Aheborö 10 - Mbëtï Ndjapä: TÄFO MADƗ̈

¹ Ndïɛ̈ ndə̂ Möyîze wä kütû tə̂ tchâkrʉzrö atchôtchô arə ndə̂ ânə, praâbalë âwâbo tə̂ nyîsɨ̂ arə nə̈ lâme-a. Ndïɛ̈ ndə̂ Möyîze nə̈ wä ndə̂kə̂ pa a wa ngela nə̈ ëngbâ ngânə̈ ëngbâ ngânə̈ lə̂ ngû balë balë. Bëte rə̂ kä ndə̂, ndïɛ̈ nə̈ wâbo la gbôgbô ndə̂kə̂ mbo rə̂ pä azü daka gbɛ̂ lə̂ la Ndjapä-a, ndə̂ andjë wâ ndə̂kə̂ gitə̂ andjê pu Ndjapä.

² Âdə azü ndə̂ andjë sə̂ lakə̂ voga Ndjapä, ânyë lə̂ köbosə̂ ngela kä ndə̂ a djûtu angbongbo rə ndə̂ andjê sûsunə̈ balë tratralë, tchâme, andjê kä rɨ bata tchə̂lə̂ su andjê pä ngâ ngbongbo rə balë kä lə̂ küma anyê-a, käko a âgboadje tə̂ köbo ndə̂kə̂ wa ngela gbɛ̂.

³ Praâbalë lə̂ köbosə̂ kə̂ wa ngela nə̈ lâme, âmbô rə̂ pä lə̂ ngû balë balë, su andjê te pâ angbongbo rə ndə̂ andjê.

⁴ Bëte jï akökö abâgala la andə̂ akökö aɛ̈bro wâbo ndə̂kə̂ ji ngbongbo rə balë-a.

⁵ Bëte rə̂ kä, tə̂ lo nə̈ ndə̂ Krîsiti nə̂ atə̂ bêche, tche to rə̂ sə̈ Ndjapä päkëdə̂: «Mo nyîâbo ndə̂ ngela âdəndjë ngâ rə ndə̂ akrə za rə̂ sə̈ mö-a, praâbalë momö kä âkə̈ mbô rə̂ pä më wa la tə̂ akrə.

⁶ Mo nyîâbo ndə̂ agia ndə̂ a cho andjê logbɛ̂ pâ gbalâka, âdəndjë ngela ndə̂ ngbongbo rə-a.

⁷ Käko më tö rə̂ päkëdə̂: ‹Ndjapä, mëmê la tə̂ mê kä ndə̂ ânə pu mö, ndə̂kə̂ mbo rə ndə̂ su zə̈ nyîndə̂ nə̈, gundə̂sə̂ apö ndə̂ a mbô rə̂ pâ mê lə̂ Mbëtï Ndjapä.›»

⁸ Krîsiti tö rə̂ dokʉ̈tchê päkëdə̂: «Mo nyîâbo ndə̂ ngela âdəndjë arə ndə̂ azü kʉ rə̂ sə̈ mö-a, agia ndə̂ azü cho andjê logbɛ̂ pâ gbalâka âdəndjë ngela bëte angbongbo rə ndə̂ azü, âdə̂âbô rə̂ kä ndə̂ mo nyîndə̂ nə̈-a.» Dëkë a kʉ̈ angela lâme gundə̂sə̂ ndïɛ̈.

⁹ Krîsiti kä to rə̂ päkëdə̂: «Mê ânə la tə̂ mê ndə̂kə̂ mbo rə ndə̂ su zə̈ nyîndə̂ nə̈.» Krîsiti wrʉ̂ pö ndə̂ abəndɨ ngela nə̂, kə̂ zâ andə̂ ye nə̈ ëlə̂ kpâlâ nə̈.

¹⁰ Jezü Krîsiti mbö rə ndə̂ su Ndjapä nyîndə̂ nə̈. Tche zätə̂ yê la ngela sûsunə̈ balë tratralë, ârə̂ kä ndə̂ âdjutu angbongbo rə ndə̂ azə̂.

¹¹ A-earə̂ kə̂ wa ngela sə̈ Ndjapä gbɛ̂ krʉ̈ lafô lə̂ alö balë balë ndə̂kə̂ mbo kua ndə̂ andjê. Gbô ngela balë lâme kä ndə̂ andjë kʉ tchê rə̂, praâbalë âwâbo ndə̂kə̂ djûtu angbongbo rə ndə̂ azü-a.

¹² Praâbalë andə̂ Krîsiti, tche wä ngela kütû sûsunə̈ balë tratralë-ê, pânə̈ tche sə̂ ndrotə̂ Ndjapä də ndôkö könô yê.

¹³ Angaâtə, Krîsiti krʉ̈ ndə̂kə̂ pa Ndjapä mbo rə̂ pä a-earə̂ kə̂ kosə̂ yê wa batə̂ mbätä ëtchâ da yê.

¹⁴ Käko lə̂ köbosə̂ kêlä ngela ndə̂ Krîsiti, tche mbö rə̂ pä azü ndə̂ tche djûtu ngbongbo rə ndə̂ andjê daka gbɛ̂ pïï etə̂.

¹⁵ Kpɨ̂ki Yingö tö ndjë rə̂ sə̈ azə̈ pä pö lâme wätə̂ lëge nə̈, ânyë kə̈ tö rə̂ dokʉ̈tchê päkëdə̂:

¹⁶ «Gbölö Gbïɛ̈ tö rə̂ päkëdə̂: Madɨ̈ ndə̂ mëmê la andjê droadje rə̂ la tchêngbâ alö nə̈ lâme kä âtə: Mê mboadje andïɛ̈ ndə̂ mê bhâlə̂ su andjê, ânyë kə̂ mböadje rə̂ bhâlə̂ kə̂ za küma andjê.»

¹⁷ Pânə̈ tche kä tô rə̂ päkëdə̂: «Su mê kä teabô pâ ngbongbo rə âdəndjë kə̂ kosə̂ pö ndə̂ andjê balë tee-a.»

¹⁸ Dëkë, âdə a âdjutu ngbongbo rə nə̂, a kä wâbo ndə̂kə̂ wa ngela bëte rə̂-a.

Azə̈ gïtə̂ azə̂ pu Ndjapä

¹⁹ Käko arə̂mä, azə̈ wûnsə̂ nə̈ tə̂ lëge nə̈ nə̂ pä azə̈ wä ndə̂kə̂ li lə̂ tchô ndə̂ âdâka gbɛ̂ lə̂ köbosə̂ jï Jezü.

²⁰ Krîsiti krô ngâ täfo köbo sə̈ azə̈ nə̂, ndə̂ azə̈ za rə̂ ndə̂kə̂ wa la tchîsûwu. Köbo nə̈ lâme krö lə̂ köbosə̂ lə̂ba ndə̂ a wâ tchə̂lə̂ gbölö nda Ndjapä la rə̂, ndə̂ ânyîndə̂ kə̂ to rə̂ pä lə̂ köbosə̂ tə̂ yê.

²¹ Käko azə̈ kä la ngâ gbölö earə̂ kə̂ wa ngela sə̈ Ndjapä ndə̂ a zâ kümändëmä pâ nda Ndjapä sə̈ tchë.

²² Käko äwäpä azə̈ gitə̂ azə̂ pu Ndjapä la su azə̂ ndə̂ âwâ djîrə̂, ndjë la su azə̂ ndə̂ azə̈ zâ rə̂ tə̂ lëge nə̈ sə̈ Jezü, la su azə̂ ndə̂ azə̈ wûnsə̂ nə̈ pä âgrô nə̂ gbɛ̂, lakə̂ rɨ tchə̂lə̂ su azə̂ ndə̂ a djûtu rə̂ lə̂ tchôtchô ngû.

²³ Äwäpä su azə̂ ndəpo pâ rə ndə̂ azə̈ krʉ̂ bëte rə̂ tchânə̂ Ndjapä, ndə̂ azə̈ mu pö ndə̂nə̈, bëte Ndjapä mbö rə gundə̂sə̂ bâlâ ndə̂ yê.

²⁴ Azə̈ wün tchô pâ angâ azə̂ lə̂ gbâtə̂ azə̂, ânyë âmbo azə̂ pä azə̈ nyində̂ angâ azə̂, lakə̂ mbo tchôtchô kua.

²⁵ Azə̈ gböäbô gbôtə̂ kə̂ palatə̂ azə̂ la angâ azə̂-ê, batə̂ rə̂ ndə̂ angâ azü mbo tchê rə̂, praâbalë azə̈ zä wängö lə̂ gbâtə̂ azə̂ la angâ azə̂ âro anə̈ dokʉ̈tchê, bëte azə̈ wûnsə̂ nə̈ nə̂ pä lö Gbölö Gbïɛ̈ wâ nə̂ tchêtchêtchê.

²⁶ Bëte âdə azə̂ âwunsə̂ alëge pö gbɛ̂, ânyë gbô azə̂ ndə̂po lakə̂ mbo ngbongbo rə batə̂ su azə̂ nyîndə̂ nə̈, ngâ ngela ngbî ndə̂kə̂ djutu ngbongbo rə ndə̂ azə̂ nə̈ wâbo-a.

²⁷ Praâbalë rə ndə̂ âwâ ngbânə̈ wä ndə̂kə̂ pa azə̈ sə la gbölö wa tə̂ su azə̂ ndə̂kə̂ krʉ bëte ngbanga ndə̂ Ndjapä la gbölö wo ndə̂ âjuadje azü ndə̂ andjë kôsə̂ Ndjapä.

²⁸ Âdə ngâ akrə âmboabô rə mbô gundə̂sə̂ ndïɛ̈ ndə̂ Möyîze, a wâbo ndə̂kə̂ wun nyonyo yê-a, a âwon tchë, pânə̈ ndə̂ azü bïchuû âdəndjë azü vötaâ wûn tchë la ngbongbo rə, ânyë kə̈ tô pö ndə̂nə̈.

²⁹ Käko andə̂ akrə ndə̂ tche tâlusə̂ Modô ndə̂ Ndjapä, ânyë kə̈ wûn jï madɨ̈ ndə̂ âdjûtu kâkpö ndə̂ yê tə̂ mbämbä rə, lakə̂ dro Kpɨ̂ki Yingö ndə̂ tche mbô rə̂ pä azə̈ wunsə̂ tchôtchô su ndə̂ Ndjapä, pö ndə̂ yê âdə atöko? Tchê gboadje ngâ gbölö nyonyo ngbânə̈!

³⁰ Bëte azə̈ wûnsə̂ yê nə̂, tchetchë ndə̂ tche tô rə̂ päkëdə̂: «Mëmê kä ndə̂ âsə lə̂ kpâlâ akrə ndə̂ a mbô ngbongbo rə tə̂ yê, ânyë kə̂ mbo ndjë ngbongbo rə tə̂ akrə nə̈ lâme, mëmê kä ndə̂ âmbo ngbongbo rə tə̂ akrə, gundə̂sə̂ ngbongbo rə ndə̂ yê.» Tche kä tô ndjë rə̂ päkëdə̂: «Gbölö Gbïɛ̈ wadje ngbanga ndə̂ azü gö ndə̂ yê.»

³¹ Äwätə̂ gbölö gbôgbô rə ndə̂kə̂ te tchânə̂ Ndjapä ndə̂ tche wâ la tchîsûwu!

³² Äwäpä su nyê te pâ arə ndə̂ âgbô nyê alême. Lə̂ alö nə̈ lâme, pânə̈ ndə̂ nyë gbô ngbänga Ndjapä, nyë wün yûkü tə̂ gbölösə̂nə̈, nyë rʉ̈ätə̂ su nyê lə̂ agbôgbô kʉ̈ʉ̈.

³³ A drö angâ azü lə̂ gbâtə̂ nyê, kə̈ mbô arə yûkü tə̂ andjê lə̂ la azü gbɛ̂, dëkë angânə̈ wä tchêtchêtchê ndə̂kə̂ za könô sə̈ azü ndə̂ a yûku andjê lâme.

³⁴ Käko nyë krʉ̈ tchə̂lə̂ yûkü la a-earə̂ kânga, ndjë sə̂nə̈ ndə̂ a krʉ̂a arə ndə̂ nyê, nyë nyîndə̂ nə̈ la wawa la mômô, bëte nyë wûnsə̂ nə̈ nə̂ pä nyë kä la atchôtchô arə, ndə̂ âwâ pïï etə̂.

³⁵ Rə ndə̂ su nyê krʉ̂ bëte rə̂ lâme, âwâbo pä nyë gbotə̂ köbo nə̈-a, bëte nyê gbôadje gbölö rə ngbânə̈.

³⁶ Äwäpä nyë rʉatə̂ su nyê, ânyë kə̂ mbo rə ndə̂ su Ndjapä nyîndə̂ nə̈, käko ânyë nyê gbo arə ndə̂ tche zâ bâlâ nə̈ lâme.

³⁷ Bëte Mbëtï Ndjapä tô rə̂ päkëdə̂: «Adɨ̂ alö nə̈ wä kpîɛ̂kpîɛ̂ rə̂, kütû kpîɛ̂kpîɛ̂ rə̂, tchanə̈ ndə̂ tche wâ ndə̂kə̂ kä lâme, tchê kadje; tche âka angaâtə.

³⁸ Ndjapä tö rə̂ päkëdə̂: Djîrə̂ akrə ndə̂ mê wadje la tchîsûwu lə̂ köbosə̂ kə̂ za su yê sə̈ mê, praâbalë âdə tche âdotə̂ yê atə̂ ngbânə̈, mê wabô la mômô lə̂ köbosə̂ yê tee-a.»

³⁹ Azə̈ də̂âbo azü ndə̂ andjë dôtə̂ andjê atə̂ ngbânə̈ ânyë köbo yu tə̂ andjê-a. Praâbalë azə̈ də̈ azü ndə̂ azə̈ zâ su azə̂ sə̈ Jezü ndə̂kə̂ tcha lə̂ kuzü.