Yòv Viŋgér 3 - ŊWÀʼ NYÙY

¹ Mò‑oò lóo neŋ e kikun vitsə́ʼ vidzə̀m, m kù a dìy a dzə̀ tàr à wíri woo ŋgaà ŋkòŋmé wom, a tàʼ wun feyì, a bó yòʼ dzə̀ m yèn.

² Mò‑oò sùúy jii, «Mo‑óò ŋáʼáy lèn, e nə̀ə́ e ŋkàlaʼ, a tàʼ ŋgaà ŋkòŋmé wom fó fo. A tàʼ fo dzəə sí, a tàʼ fo virə̀ʼ vé kitar.» Mò‑oò tàʼ wun, e làa yòʼ yen.

³ Anshìy ve vé‑eè shiy kitúme yén mo, m dzə́r aáwune jii, «Vèn lo yèn ŋkar yem tìm á?»

⁴ Mo vèr áwune kù javsìnè, m nen tò é wùn wó, e sìr, a ker ji ŋkǐŋ, e làa yòʼ màʼtì ji wù shóʼ kiwuú, a bó m lí wun, e dù sho e yè wór lav, e nəə́ sho bèn e wàn lav fo vé‑eè koʼon kikún kém.

⁵ Ké ru kí, wónlě vikìy veé Jerusalem, m lón ven lónén, vèn kuúmé mo ŋgav wùn à njà yii laayì. Vèn kan ó ji vèn yòʼ yíi jivír kikoŋnìn kér, a bó vèr bónén, e kòm wún ben, e yù.

Luŋ wo wú meen ji taár Kisúŋnìn ke jìn:

⁶ Yímóy, kóʼ ka fó wòŋ woʼó? Kóʼ moo kikfə́m ke kindzəʼ, rəm, rəʼtìn moo kiláy kee *mer, à kee *frankinsen ki. Rəm bèn rəʼtìn moo pavda wónlě way.

⁷ Yén ri, dzə̀ Fòn Solomon mo á toor, wiy sho, a wù dzə́ e kàvàʼ. Antav və́ vé rərí kaárí kàvàʼ, wír mntuùfú, e tàr, a kù dzə̀ antav fo vé rər veé Israyi.

⁸ Wìr dzə̀m kì móo màʼ rə́r kijuŋ feyì, aá máʼ ne kàŋ là táŋ. Wìr mòʼón mòʼón kùr nyùy rə̀r é wùn, a dzə kibáʼtín, fo kinyo ki sasin, e kòóy vitsə́ʼə́.

⁹ Fòn Solomon‑eè fèr kàvàʼ wo á béʼ wun sho, a dzə̀ e kicí ke tavín kí ke vé‑eè wiy sho fo Lebanon.

¹⁰ Wù súm vitóm ve kàvàʼ və̀n e *kisha ke mbàm ke fəvír kí, e yìy sár e kisha ke mbàm ke baar kí, e sàŋrì bvə́rì wo wù‑uù baaŋè baàŋèn é kàvàʼ, a yì‑iì lì vikìy veé Jerusalem ghán, e bóo naŋsín, e ba.

¹¹ Óò vikìy veé Jerusalem, vèn ku fəə̀kír, e yèn Fòn Solomon. Wù sòv ne ntáráʼ wo yè wov‑iì bùʼùn wun sho, ntáráʼ wo wù‑uù bùʼùn wun sho e kishiíy kfə́ ké vijin, kishiíy kfə́ ké kisheʼrì.