-a, ndə̂ âza köbo sə̈ tchë ndə̂kə̂ kosə̂ Ndjapä ndə̂ tche wâ la tchîsûwu-a.

¹³ Praâbalë nyë zä wängö ndə̂kə̂ za gbôgbô tə̂ su angâ nyê lə̂ gbâtə̂ nyê lə̂ alö balë balë, ndə̂ lö ndə̂ tchô «Angêta» ndə̂po lakə̂ e, ndə̂ Mbëtï Ndjapä tô pö ndə̂nə̈, ânyë ngâ akrə balë lə̂ gbâtə̂ nyê koabô sə̂kə̂ dje pö kô-ê, ânyë ngbongbo rə boloabô tchë bôlo-ê.

¹⁴ Angaâtə, azə̈ la Krîsiti kä lakə̂ mbo kua balë, ndə̂ gbô azə̂ sə̂ lakə̂ za su azə̂ tâ la gbôgbô zoo âwutu ëtə̂ manə̈ batə̂ rə̂ ndə̂ azə̈ zâ su azə̂ tâ lə̂ dokʉ̈ nə̈.

¹⁵ Mbëtï Ndjapä tö rə̂ päkëdə̂: «Angêta, âdə nyê âdje tchə̂lə̂ gɨ̈ Ndjapä, su nyê kpöäbô kpô batə̂ rə̂ ndə̂ araâta nyê âlafô la pö tə̂ yê alême.»

¹⁶ Dëkë andjanə̈ ndə̂ andjë djê tchə̂lə̂ gɨ̈ Ndjapä alême ânyë kə̈ âlafô la pö tə̂ yê lâme də̈ anə̈bâ? Andjë də̈ azü gbɛ̂ ndə̂ Möyîze wütu la andjê lə̂ gö ndə̂ Ejîpiti.

¹⁷ Mêrâ ndə̂ Ndjapä älafô lə̂ ngû tə̂ azü bïchuû tə̂ andjanə̈bâ? Mêrâ ndə̂ yê älafô tə̂ andjanə̈ ndə̂ andjë mbô ngbongbo rə ânyë kə̈ tchû bhâlə̂ kpaɛ̈gâ.

¹⁸ Ndə̂ Ndjapä dêba päkëdə̂: «Andjê liabô balë lə̂ gö ndə̂ më nyîkrə rə̂ ndə̂kə̂ pa andjë yatə̂ andjê lə̂nə̈ lâme tee-a», tche dëba lâme sə̈ andjanə̈bâ? Tche dëba sə̈ azü ndə̂ andjë âlafô tə̂ yê la pö lâme.

¹⁹ Käko azə̈ wûnsa sə̂nə̈ nə̂ pä andjë wâbo ndə̂kə̂ li lə̂ tchô ndə̂kə̂ yatə̂ lâme-a, bëte andjë kösə̂ kə̂ za su andjê sə̈ Ndjapä.