Aheborö 1 - Mbëtï Ndjapä: TÄFO MADƗ̈

Ndjapä tö pö sə̈ azü lə̂ köbosə̂ Modô ndə̂ yê

¹ Dokʉ̈tchê, Ndjapä tö pö alême sə̈ araâta azə̂ ëngbâ ngânə̈ ëngbâ ngânə̈ lə̂ angbängbä akänyï ngbî ngbî. Tche tö pö nə̈ sə̈ andjê lə̂ köbosə̂ a-earə̂ ndə̂ma yê.

² Praâbalë lə̂ adɨ̂ alö ndə̂ tchô angaâtə, tche tö pö sə̈ azə̂ lə̂ köbosə̂ Modô ndə̂ yê. Ndjapä mbö arə gbɛ̂ lə̂ köbosə̂ yê, tchetchë kä ndə̂ Ndjapä gbôtə̂ arə gbɛ̂ ëtchânə̂ yê ndə̂kə̂ watə̂ andə̂ ye nə̈.

³ Modô nə̈ lâme kä ndə̂ âmbo rə̂ pä a wun golowäre ndə̂ Ndjapä, tche wä tiî batə̂ Ndjapä. Tche bäta tchîsûwu lə̂ köbosə̂ pö ma yê ndə̂ âwâ la gbôgbô. La tchêngbâ nə̈ ndə̂ tche kô pö lə̂ küma azü tchêbêche, tche sə̂ də ndôkö könô Ndjapä bhâ lafô ndə̂ gbôgbô ndə̂ yê rô agbôgbô gbɛ̂.

Modô ndə̂ Ndjapä rö aânje

⁴ Modô ndə̂ Ndjapä wä gbölö kə̈ rô aânje gbɛ̂. Käko Ndjapä zâ rə̈ ngbî sə̈ tchë ndə̂ ârô andə̂ aânje.

⁵ Tə̂ lëge nə̈, Ndjapä tôâbo rə̂ lo balë sə̈ ngâ ânje päkëdə̂: «Mo də̈ Modô ndə̂ mê, angêta më wätə̂ Bha zə̈-a.» Tche tôâbo ndjë ngâ pö balë pâ ngâ ânje päkëdə̂: «Mëmê, mê wadje tə̂ Bha nə̈, ânyë tchetchë, tchê wadje tə̂ modô ndə̂ mê-a.»

⁶ Praâbalë sə̂nə̈ ndə̂ Ndjapä wân dokʉ̈ Modô ndə̂ yê atə̂ bêche atə̂, tche tö rə̂ päkëdə̂: «Äwäpä aânje ndə̂ Ndjapä gbɛ̂ voga tchë.»

⁷ Pö ndə̂ Ndjapä tô rə̂ pâ aânje kä âtə: «Tche mbö rə̂ ânyë aânje ndə̂ yê wâ batə̂ agbölö yi; tche mbö rə̂ ânyë a-earə̂ kua ndə̂ yê wâ batə̂ atïmï wo.»

⁸ Praâbalë âdə andə̂ Modô ndə̂ yê, Ndjapä tö rə̂ päkëdə̂: «Ndjapä, ngendë-gbïɛ̈ ndə̂ zə̈ âwa logbɛ̂ logbɛ̂! Mo mbö djîrə̂ kümändëmä lə̂ Gbölö gö-gbïɛ̈ ndə̂ zə̈.

⁹ Mö nyï kütû ndə̂ adjîrə̂ rə ânyë kə̈ kôsə̂ ngbongbo rə. Bëte rə̂ kä Ndjapä, Ndjapä ndə̂ zə̈ sû kâdâ lə̂ küma mê lə̂ gbâtə̂ agbïɛ̈, ânyë kə̈ sû kâdâ ndə̂ kpülü pâ küma zə̈.»

¹⁰ Ndjapä kâ tô ndjë rə̂ päkëdə̂: «Gbölö Gbïɛ̈, tə̂ dokʉ̈ nə̈, momö kä âkə̈ mbô cho, tchêlafô də̈ rə ndə̂ könô zə̈ mbô rə̂.

¹¹ Arə lâme gbɛ̂ ndɨadje, praâbalë momö ndə̂ zə nə̈, mô səadje. Tə̂ lëge nə̈, arə lâme gbɛ̂ wadje batə̂ bəndɨ lə̂ba ndə̂ âmô gbɛ̂.

¹² Mô gʉadje arə lâme batə̂ rə̂ ndə̂ akrə gʉa gbölö lə̂ba zɨ, ânyë andjê wadje ngbî batə̂ rə̂ ndə̂ akrə zu bəndɨ lə̂ba ndə̂kə̂ yu ngâ tafö nə̈. Praâbalë andə̂ zə̈ nə̈, mo wä kpôsə̂nə̈, ânyë alö zə̈ wä pïï etə̂.»

¹³ Lo balë Ndjapä tôâbo rə̂ sə̈ ngâ ânje päkëdə̂: «Nə kə̈ sə̂ də ndôkö könô mê zoo, mê mbo rə̂ pä azü ndə̂ andjë kôsə̂ zə̈ watə̂ mbätä ëtchâtchâ da zə̈!»

¹⁴ Aânje gbɛ̂ də̂âbo atchozö ndə̂ andjë mbo kua sə̈ Ndjapä? Tche wän andjê ndə̂kə̂ za könô sə̈ azü ndə̂ andjë wâ ndə̂kə̂ tcha lə̂ kuzü.