Yòv Viŋgér 2 - ŊWÀʼ NYÙY

¹ M dzə̀ kém kibuushì ke kí kúy e Mboʼ Sharon, a m kù dzə̀ ji kibuushì ke kí teʼ e kiwoóy.

Kisúŋnìn ke lum jìn:

² Yìy à wíri, à dzə̀ ji kibuushì féyì, à tíy ké jeéy fo awàʼ vée, tíy moo kibuushì ke kí teʼ e mvə̀m vinyáʼnyaʼ.

Kisúŋnìn ke jìn:

³ Tàr à wíri, fo ké ki, mo kicí ke kí koom báŋ ki nyòmèn, e shaà vicí veé kòv vidzə̀m, bo kù dzə̀ sá mo à nyòmèn, e shaà wónlě nsùm adzə̀m. M dzə́ e wò sar vàv, yú vijuŋ e ŋàŋ, kfə́r báŋ sé se vici, a sí rəʼtìnè.

⁴ Vèn yén ri, tàr à wíri lì ne mo, e nə̀ə́ sho fo ŋkàʼ, koŋ mo ben, kíyri fo shuù.

⁵ M sí joy yàsí kikòŋnìn, weʼ wèʼèn. Tàr à wíri, ku yìír mo e tútúʼ wo á fer meluʼ sho, e yìír e báŋ se vici se sí rəʼtìn si, é m rəsin.

⁶ Kòcònè, a kitú kém kí néŋ e wun koy ŋkoòvìi, a wù ŋevì, a wù sír mo e kóy yìyí, siir e wun wùn.

⁷ Ké ru kí, wónlě vikìy veé Jerusalem, m lón ven lónén. Vèn kuúmé mo ŋgav wùn à njà yii laayì. Vèn kan ó ji vèn yòʼ yíi jivír kikoŋnìn kér, a bó vèr bónén, e kòm wun ben, e yù.

Luŋ wo wú meen ji baà Kisúŋnìn ke jìn:

⁸ Èhéè, vèn yuúrí, ŋgaà ŋkòŋmé wom sí méʼ fo mentsə̀m. Wù yá agwan, líy, yáʼay aŋkoŋ.

⁹ Tàr à wíri woo ŋgaà wom ŋkòŋmé dzə̀ moo ŋgav, a dzə moo lúm njà. Yén ri, wù və̀sə mo wù tíy e bǎm lav, feem, leey mo fó shùu wundu, bónen tsə́nsi sí fo vintaà.

¹⁰ Ŋgaà ŋkòŋmé wom kwar mo, yoŋ jii, «Shilìv shem, ŋáʼáy, é wòsò lo. Wiiy wom ntay, kii wò, ku wìy, é wòsò lo.

¹¹ Yén ri, ghán sé kidzər sí mày ne, a wuú shaà ne.

¹² Vikwiíy ví bùy ne e kwaʼ, a ghán sé yòv si ghèén ne, a vèr yú mo səkìbìŋ tóŋ e věr nsay.

¹³ Vicí vé *fig vi sí koom báŋ sə́, a vitiír vé vayin vi fəər vibuushì, rəm, rəʼtìnè. Ŋkar yem tìm, ŋáʼáy, é wòsò lo. Shilìv shem, kii wò, ku wìy, é wòsò lo.»

Kisúŋnìn ke lum jìn:

¹⁴ Ŋkar yem tìm, à làynìn ne fo mǒ si, à làynìn moo kibìŋ ke kí dzəə̀n é nsàn kilan, e làynìn moo kibìŋ ke kí nəən é mbvə̀ʼ. Ku yiì, é m yén wò. Ku sùŋnín, é m yú. Ji yè nyòm e ŋàŋ, aà kfə̀n tókir bèn kijuŋ.

¹⁵ Vèn ku koòrí wónlě vilum vee akoosàʼ vìn, e fò e vèr. Wónlě vilum ve á wayin wáyín ji á ku sə̀ ghvəə́yloŋ və̀n fo mò, ghvəə́yloŋ wom, a wù wáy ne mo é shiliv.

Kisúŋnìn ke jìn:

¹⁶ Kér mo tàr à wíri woo ŋkar yem tìm, a kér wun mo. Wù lóo nyoŋrí shuu wóm, mo woo kibuushì kfə́, bo wù wáa kiíy fo wù dzəə̀n.

¹⁷ Ŋkar yem tìm, kii wò, ku kfə̀n é bàm, ku càʼcàʼ, e lèʼ, e wìy moo ŋgav, kìn lúm njà wo wù léʼ, líy vilán aàŋkoŋ. Ku wìy, é bo ndzə wáa jàv.