Yòv Viŋgér 7 - ŊWÀʼ NYÙY

Kisúŋnìn ke lum jìn:

¹ Éè wàn ntoʼ, á mo à wayin wuú é lábáʼ woo nsàn kiwuù, yí wáa dzə e juŋ à? Viyéŋ ví dzə̀kìr fo wò viyóʼrín, kiʼ vilerìsìn moo *síbaŋ ye á naŋsin, e fètìr.

² Tóŋ yée dzə̀ é kiŋkar moo kighín ké mbàn, kighín ke bó meluʼ me á bìŋrìn mè yòʼ yii búŋ fo fo. Bvəm yée dzə̀ e fur moo kikfə́r ke saàr, kikfə́r ke saàr, a vibuushì ví gíŋ, e kaàrí.

³ Loŋ sé se vin si tíynin moo wón njà vee abaà, wón njà, a dzə̀ vé nsane.

⁴ Kilòŋ ké ki rùn moo kirùmèn, a kìʼ kilerìsìn mo á nàvtìn e sóŋ kitàme. Sí yée wáa dzə e femèn moo visə̀m veé Heshbon, visə̀m ve ví dzəə̀n é ghaa kày yeé Bat‑Rabbim. Yúy yée nyáʼám, e shèmsín wùn à shuu wóo, mo Gwan Lebanon tìím e ŋkìʼnìn ŋkàlaʼ Damaskus.

⁵ À nan kitú ké e yuv, kí wàa tiy moo Gwan Karmel, a nə́ŋ si səə́ne fo wò kitu bèn, kiʼ sinjaʼkìn moo làv wo á baàrsìn. Mo woo fon wò, leey vijuŋ vé, m mèŋ fo m dzəə̀n.

⁶ Yìy à wíri, kee boŋ ye à bòŋèn, à tò sí. Éè ŋgaà wom ŋkòŋmé, m yú vijuŋ vé e ŋàŋ.

⁷ À tíy bèn e da moo kicí ké ten, a loŋ sé se vin si jáʼtin moo vitú ve mbàŋ.

⁸ Mò‑oò sùúy ji m kù kér fó yìi koʼ kicí ké ten kin, kóʼó, é m koy mbàŋ se sí koomen é nsàn se viyaŋ. Loŋ sé se vin si dzə̀ fó moo tútúʼ wo á kám meluʼ fo fo. Kiyoy ké ki kú a rə̀m, a rə̀ʼtìn moo baŋ kicì ye á kfə́rí,

⁹ é ntù shuù yè ku kfə̀n ji meluʼ me juŋ mè. Meluʼ mèn mè kú a leŋ bèn, a nəə́ e wò woo ŋgaà ŋkòŋmé wùn, a leŋ, a shaà fo ntù shuù, a tosín e nsàn se sòŋ.

Kisúŋnìn ke jìn:

¹⁰ Kér tàr à wíri woo ŋgaà ŋkòŋmé wom mo, a wù kù báŋri a dzə̀ mo.

¹¹ Éè shilìv shem, ku wìy, é wòsò fəə́ mvəmlaʼ, du, aá wáa shiíy e ntèʼ see fó.

¹² Wòsò yíi lò kijàvndzə kijàvndzə, e dù e súm vitiír vé vayin, du, aá leéy ó ji vitiír ví sá ne kèʼ, a saàm a, e leéy ji vibuushì və́ ví sá ne bvə̀ykír a, kìn ji vicí vé *grenadin vi sá ne fə̀ʼ a. Dzə̀ é kiboo fóo fèy fo m yíi nyòmèr wò.

¹³ Ku yù mo kifú ke bór ki rəm fo, rəʼtìnè. Báŋ se vici se juŋ si tsəətìn fo tsə́ətin, e kèʼ fo shùu kày, e dù duùn. Ŋkar yem tìm, báŋ se vici sí dzə̀ fó, à se fíy si, à se mvə sí mo m lèmèn e wò.