Aheborö 12 - Mbëtï Ndjapä: TÄFO MADƗ̈

Ndjapä də̈ Bha azə̂

¹ Âdə andə̂ azə̈ nə̈, azə̈ wûnsə̂ nə̈ nə̂ pä pö ndə̂ angbängbä azü ndə̂ andjë mbô rə alême gundə̂sə̂ kə̂ za su andjê sə̈ Ndjapä lâme, andjë täkpa ndrotə̂ azə̂. Käko äwäpä azə̈ gbotə̂ akʉ̂ngbô ndə̂ azə̂ gbɛ̂ ndə̂ âlû, kə̂ gbotə̂ köbo ngbongbo rə ndə̂ azə̈ te lə̂nə̈ gasa lâme-ê, kə̂ kpe la rö lakə̂ rʉatə̂ su azə̂ ndə̂kə̂ pa adɨngâalî ndə̂ a nyîsə̂ nə̈ sə̈ azə̂.

² Äwäpä gbô la azə̂ wa kpôtə̂ Jezü, tchetchë kä ndə̂ ânyîsə̂ köbo kə̂ za su sə̈ Ndjapä tə̂ dokʉ̈ nə̈ ndjoa ëtə̂ manə̈. Tche nyïndə̂ kə̂ tchu pâ yö ndə̂ gba, ânyë ganô ndə̂ âkrʉ̂ bëte tchë lə̂ köbosə̂ kuzü ndə̂ yê nə̈ lâme-ê, tche mbôâbo sə̂nə̈ tə̂ yê-a, bëte tche wün mômô ndə̂ âkrʉ̂ bëte tchë. Angaâtə tche sə̈ lə̂ ngendë-gbïɛ̈ də ndôkö könô Ndjapä.

³ Nyë rɨ̈ su nyê pâ arə yûkü ndə̂ Jezü wûn rə̂ tchânə̂ a-earə̂ angbongbo rə ndə̂ andjë kôsə̂ yê, käko ndə̂kə̂ pa su nyê zogoabô zôgo ânyë nyê gbotə̂ köbo nə̈.

⁴ Bëte kʉ̈ʉ̈ ndə̂ nyê mbô rə̂ la ngbongbo rə lâme, nyë rʉ̂âbo tə̂ su nyê dämba-a, ndə̂kə̂ mbo kʉ̈ʉ̈ nə̈ ndjoa ëtə̂ kuzü-a.

⁵ Pö ndə̂ Ndjapä tô rə̂ sə̈ nyê batə̂ pö ndə̂ bha to rə̂ sə̈ amodô ndə̂ yê ndə̂kə̂ za wängö sə̈ nyê lâme, sə̂nə̈ yû tə̂ nyê nə̂? Tche tö rə̂ päkëdə̂: «Modô ndə̂ mê, âdə Gbölö Gbïɛ̈ âbhi mö, amö wun-abô rə̂ wûn tə̂ mbämbä rə-ê. Âdə Gbölö Gbïɛ̈ âgbɨtɨ tü zə̈, âwâbo pä su zə̈ zogo-a.

⁶ Bëte Gbölö Gbïɛ̈ bhï akrə ndə̂ tche nyîndə̂ yê, tche gbɨ̈tɨ tü akrə ndə̂ tche wûn tchë batə̂ modô ndə̂ yê.»

⁷ Nyë rʉ̈ätə̂ su nyê lə̂ köbosə̂ nə̈ ndə̂ Ndjapä bhî nyê, tche mbö tə̂ nyê käko, bëte nyë wätə̂ amodô ndə̂ yê. Ngâ modô kä tâ ndə̂ bha nə̈ bhîâbô tchë bhî-î?

⁸ Âdə Ndjapä âbhiabô nyê bhî, batə̂ rə̂ ndə̂ tche bhi amodô ndə̂ yê gbɛ̂, dëkë nyë wâbo tə̂ alëge amodô ndə̂ yê-a, praâbalë nyë wätə̂ abechë ndə̂ a wûn-âbô sə̂ arabha andjê wûn-î.

⁹ Arabha azə̂ pâ cho âtə bhï azə̂ ndə̂kə̂ kä la azə̈ pâ tchôtchô köbo, azə̈ kä lakə̂ kpe wa andjê. Ndə̂ âdə̂ käko, azə̈ wä ndjë ndə̂kə̂ dje ma Bha azə̈ tə̂ gbölösə̂nə̈, ndə̂ tche sə̂ bhâ lafô, ânyë azə̈ gbo tchîsûwu ndə̂ azə̂.

¹⁰ Arabha azə̂ bhï azə̂ tə̂ angâ akpîɛ̂kpîɛ̂ alö, gundə̂sə̂ rə ndə̂ su andjê nyîndə̂ nə̈. Praâbalë Ndjapä bhï azə̂ bëte dâkâ ndə̂ azə̂, ânyë azə̈ daka gbɛ̂ batə̂ tchë.

¹¹ Âdə a âbhi akrə, posə̂nə̈ tə̂ yê krâbo-a, tchë kä la nyonyo. Praâbalë tə̂ngâlo, akrə ndə̂ a nyîsə̂ rə sə̈ tchë, tchê gboadje atchôtchô arə ngbânə̈: Zɨtɨ su la tchôtchô kə̂ sə.

Kə̂ za kümändëmä lakə̂ gbɨtɨ tü

¹² Bëte rə̂ kä, nyê yorʉa tchə̂lə̂ könô nyê ndə̂ âzôgo, kə̂ mbo rə̂ pä köta nyê ndə̂ âmô lâme, âkpokpo tə̂ yê.

¹³ Nyê nyïkrə köbo nyê ngbêwôn ânyë kə̂ ro tâ, ndə̂kə̂ pa azü ndə̂ da andjê ndɨ̂ âkä ndɨabô ndɨ̂ tratralë-ê, praâbalë ndə̂kə̂ pa ätcha.

¹⁴ Nyë pü köbo ndə̂kə̂ sə la zɨtɨ su la azü gbɛ̂, kə̂ mbo rə̂ pä tchîsûwu ndə̂ nyê daka gbɛ̂. Bëte ârə̂ âdəabô də̂ käko, akrə balë wun-abô Gbölö Gbïɛ̈ tee-a.

¹⁵ La nyê gbö-ê, ânyë ngâ akrə dodoabô tə̂ yê dôdo tə̂ tchôtchô su ndə̂ Ndjapä-ê. Âwâbo pä ngâ akrə wa batə̂ soabe, ndə̂ ndôngâ yê wutu ânyë kə̂ ndɨ angbängbä azü-a.

¹⁶ La nyê gbö-ê, ânyë akrə balë lə̂ gbâtə̂ nyê puabô aɛ̈chë âdəndjë aköchë pû katchôgbɛ̂! Nyê lüsə̂ arə ndə̂ âwâtə̂ andə̂ Ndjapä. Nyê mbôâbô rə mbô batə̂ Ezawü ndə̂ tche yôsə̂ tchô ndə̂ yê ndə̂ dokʉ̈ bechë bëte kalângʉ balë ndə̂ kɨ̈zɨ̂ lâme-ê.

¹⁷ Bëte nyë wûnsə̂ nə̈ nə̂ pä, ndə̂ Ezawü nyîndə̂ nə̈ pä bha anyê e tchôtchô pö pâ anyê, praâbalë bha nə̈ grô tchë, tche gbôâbo köbo ndə̂kə̂ pa bha nə̈ nyikrə su yê ânyë kə̂ e tchôtchô pö pâ yê-a. Tche kɨ̂ lakə̂ dɨ tchə̂lə̂ ma yê la nyonyo tʉrʉ-ê.

¹⁸ Ndə̂ nyë gîtə̂ nyê pu Ndjapä, nyë gîâbo tə̂ nyê pu ngâ aga ndə̂ a grʉ rə̂ grʉ̈-a, aga ndə̂ Sinayï la wo ndə̂ âju nyenyenye, bübü tchô la tchô ndə̂ âbû bi-î, gbölö yi,

¹⁹ sɨ̈kɨ̈ tätälîtä, sɨ̈kɨ̈ tchə̂lə̂ ngâ gɨ̈. Ndə̂ azü ndə̂ Isarayële djê tchə̂lə̂ gɨ̈ nə̈ lâme, andjë yükû nə̈ pä a kä tôâbô ngâ pö tô balë sə̈ andjê-ê.

²⁰ Bëte andjë wâbo ndə̂kə̂ rʉatə̂ su andjê la apö ndə̂ tchə̂lə̂ gɨ̈ nə̈ tô rə̂ lâme-a. Tchə̂lə̂ gɨ̈ nə̈ tö rə̂ päkëdə̂: «Akrə ndə̂ tche grʉ̂ aga, âdəndjë ngâ gia, äwäpä a nye tchë la täme tche tchu-ê.»

²¹ Rə ndə̂ nyë wûn rə̂ âtə, ämbö wawa tə̂ gbölösə̂nə̈, ârə̂ kä ndə̂ Möyîze tô rə̂ päkëdə̂: «Wawa mbö mê tə̂ gbölösə̂nə̈ ânyë më sə̂ lakə̂ gugu!»

²² Praâbalë nyënyê, nyë gîtə̂ nyê nə̂ pu aga ndə̂ Siyön, la gö ndə̂ Ndjapä ndə̂ tche wâ la tchîsûwu, Jerûzalêmo ndə̂ tchêlafô la aânje sâke sâke.

²³ Nyë gîtə̂ nyê nə̂ ndola kpûlû adokʉ̈ abechë ndə̂ Ndjapä, ndə̂ a mbô rə̈ andjê lə̂ mbëtï bhâ lafô. Nyë gîtə̂ nyê nə̂ pu Ndjapä ndə̂ tche wa ngbanga ndə̂ azü gbɛ̂, la atchozö adjîrə̂ azü ndə̂ andjë dâka gbɛ̂.

²⁴ Nyë gîtə̂ nyê nə̂ ndola Jezü ndə̂ tche də̂ earə̂ kə̂ nyîkrə tchôtchô kə̂ sə lə̂ gbâtə̂ azü la Ndjapä, lə̂ köbosə̂ Täfo Madɨ̈, la jï yê ndə̂ âtû bëte azü ânyë kə̈ tô pö ârô andə̂ jï Äbêle.

²⁵ La nyê gbö-ê! Âwâbo pä nyë kosə̂ akrə ndə̂ tche to pö sə̈ nyê-a. Andjanə̈ ndə̂ andjë kosə̂ pö ndə̂ a tö rə̂ sə̈ andjê bêche âtə, andjë kpêâbo tə̂ ngbanga ndə̂ Ndjapä-a. Andə̂ azə̈ nə̈ ndə̂ azə̈ kosə̂ pö ndə̂ akrə ndə̂ tche tô bhâ lafô, azə̂ âkpe tə̂ ngbanga ndə̂ Ndjapä atöko?

²⁶ Dokʉ̈tchê alême tchə̂lə̂ gɨ̈ Ndjapä mbö rə̂ pä tchêbêche tro katchôgbɛ̂, praâbalë angaâtə tche zä bâlâ sə̈ azə̈ päkëdə̂: «Mê kä mboabô rə̂ pä kütû tchêbêche balë tro-a, praâbalë tchêlafô âtro ndjë.»

²⁷ Apö ma Ndjapä ndə̂ âtô rə̂ päkëdə̂: «Mê kadje ngbâ mê», änyïsə̂ nə̈ pä arə gbɛ̂ ndə̂ a mbô rə̂ troadje ânyë kə̂ roadje, praâbalë kütû rə ndə̂ âtroabô trô kä ndə̂ âwa ngbânə̈.

²⁸ Tə̂ pö ndə̂nə̈ ndə̂ azə̈ gbô köbo ndə̂kə̂ li lə̂ gbölö gö-gbïɛ̈ ndə̂, akrə wâbô wâ ndə̂kə̂ mbo rə̂ pä ätro lâme, käko äwäpä azə̈ za ayîabâ sə̈ Ndjapä, kə̂ mbo kua ndə̂ yê lə̂ köbosə̂ nə̈ ndə̂ âfû tə̂ yê, lakə̂ kpe wa yê, la wawa.

²⁹ Bëte Ndjapä ndə̂ azə̂ wätə̂ wo ndə̂ ândɨ rə.