Aheborö 2 - Mbëtï Ndjapä: TÄFO MADƗ̈

Pö ndə̂ âwâ ndə̂kə̂ tcha azü lə̂ kuzü

¹ Bëte rə̂ kä, äwäpä la azə̂ gbo pâ apö gbɛ̂ ndə̂ azə̈ djê rə̂, ânyë kə̂ gboabô gbôtâ lə̂ köbo-ê.

² Pö ndə̂ Ndjapä tô rə̂ alême lə̂ köbosə̂ aânje mbô gundə̂sə̂ nə̈ nə̂. Azü ndə̂ andjë kôsə̂ nə̈ ânyë kə̈ mbôâbô rə mbô gundə̂sə̂ nə̈, ngbanga kä lə̂ küma andjê gundə̂sə̂ ngbongbo rə ndə̂ andjê.

³ Käko azəzə̂ la tə̂ azə̂, atöko kä ndə̂ azə̈ kpe tə̂ ngbanga lâme, ndə̂ azə̈ wûn kə̂ tcha lə̂ kuzü batə̂ mbämbä rə lâme? Gbölö Gbïɛ̈ la tə̂ yê kä ndə̂ âjêtə̂ kə̂ mu pö ndə̂nə̈ alême dokʉ̈tchê. Pânə̈ andjanə̈ ndə̂ andjë djê pö ndə̂ tchîsûwu ndə̂ logbɛ̂ logbɛ̂ lâme, andjë tö rə̂ sə̈ ârâ pä pö nə̈ wätə̂ lëge nə̈.

⁴ Ndjapä la tə̂ yê nyïsə̂ nə̈ pä apö nə̈ lâme watə̂ lëge nə̈ lə̂ köbosə̂ asɨ̂nyî arə la arə ndə̂ ârô kə̂ za küma azü, akpɨ̈ngbɨ̈ arə ngbî ngbî, ndjë la atchôtchô arə ndə̂ Kpɨ̂ki Yingö krʉ tchə̂lə̂ nə̈ tə̂ azü batə̂ su yê nyîndə̂ nə̈.

Jezü tchü ndə̂kə̂ tcha azü lə̂ kuzü

⁵ Bëte Ndjapä zâbo gbôgbô sə̈ aânje ndə̂kə̂ sə pâ tchîsûwu ndə̂ ânə ndə̂ azə̈ to pö ndə̂nə̈ âtə-a.

⁶ Praâbalë lə̂ Mbëtï Ndjapä, ngâ akrə tö pö kâkë: «Ndjapä, akrə də̈ tchabâ ndə̂kə̂ pa mo rɨ su zə̈ pâ yê? Modô ndə̂ Akrə də̈ tchabâ ndə̂kə̂ pa mo wun tchô pâ yê?

⁷ Mo mbö rə̂ pä tche wa ëtchâtchâ aânje ndə̂ kpîɛ̂kpîɛ̂ lö. Mo mbö rə̂ pä azü voga tchë tə̂ gbölösə̂nə̈ ânyë kə̂ lusə̂ yê.

⁸ Mo kʉ̈ arə gbɛ̂ ëtchâtchâ da yê.» Ndə̂ Ndjapä kʉ̂ arə gbɛ̂ ëtchâtchâ kümändëmä ndə̂ yê, änyïndə̂ kə̂ to rə̂ pä Ndjapä gbôâbo tə̂ ngâ rə balë ndə̂ âwâbô wâ tchâtchâ Jezü-a. Praâbalë lə̂ la azə̂, azə̈ wûn-âbo rə̂ dämba pä rə gbɛ̂ wä tchâtchâ kümändëmä ndə̂ yê-a.

⁹ Praâbalë rə ndə̂ azə̈ wûn rə̂ wä kâkë: Ndjapä mbö rə̂ pä Jezü wa kpîɛ̂kpîɛ̂ rə̂ tə̂ aânje ndə̂ ngâ kpîɛ̂kpîɛ̂ lö, ndə̂kə̂ pa lə̂ köbosə̂ tchôtchô su ndə̂ Ndjapä, Jezü tchu bëte azü gbɛ̂, praâbalë angaâtə tche kä lə̂ golowäre ânyë azü lûsə̂ yê bëte kuzü ndə̂ tche tchû rə̂.

¹⁰ Bëte Ndjapä ndə̂ tche mbô arə gbɛ̂, ânyë arə nə̈ gbɛ̂ wâ bëte tchë, tche nyïndə̂ kə̂ kʉ azü tə̂ gbölösə̂nə̈ ndə̂kə̂ sə la andjê lə̂ gbölö ndə̂ yê. Tche mbö rə̂ pä Jezü daka gbɛ̂ lə̂ köbosə̂ yûkü ndə̂ tche wûn rə̂, bëte Jezü nə̈ kä ndə̂ âza köbo sə̈ azü ndə̂kə̂ tcha lə̂ kuzü.

¹¹ Jezü ndə̂ tche kʉ azü ngbî bëte Ndjapä, ânyë tchetchë la azü nə̈ ndə̂ tche kʉ̂ andjê ngbî bëte Ndjapä nə̈ lâme gbɛ̂ wä kütû la Bha balë. Bëte rə̂ kä ndə̂ Jezü wâbo la ganô ndə̂kə̂ e rə̂ tə̂ andjê pä arə̂mä ndə̂ anyê-a.

¹² Bëte tche tö rə̂ päkëdə̂: «Mê muadje pö ndə̂ zə̈ sə̈ arə̂mä ndə̂ mê, ânyë kə̂ vogadje mö lə̂ kpûlû azü ndə̂ zə̈.»

¹³ Jezü tö ndjë rə̂ päkëdə̂: «Mëmê, mê zadje su mê gbɛ̂ pâ Ndjapä.» Tche kä tô ndjë rə̂ päkëdə̂: «Më kä âtə, mëmê la abechë ndə̂ Ndjapä kʉ̂ andjê sə̈ mê.»

¹⁴ Bëte rə̂ ndə̂ abechë nə̈ lâme wâ la tə̂ akrə la jï akrə balë, Jezü la tə̂ yê dötə̂ yê kə̈ wâ ndjë batə̂ andjê, ânyë kə̈ zâ tə̂ akrə. Käko lə̂ köbosə̂ kuzü ndə̂ yê, tche ndɨ̂ gbôgbô ndə̂ Jâbolo ndə̂ tche wâ la rə̂ alême pâ kuzü,

¹⁵ ndjë tche jï azü ndə̂ wawa kuzü mbô andjê alême, ânyë andjë wâ batə̂ angbâa lə̂ tchîsûwu ndə̂ andjê gbɛ̂.

¹⁶ Bëte Jezü nə̂âbo ndə̂kə̂ za könô sə̈ aânje-a, praâbalë tche nə̈ ndə̂kə̂ za könô sə̈ azü pâ mawo ndə̂ Abrahâmo.

¹⁷ Bëte rə̂ kä, äwäpä tche wa batə̂ angâ yê lə̂ arə gbɛ̂, ndə̂kə̂ watə̂ gbölö earə̂ kə̂ wa ngela ndə̂ dâkâ sɨ̂sɨ̈ lə̂ yê ânyë kə̂ mbo kua Ndjapä djîrə̂, ndə̂kə̂ pa tche djutu ngbongbo rə ndə̂ azü gö.

¹⁸ Angaâtə, tche wä ndə̂kə̂ za könô sə̈ azü ndə̂ arə vu andjê, bëte tchetchë la tə̂ yê, tche wün yûkü alême, ânyë arə ndə̂ âvu azü vû ndjë tchë.