Aheborö 11 - Mbëtï Ndjapä: TÄFO MADƗ̈

Kə̂ za su sə̈ Ndjapä

¹ Kə̂ za su sə̈ Ndjapä də̈ ngâ rə ndə̂ su akrə krʉ̂ bëte rə̂, ânyë tche wûnsə̂ nə̈ pä anyë gbô rə̂ nə̂. Ädə̈ ndjë ngâ rə ndə̂ akrə wûn-âbô rə̂ wûn dämba-ê, ânyë kə̈ wûnsə̂ nə̈ bhâlə̂ su yê pä rə nə̈ kä tə̂ lëge nə̈.

² Tə̂ pö ndə̂kə̂ za su sə̈ Ndjapä kä ndə̂ Ndjapä gâmba kə̂ mbo rə ndə̂ araâta azə̂.

³ Lə̂ köbosə̂ kə̂ za su sə̈ Ndjapä, azə̈ djë tchə̂lə̂ nə̈ pä, a mbö tchîsûwu lə̂ köbosə̂ pö ma yê. Âmbô rə̂ pä rə ndə̂ akrə wûn rə̂, ätö lə̂ köbosə̂ rə ndə̂ akrə wûn-âbô rə̂ wûn-î.

⁴ Lə̂ köbosə̂ kə̂ za su sə̈ Ndjapä, Äbêle zâ ngela sə̈ Ndjapä ndə̂ âdâka tə̂ andə̂ Käyîne. Lə̂ köbosə̂ kə̂ za su yê nə̈, Ndjapä dɨ̂ tchë tə̂ djîrə̂ akrə, bëte Ndjapä la tə̂ yê nyïndə̂ arə ndə̂ tche kʉ̂ rə̂. Lə̂ köbosə̂ kə̂ za su yê sə̈ Ndjapä, ndə̂ Äbêle tchû, gbô tchë kä lakə̂ to pö la tchô angêta.

⁵ Lə̂ köbosə̂ kə̂ za su sə̈ Ndjapä, a kênga Hënôke la tʉ̈rʉ̂ la yê. Ngâ akrə ndə̂ tche gbô tchë wâbo-a, bëte Ndjapä kënga la tchë bhâ ndrotə̂ yê. Bëte Mbëtï Ndjapä tö rə̂ pä, dokʉ̈tchê ndə̂kə̂ pa a kenga la tchë, Hënôke däka tchâtchu Ndjapä.

⁶ Dëkë, âdə akrə âwabô wâ ndə̂kə̂ za su yê sə̈ Ndjapä, tche wâbo ndə̂kə̂ daka lə̂ la Ndjapä-a, bëte akrə ndə̂ tche gîtə̂ yê pu Ndjapä, äwäpä tche wunsə̂ nə̈ pä Ndjapä kä tâ, tche kʉ̈ tchôtchô arə sə̈ azü ndə̂ andjë pu tchë.

⁷ Lə̂ köbosə̂ kə̂ za su sə̈ Ndjapä, Nowë djê pö ndə̂ Ndjapä tô rə̂ pâ pö ndə̂ arə ndə̂ âwutuadje ndə̂ akrə wûn-âbô rə̂ wûn dämba-ê. Nowë lûsə̂ pö lâme, ânyë kə̈ nyîkrə ngâ âreche, tchetchë la azü lə̂ bûngrɨ̂ ndə̂ yê lî lə̂nə̈ ndə̂kə̂ tcha lə̂ kuzü. Lə̂ köbosə̂ kə̂ za su sə̈ Ndjapä kä ndə̂ tche wâ ngbanga lə̂ küma azü ndə̂ tchêbêche, ânyë Ndjapä dɨ̈ tchë tə̂ djîrə̂ akrə.

⁸ Lə̂ köbosə̂ kə̂ za su sə̈ Ndjapä, Abrahâmo nyîndə̂ nə̈ lakə̂ e tchô ndə̂ Ndjapä, tche djê ma Ndjapä ânyë kə̈ gbô lə̂ gö ndə̂ yê ndə̂kə̂ e atə̂lə̂ ngâ gö ngbî, ndə̂ Ndjapä nyîndə̂ kə̂ za rə̂ sə̈ tchë ndə̂kə̂ watə̂ andə̂ ye nə̈. Abrahâmo ê kə̈ wûn-âbo sə̂ tchô ndə̂ tche e tâ-a.

⁹ Lə̂ köbosə̂ kə̂ za su sə̈ Ndjapä, Abrahâmo ê kə̈ sə̂ batə̂ akrə ndə̂ ngâ gö ngbî bhâlə̂ gö ndə̂ Ndjapä zâ bâlâ nə̈ sə̈ tchë. Abrahâmo lö lə̂ andokʉ̈, tchetchë la Izâke la Jakôbo. Andjê bïchuû lâme gbö ndjë kə̂ za bâlâ ndə̂ Ndjapä batə̂ Abrahâmo.

¹⁰ Bëte Abrahâmo krʉ̈ bëte gö ndə̂ âwâ la agbôgbô ada nda, ndə̂ Ndjapä la tə̂ yê kä ndə̂ âwûtu la känyï ndə̂kə̂ mbo nda nə̈, ndjë tchetchë kä ndə̂ âmbô rə̂.

¹¹ Lə̂ köbosə̂ kə̂ za su sə̈ Ndjapä, Sarä gbô rə lə̂ köbosə̂ nə̈ ndə̂ tche zɨ̂ bechë, ndə̂ ngû yê rô tə̂ gbölösə̂nə̈. Tche wünsə̂ nə̈ tə̂ lëge nə̈ pä âdə Ndjapä âza bâlâ tə̂ ngâ akrə, tche âbata pö ma yê.

¹² Bëte rə̂ kä, kütû lə̂ köbosə̂ akrə balë lâme ndə̂ a dɨ̂ tchë la kuzü, a zɨ̂ angbängbä azü batə̂ akêkêrə̂ lafô la amïndü tə̂ maga gbölö ngû ngbro ndə̂ akrə wâbo ndə̂kə̂ dɨ kə̂ ngba ndə̂nə̈-a.

¹³ Lə̂ köbosə̂ kə̂ za su sə̈ Ndjapä, azü lâme gbɛ̂ ndə̂ gbô andjê ndə̂po pâ su andjê ndə̂ andjë zâ rə̂ sə̈ Ndjapä, andjë tchû-î, kə̈ gbôâbo rə ndə̂ Ndjapä zâ bâlâ nə̈ lâme-a. Praâbalë andjë wûn rə̂ ndə̂ gbô rə̂ wâ ngrɨ̈, kə̈ wâ la mômô tə̂ pö ndə̂nə̈. Tchâme kä ndə̂ andjë wûnsə̂ nə̈ tə̂ lëge nə̈ pä anyë də̈ azü ndə̂ ngâ gö ngbî la a-earə̂ wrʉ̂ kupâ cho âtə.

¹⁴ Azü ndə̂ andjë to apö käko, andjë nyïnsə̂ nə̈ lə̂ la azü kraâ pä andjë pü ngâ gö ngbî ndə̂kə̂ watə̂ andə̂ andjë nə̈.

¹⁵ Âdə gbô su andjê nə̈ âwa lə̂ gö ndə̂ andjë wûtu lə̂nə̈ alême, dëkë andjë gbô köbo ndə̂kə̂ dotə̂ andjê atêe nə̂.

¹⁶ Tə̂ lëge nə̈, andjë nyïndə̂ ngâ tchôtchô gö, ndə̂kə̂ to rə̂ pä gö ndə̂ tchêlafô. Bëte rə̂ kä ndə̂ Ndjapä wâbo la ganô ndə̂kə̂ pa a e rə̂ tə̂ yê pä Ndjapä ndə̂ andjê-a. Bëte tche nyîkrə ngâ gbölö gö bëte andjê nə̂.

¹⁷ Lə̂ köbosə̂ kə̂ za su sə̈ Ndjapä, Abrahâmo wâ ngela la Izâke sə̂nə̈ ndə̂ Ndjapä nyîndə̂ kə̂ wunsə̂ nə̈ pä tche zâ su yê sə̈ anyê nə̂, tche nyîkrətə̂ yê ndə̂kə̂ wa ngela la gbokôngô modô ndə̂ yê, dëkë tche djê pö ndə̂ Ndjapä zâ bâlâ nə̈ tə̂ yê alême nə̂.

¹⁸ Ndjapä tö rə̂ alême sə̈ tchë päkëdə̂: «Lə̂ köbosə̂ Izâke kä ndə̂ mo gbo azü pâ mawo ndə̂ zə̈ ndə̂ më zâ bâlâ tə̂ pö ndə̂ andjê sə̈ mö.»

¹⁹ Praâbalë Abrahâmo tô rə̂ bhâtə̂ su yê päkëdə̂: Ndjapä kä la gbôgbô ndə̂kə̂ jo Izâke lə̂ kuzü, bëte rə̂ kä ndə̂ Ndjapä kâ la modô ndə̂ yê sə̈ tchë batə̂ rə̂ ndə̂ akrə jô lə̂ kuzü.

²⁰ Lə̂ köbosə̂ kə̂ za su sə̈ Ndjapä, Izâke ê tchôtchô pö pâ Jakôbo la Ezawü bëte tchîsûwu ndə̂ andjê ndə̂ tchêlâmbo.

²¹ Lə̂ köbosə̂ kə̂ za su sə̈ Ndjapä, ndə̂ Jakôbo âsə̈ tchu, tche ê tchôtchô pö pâ amodô balë balë ndə̂ Jozêfu. Jakôbo sû tə̂ yê la tchongbôlô ndə̂ yê ânyë kə̈ sə̂ lakə̂ voga Ndjapä.

²² Lə̂ köbosə̂ kə̂ za su sə̈ Ndjapä, sə̂nə̈ ndə̂ Jozêfu ndô tə̂kə̂ tchu, tche tô rə̂ sə̈ azü ndə̂ Isarayële pä, andjê wutuadje lə̂ gö ndə̂ Ejîpiti. Tche zâ kümändëmä sə̈ andjê tə̂ pö ndə̂ agbäbï yê.

²³ Lə̂ köbosə̂ kə̂ za su sə̈ Ndjapä, bha Möyîze la anyï nə̈ zâ tchë wü lə̂ nyîpï vötaâ ndə̂ a zɨ̂ tchë. Andjë wûn rə̂ pä bechë ndə̂ andjê nə̈ fü tə̂ gbölösə̂nə̈, ânyë andjë wâbô wâ la wawa ndə̂kə̂ kosə̂ ndïɛ̈ ndə̂ gbïɛ̈-ê.

²⁴ Lə̂ köbosə̂ kə̂ za su sə̈ Ndjapä, sə̂nə̈ ndə̂ Möyîze kʉ̂che, tche kösə̂ nə̈ ndə̂kə̂ pa azü e tchë pä modô ndə̂ ɛ̈wünrə ndə̂ Faraön.

²⁵ Möyîze nyïndə̂ kə̂ wun yûkü batə̂ azü gö ndə̂ Ndjapä, ärö rə̂ ndə̂kə̂ pa tche sə la mômô lə̂ ngbongbo rə lə̂ kpîɛ̂kpîɛ̂ lö.

²⁶ Möyîze nyïndə̂ nə̈ pä azü talusə̂ anyê batə̂ Krîsiti ndə̂ a âtaluadje sə̂ yê, äwä batə̂ ngâ gbölö tchôtchô rə kə̈ rô atchôtchô arə ndə̂ Ejîpiti, bëte gbô su yê kä pâ atchôtchô arə ndə̂ tchê gboadje rə̂ ngbâ rə ndə̂ tche mbô rə̂.

²⁷ Lə̂ köbosə̂ kə̂ za su sə̈ Ndjapä, Möyîze gbô lə̂ gö ndə̂ Ejîpiti. Tche wâbo la wawa mêrâ ndə̂ gbïɛ̈-a, tche rʉ̈ätə̂ su yê, âwûntî pä tche wün Ndjapä ndə̂ akrə wûn-âbô tchë wûn-î.

²⁸ Lə̂ köbosə̂ kə̂ za su sə̈ Ndjapä, Möyîze mbô kpülü ndə̂ Pâke. Tche zâma ndə̂kə̂ bro jï pâ amanda ndə̂kə̂ pa ânje ndə̂ kuzü, won-abô adokʉ̈ abechë ndə̂ azü ndə̂ Isarayële wôn-ê.

²⁹ Lə̂ köbosə̂ kə̂ za su sə̈ Ndjapä, azü ndə̂ Isarayële zû gbölö ngbêngbê ngû ngbro, âwûntî pä andjë nə̈ pâ gbâkü cho. Praâbalë azü gö ndə̂ Ejîpiti nyîndə̂ kə̂ mbo rə̂ batə̂ andjê, kə̈ mîndi lə̂nə̈.

³⁰ Lə̂ köbosə̂ kə̂ za su sə̈ Ndjapä, gbadja gö ndə̂ Jerikö tû gbɛ̂ ëbêche, pânə̈ ndə̂ azü ndə̂ Isarayële sə̂ lakə̂ dômbo rə̂ lə̂ lö mïndûu manə̈ bïchuû.

³¹ Lə̂ köbosə̂ kə̂ za su sə̈ Ndjapä, Rahâbo, ɛ̈chë ndə̂ kua ndə̂ yê wâ ndə̂kə̂ pu aköchë tchûâbo la azü ndə̂ andjë kôsə̂ Ndjapä-a, bëte azü ndə̂ a wân andjê tchâkabû ndə̂kə̂ wun gö nə̈, tche kʉ̈ andjê bhândə̂ yê tə̂ tchôtchô nə̈.

³² Më âkä to pö giamâ? Më wâbo la dalo ndə̂kə̂ to angâ apö pâ Jedeyön, Bärâke, Samesön, Jefetë, Davîdi, Samuɛ̈le la a-earə̂ ndə̂ma Ndjapä-a.

³³ Bëte lə̂ köbosə̂ kə̂ za su sə̈ Ndjapä, andjë röpâ agbölö gö-gbïɛ̈ la kʉ̈ʉ̈, andjë mbö adjîrə̂ rə, kə̈ gbô arə ndə̂ Ndjapä zâ bâlâ nə̈. Andjë ngbö ma abämalä ëtâ.

³⁴ Andjë wrʉ̈ atïmï wo, kə̈ kpê tə̂ azü ndə̂ andjë nyîndə̂ kə̂ won andjê la besala, andjë kä gbô gbôgbô la tchêngbâ tə̂kömbô ndə̂ andjê, kə̈ wâtə̂ agbôgbô a-earə̂ kʉ̈ʉ̈, kə̂ grô aturûgu ndə̂ azü ndə̂ angâ agö ngbî.

³⁵ Lə̂ köbosə̂ kə̂ za su sə̈ Ndjapä, aɛ̈chë kä gbô azü ndə̂ andjê ndə̂ andjë tchû alême ânyë kə̈ jô lə̂ kuzü. A mbö angânə̈ tə̂ gêgêe nə̈, praâbalë andjë kösə̂ nə̈ ndə̂kə̂ pa a wutu la andjê lə̂ arə yûkü nə̈, ndə̂kə̂ pa andjë jo lə̂ kuzü ânyë kə̂ sə tə̂ tchôtchô nə̈.

³⁶ A mö angânə̈, kə̈ bhî andjê la djapra, kə̈ î andjê la djingîli ânyë kə̂ yî andjê bhâlə̂ nda kânga.

³⁷ A nyë angânə̈ la täme ânyë andjë tchû-î, kə̈ wôn angânə̈ la chîi, kə̈ wôn angânə̈ la besala. Andjë ë katchôgbɛ̂, kə̈ yû alə̂ba ndə̂ a mbô rə̂ la kpoto ɛ̈bro-ngbanga, âdəndjë la kpoto ayû ɛ̈bro, andjë də̈ a-earə̂ yûkü, rə ndə̂ andjê wâbo tâ balë-a, a mbö arə gbôgbô tə̂ andjê.

³⁸ Andjë də̂âbo azü ndə̂ a lûsə̂ andjê pâ cho âtə-a. Andjë rö kulə̂ akpaɛ̈gâ, lə̂ aküma aga, lə̂ agrʉ̈ akëngërë, lə̂ agrʉ̈ cho.

³⁹ Ndjapä tö tchôtchô pö ndə̂ andjê lə̂ köbosə̂ kə̂ za su andjê sə̈ Ndjapä, praâbalë andjë gbôâbo tchôtchô arə ndə̂ Ndjapä zâ bâlâ nə̈ tə̂ pö ndə̂ andjê-a.

⁴⁰ Bëte Ndjapä nyïkrə tchôtchô arə ndə̂ ârô adɨ̂ arə gbɛ̂ bëte azə̂. Bëte rə̂ kä ndə̂ tche nyîâbo ndə̂nə̈ ndə̂kə̂ pa andjë daka gbɛ̂ dokʉ̈tchê tə̂ azə̂-a.